Mataafa a Nuqussa a lammatta 6 - Mataafa Qulqulloota

Akka sipla erkaha a pisha kelopa tawe daxxootan sooke

¹ Olqapa xuumampaya ka elsa kide, “Tin pora an oppa ino isho ke oli akkinninno i'ino qajini.

² Semmalla ino kirra Yurtaanoosi opa anno ka matta mina qora quurro ka ishin kallo ka tika an kela oli akkino qupno.” Elsa'i ka kide, “Aana”

³ Ishootta oppa takka ka kide, “Hela atti ino orxayaatti olli a deeto?” Isha ka kide, “In de'a!”

⁴ Ka oori ollin aanen ka ete Yurtaanoosi kayeneeyye, qora quura paayyen.

⁵ Ishoottoppa takka ete qoyra quurrooyye, sipla ka shukkaytoppa pisha karopa pi'e. Isha ka ullupe ka kide, “Oo poqallaayyo! Ha erkaha an qinsade.”

⁶ Nama Waaqa ka kaassade ka kide, “Ayshoppa xata pi'e?” Ikka porase ishi akkishe. Elsa'i ka taama shakkayta mure ka pisha qara kate. siplase a Erkaha ka tula qaropa sooke.

⁷ Ikka kide, “Teyyado!” Namase ka xata kide ka teyyade.

Elsa'i akka Soorata qara ilda lulshe

⁸ Sitiiyyi nuqusa Sooriya Isira'eeleta oli torpini; isha ka saaraadi a xela oranna olli oorsade ka kide, “Are ka areppannen safarra!”

⁹ Nama Waaqa ka nuqusa Isira'eeliti erkama erke ka kide, “Soorata porose oppa'e asattaay, isi tooytado ka eeyyen an tarpan.”

¹⁰ Nuqusa Isira'eeli ka akka nama Waaqa ishi lele mina'e porose oppopa orra erke; ka poroose oppa a lekatin issin pahe.

¹¹ Sede minan nuqusa Soorata ka akata miirode ka saarraadi a xela oranna kaassade ka kide, “Nama inoppaayye a nuqusa a Isira'eeliti akkaattummo akka co ana a leltane?”

¹² Saarraadi a xela oranna oppaayye takka ka kide, “Nuquso poqallaayyo! Ha assen, ma wa atti kaataatti kara torraannitta, a upo ka nuqusa Isira'eeliti lello Elsa'i xuumampayta Isira'eeli kara ca.”

¹³ Isha ka kide, “Akkan amma orra erko ka qapsiisso'e, pora ishi co tooyya!” Ikka ishi lelen ka kidene, “Katama Dotaanitiiyyi ca.”

¹⁴ Ikka porose opa fartada ka sarakelladda isho xela a oranna a kokokkoka erke. Ishootta ka halkeette aanen ka katamasene kapa muren.

¹⁵ Orxaytase a nama Waaqa ete teykante paraappan xa'e ka sookeeyye, xela orraanna ka fartada isho sarakelladda qapo a katamasene kapa mure'e akke ka kide, “Poqallaayyo, oo ino kido! Maana koda ino wayyi?”

¹⁶ Elsa'i ka kide, “A ino olli ca a ishootta olli ca qara qapaneey in fuuran.”

¹⁷ Ka Waaqopa qinsade ka kide, “Oo Waaqqo! Akka akko'e, ildaadi ishi pane.” Waaqa ka ildasene a orxaytaseti pane ikka fartada isho sarkeelladda apitta a Elsa'i kapa tiitayshe ka irroota qara immake akke.

¹⁸ Ete Soorata isha kapopa lekkannittooyye, Slsa'i ka Waaqopa qinsade ka kide, “Orroose qara ilda pashshe.” Waaqa ka akkima elsa'i qinsade mina'e ishootta qara ilda pashshe.

¹⁹ Elsa'i ka ishootta kide, “Pora arennen, umma katamasene nefo senenneey, ana kamma xooya nama a faanittanen ishina akkishaay ka Samaariya karopa ishoottan aane.

²⁰ Ete Samaariya karopa kullineeyye, Elsa'i ka kide, “Oo Waaqqo! Orrose akka paata akko'e ishootta ildaasso pane.” Waaqa ka ildaasso ishootta pane ikka akka otanta Samaariya kara caan akken.

²¹ Nuqusa Isira'eeli ete ishootta akkeeyye, Elsa'i kaassade ka kide, “Aappo! Hela in ishootta leysha ka pira?”

²² Isha ka kide, “Inna! In leyshan. Orra koraateetaayti isho paantaaytin poojte nefo lessaata ike parpaaccisni xawwi? Sekkapa wa damane ka ikkane ishootta daashe ikka damen ka ikken ka poqallaasso kapopa tiitaawen.”

²³ Nuqusase ka oori damta kuttayteeta ishootta kode ka ete damen ka ikken kammaayye isqara xaashe. Ishootta ka poqallaasso kapopa tiitaawen. Hakaasiti paayyatte xela oranna a Soorata piita Isira'eeli oppopa in deene.

Akka Samaariya kapa muramte

²⁴ Sekkammaayye Penehataati nuqusa Sooriya xelaadi a oranna piisa ollopa oorshe ka tuule ka Samaariya kapa mure.

²⁵ Sede qaran xaate orra Samaariya ka a kuttati doxe; matta harreeta ka dakara pirreeta sheqileeta kunda sette qeenni, uta elela ka muuddaappaayye sheqileeta keni katammi.

²⁶ Ete nuqusa Isira'eeli kawwatta katama qarandesa pora tittiitaawnooyye, iskatteeta takka ka ishopa ullupte ka kiite, “Poqallaayyo, nuquso! Ana qaarqaare.”

²⁷ Ishaka isheetta oorshe ka kide, “Oto Waaqa ke in qaarqaariniiyyi anti attan ke qaarqaara? Hela maana awtaappaayye taaki pora oppa wayneeta diipnnaane oppaayye ca anka ke qaarqaara?

²⁸ Ka isheetta kaassade ka kide ata allu rakkootaayti maana?’ Isheetta ka ishi kiite, “Iskatteese are kitto i'ana kiite, ‘Innatti a diirtatin xooye ka awwe damma parri xayyon dammaawweey.”

²⁹ Anka innaayyo xarsanne ka damme, xoori parraytaadiiyyi, anka ishi kide, ‘Innasene xaaytin xooye ka dammaaw.’ Isheetta ka innaadi juutte.”

³⁰ Nuqusa ka haasa iskatteetaseti dakaye ka isquda kaappaadi kaa'e ka ete kawwatta katama qarandesa annooyye, orra ka akka kela mehadda dapteeta kalsade akke.

³¹ Nuqusa ka kide, “Oton awwe inna Safaati Elsa'i qara matta an murrin ikka paritaayye, a Waaqa asseew ana qara kodo. Ka qaran jaalsho.”

³² Elsa'i sitiiyyi tikadippa ca; qimaya ka isha kapa qaa'en. Nuqusase ka itturandesa nama erke. A namase desa in kaynin turanne, Elsa'i ka qimayaseneti kide, “Aappaase orra lenno akkima ana qara matta mursiissa nama erke i'akkinittane? Oto namoose desa kayooyye, akka in kullinini tura xarra dufa ka dawrada; kamanta poqallaadi isha kammadesa deeniiy.”

³³ A sede afappa in dikkinniniiyyi, namase erkame ka xata kaye; nuqusa kuli ka xata kaye ka kide, “Wossen neeqa Waaqa kapa de'eneey, ka kuli arepadesa qaarqaarsa maana'en Waaqa qara asada?”