Mataafa a Nuqussa a lammatta 7 - Mataafa Qulqulloota

¹ Elsa'i ka ishi kide, “Qaaleta Waaqa dakaye, Waaqa ikiini, ‘Paarri esse xarra Samaariya oppaayye, daamma paxaara xottaappaayye dakara pirreeta sheqileeta takka'e katama; poorta xotta lakkiw ka dakara pirreeta sheqileeta takka'ew katamta.’”

² Ajajampaytase nuqusa kela saarummo ka namase a Waaqati kide, “Hela allu kadi punu Waaqa moonta pana ka tupaxata kappa tuqaayye, i'asse koddita?” Namase a Waaqa ka ishi kide, “Sede ilddaattinni akkita ma, oppaayye a immatto.”

³ Sitiiyyi kullaysuma xarra katama oppaayye, qoosholaya afuri ca ka olli kidene, “Maana'en haka leeninno'e are tawninna?

⁴ Oton in kiininna, ‘Katama karopan kullinaayye’ Doxa eyye caay in leena; oton are'en tawninnaayye, tootinno in oolto. Semmalla xooya ka safara Sooriya opa anna ka harka daasanna; oton i'inon paheneeyye in caanna, oton i'ino leysheneeyye in leena.”

⁵ Ka ete shishipnittooyye, safara Sooriya oppopa anta xa'en. Ete safarase mina kayeneeyye, nama takka nefo kara in co.

⁶ Qoota Waaqa akka Soorata nessa sarakella ka a fartada isho a xela oranna a kutta dakayto kode malla, Soorata i'olli kiite, “Tin nuqusa Isira'eeli nuqusa Hittaata isho a kipsi'i xaayyade ka ino torpa deeni.”

⁷ Ka ete shishshipteeyye, xa'en ka alle qahen. Ka tukkannaasso ka fartaddaasso isho harrewwaasso ka safarase akka con eeyye diishen ka issin paha'e alle qahen.

⁸ Qoosholayasene ete safarase oppa kayeneeyye, tukkana takka kelopa kullen ka damen ka iken ka tukkanase karaayye dakara pirreeta ka warqeeta isho ohawwa qeedaden ka aanen ka juuten ka amma tukkana a pila kelopa kulleneew ka asseew kela paata qeedaden ka juuten.

⁹ Ka sekkammaayye olli kidene, “Wa fayya an kooni an kinno, awwe kuyyaata xasa'ey oton haka parinitto'en are tawnnaayye, dapampayaan koddinaay, semmalla anna ka tika mankisteetati lella”

¹⁰ Ka aanen ka tooytampaya xarra katamaati wellelen ka kidene, “Safara Soorata oppopan anne, opan ka fartada ka harrewwa eyye hiden, tukkannaasso ka akka daapamenen eeyye caan. Umma nama takka nefo kara in co umma nessa kara dakaanni in co.”

¹¹ Tooytampayasene a xarra katama ka otootose'ew dakaytishen ikka turaayye tika mankisteetati dakaytishen.

¹² Nuqusa ka halkeette xa'e ka saarraadi a xela orannaati kide, “Ana wa Soorata ino qara koda dikatte ishina lelo; isheetta akkan doxan puffininno i'upta ka olli kiite, ‘Isira'eeleta katamaappa sookta anka ishootta ca harkaan qaqqapna ka katamaasso karopa kullina’ Ka semmalla safaraadi kara sookte ka laka tula deddekatte.”

¹³ Saarraadi a xela oranna oppa takka ka kide, “Nama lamayta reexxina ikka fartadoosen katamaappa hase oppa ken qeedado ka aano ka wa kodda tooyna; farootaaysho akkima Isira'eelise are hase a qara toota muramte minaawweey.”

¹⁴ Ka sarakelladda lakki fartaddaasso ollin reexxen; nuqusa ka kide, “Aana ka tooyya!” Ka xela Sooriya kamma ishootta erke.

¹⁵ Ikka aanen ka tin a Soorata qahanittooyye ohawwa isho mehadda a iskamman dakkite a pora piisa immake akken ka kirra Yurtaanoosi kayen ka tiitaawen ka wa akkene piisa nuqusa lelen.

¹⁶ Samayta samaariya ka sooke ka safarase a Soorata sare ka akka Waaqa haasawade mina'e, daamma a paxaara ka xottaappaayye dakara pirreeta sheqileeta takka qeenni, poorta xotta lakki ka sheqileeta takka'ew katammi.

¹⁷ Sitiiyyi nuqusa ka ajajampaytase isha kela saarummo tooytampayta xarra katamaati kode, samayta ka isha qaranxata hire. A nuqusa tika namase a Waaqa opa xata lekkadeeyye, akka nama Waaqa haasawade mina'e, ikka to'e.

¹⁸ Akkima namase a Waaqa nuqusa kide, “Parri esse xarra Samaariya oppaayye daamma paxaara taara takka shaqileeta takka'ew katama, poorta taara lakki ka shaqileeta takka'ew katamta.” Qara'e ikka koddite.

¹⁹ Akkima ajajampaytase nuqusa kela saarummo nama Waaqati kide, “Hela kadi punu Waaqa moonta pana ka tupa xata kappa tuqaayye, i'asse koddita?” Namase a Waaqa ka ishi kide, “Sede ilddaattinni akkita ma, oppaayye a immatto.” mina'e ikka se qara koddite.

²⁰ Samayta ka xarroppa isha qara diddiite ikka to'e.