Mataafa a Nuqussa a lammatta 8 - Mataafa Qulqulloota

Akka Sunaamitteetaseti piitaadi oorte

¹ Elsa'i ka iskatteetase a innaadi tootoppa xaashe kide, “Qoota Waaqa doxa qeedo piita ka para tappa loosatto malla, toolaayti qeede ka aane ka eta desa pora ke ettanno oppa tawe.”

² Iskatteese ka xaate ka akkima nama Waaqa kide qara koote ka toolaadi qeette ka piita Filisteemiti para tappa kallaatte.

³ Ete parase tappa pirameeyye, iskatteese ka piita Filisteemiti kalte ka akka tikaadi isho dulaadi isheetta ooro kaassatta'e nuqusa kapopa ante.

⁴ Sitiiyyi nuqusa orxaytase a Elsa'i Ki'asi qaraayye qoranni ka kiini, “Kodaddaasene orra qawwanna a Elsa'i kode piisa ana lele!”

⁵ Ete Ki'asi akkima Elsa'i nama to'e tootoppa xaashe nuqusa lela qara cooyye, iskatteese a innaadi tootoppa xaashe ka qoota tikaadi isho dulaaditi desa kaassatta nuqusa kapopa deete. Ki'asi ka kide, “Tin nuquso poqallaayyo! Iskatteetase isho innasene xaadi a Elsa'i tootoppa xaashe sene.”

⁶ Nuqusa ka qootoseti desa isheetta kaassade ikka ishi lelte. Nuqusa ka qootaadi desa saaraadi ajaje ka kide, “Wa turan qapta ka a piitaadi diisse paayyatte haka awweti'i wa oppa pale piisa akka ishi oorane kode.”

Elsa'i isho Penhataati nuqusase a Sooriya

⁷ Elsa'i ka katama Temaasqo opa aane. Sitiiyyi nuqusa Sooriya Penhataati ka paaqni. Ikka ishi lelen ka kidene, “Nama Waaqa'e arepa de'e.”

⁸ Nuqusa ka Asaheeli kide, “Daassata qapado ka namase a Waaqa kapopa anne ka afaayyo kodde ka isha kaassado ka kide, ‘Penhataati ikiini, ana Waaqa kaassado ka hela paaqose oppa in dina?’”

⁹ Asaheeli ka daassata paxaara fee'isa kaala kunda afuri qapade ka namase a Waaqa kapopa aane. Ka fuulase a nama Waaqa tura qa'ade ka ishi kide, “Innaatti Penhataati nuqusa a Sooriya'e ke kapopa ana erke ka kiini, ‘Hela paaqose kela in dina?’”

¹⁰ Elsa'i ka ishi oorshe ka kide, “Aane ka ishi kide, ‘Akkima to'o Waaqa i'ana akkishe ma atti aane ka kide iddinta.’”

¹¹ Namase a Waaqa ka ildaappa ishi ilda kode ka haka ishi dakaannitto'e, isha tooye ka pooyta paayye.

¹² Asaheeli ka kide, “Poqallaayyo maana'e pooyni?” Isha ka ishi oorshe ka kide, “Neequmta a samayta Isira'eeli qara kooto qootan upo malla atti mishshikeewwaasso'e apittan kupte ka xayyoolaytaaysho koraatetan lessa ka mattada hellaassoti dakadda qara nyalxattassa ka iskattaaysho kara hellaa kakkaata.”

¹³ Asaheli ka ishi kide, “Ana orxaytaayti a kuta kapa dikammo, attan xormuma ka se piisa koda?” Elsa'i ka ishi oorshe ka kide “Akkima nuqusa Sooriya koddito Waaqa i'ana akkishe.

¹⁴ Sekkammaayye Asaheeli ka Elsa'i kapa sooke ka poqallaadi kapopa tiitaawe. Penhataati ka isha kaassade ka kide, “Hela Elsa'i maana ke kide?” Isha ka kide, “Akka dinto ana lele.”

¹⁵ Ma xoori parraytaadiiyyi Asaheeli ohaata korda'e qeede ka pishaappa affayshe ka nuqusan affishe ikka to'e. Asaheli ka oori pakkaadippa nuqusume.

Iyyoraami nuqusa Yihuta

¹⁶ A Iyyooraami inna Aki'api Isira'eeli qara nuqusume para kenattatiiyyi, Iyyoohorami inna Iyyosaafiti'iw Yihuta qara'e nuqusume.

¹⁷ Isha a nuqusummooyye paraadi kunda sessa lakki. Ikka Yursaalami kuti'e ka para sette mukshe.

¹⁸ Isha qoota enenta Aki'api heme malla, akkima toola Aki'api mina'e, saantase a nuqussa Isira'eeli oppanneew aane ka fuula Waaqa tura'e, wa neeqa kode.

¹⁹ A koddito ma qoota Waaqa Taawwiti isho sanynyeetaadi haka kitto'e, akka mankisteetaadi in pannini'i kippeeta ishootta daashe malla, orxaytaadi Taawwiti malla Yihuta patissa in faane.

²⁰ Xelta Iyyohoraamiiyyi Etoomi Yihuta qara'e xaate ka issi'i nuqusa nuqusumsatte.

²¹ Iyyoohoraami ka sarakelladdaadi pisan katama Sa'iri opa tuule. Etoometa ka halkeette deete ka isha isho saarra sarakellada kapa murte. Isha isho saarraadi a sarakelladda xoori ixa'en ka orrase ishootta kapa mure oppan tarpen. Xelaadi a oranna xoori alle tikkaapa qahe.

²² Etoometa xoori haka awweti'i Yihutaata piddammi in kitto. Sapanosetiiyyi katama Lipina ka asseew ishootta qara' xa'en.

²³ Wa a'ata hase a Iyyohoraami kode mataffa torra a nuqussa a Yihuta kara'e taafamen.

²⁴ Iyyohoraami ka to'e ka katama Taawwiti oppa turka aappadaassoti oppa mookame. Innaadi Akasiyaasi ka pakkaadippa nuqusume.

Akasiyaasi nuqusa a Yihuta

²⁵ A Iyyoraami inna Aki'api Isira'eeli qara nuqusume para kudanka lakkattatiiyyi Akasiyaasi inna Iyyohoraami Yihuta qara'e nuqusume.

²⁶ Isha a nuqusummooyye paraadi kunda lakki lakki, ikka Yursaalami kara kuti'e ka para takka mukshe. Aayyaasso Ataaliya kidammi. Isheetta enenta Aki'api a nuqusa Isira'eeli kan oofta Omiri.

²⁷ Akasiyaasi qoota hemittan daltayta toola Aki'api kodde malla, saanta toola Aki'api oppanne aane ka fuula Waaqa tura wa neeqa kode.

²⁸ Akasiyaasi ka Iyyoraami inna Aki'api olliiyyi nuqusa a Sooriya Asaheli torpa katama Raamooti a Kele'adi opa tuule. Soorat ka Iyyoraami qarte.

²⁹ Nuqusase Iyyoraami a nuqusa Sooriya olli torpeneeyye, qoota Soorata Raamooti kara isha qarte malla, qarootose dinsatta'e katama IyyIsira'eeli opa tiitaawe. Inna Aki'api Iyyoraami qoota qarame malla, nuqusa Yihuta Akasiyaasi inna Iyyohoraami ka isha tooyya'e IyyIsira'eelipa lekkade.