Mataafa a Nuqussa a lammatta 5 - Mataafa Qulqulloota

Akka ni'imaani qooshoppa dine

¹ Sitiiyyi Ni'imaani saara xela oranna a nuqusa Sooriya. Qoota Waaqa isha qudan Soorata akka orannaappa putto kode malla, poqallaadi kapaayye isha nama kutta ka ulfeena qapa ka xorma a oranna a kokkoka ma xoori qoosha qapa.

² Takkaayye, piita Sooriyatiiyyi xela oranna de'e ka piita Isira'eeli karaayye enenta shakkayteeta poojen. Isheetta ka iskatteeta Ni'imaani kela koda kooni.

³ Ka kuyyaata takkaayye poqolteetaadi kiite, “Ha kadin poqallaayyo Ni'imaani xuumampaytase Semaaariya kara co kapa kayni kiiteeyye, qooshoppa isha dininni heene.”

⁴ Ni'imaani ka poqallaadi kapopa aane ka wa enentase shakka Isira'eeliiyyi deete kiite ishi lele.

⁵ Nuqusa ka ishi kide, “Ana taptaappeta nuqusa Isira'eeliti taafo ka qapado ka ishin aane.” Isha ka dakara mekliteeta kudan ka warqeeta shaqileeta kuma lehi isho mehadda kalsannaane a papaxxaara kudani qapade ka ishin aane.

⁶ Taptaappeta a nuqusa Isira'eeliti taafamte ikka ishin aane nefo ikiini, “Oto taptaappese ke qara kaytooyye akka qooshadippa isha dinisso'e akkiman orxaytiyyo Ni'imaani ke kapopa erke upnaado.”

⁷ Nuqusa Isira'eeli ete taptaappese anappapeeyye mehaddaadi a kallsade'e isquda kakkaa'e ka kide, “Sede akkan nama qooshoppa dinsho anopa nama erkino, hela anan Waaqa ka nama ikassa ka dinissa ettaninni? Tooya akka ana qaraayye haasa faddanna.”

⁸ Namase a Waaqa Elsa'i ka akka nuqusa Isira'eeli isquda mehadda kakkaa'e dakaye ka nuqusa kapopa orra erke ka kide, “Ata maana'e isquda mehadda kakkaa'ite? Namoose ana kapopa erke. Ikka akkima Isira'eeli kara xuumampayta co upnaado.”

⁹ Ni'imaani ka sarakeellaadi isho fartaadin de'e ka tika Elsa'i tura xarreeyye lakoppa qa'ade.

¹⁰ Elas'i ka isha kapopa nama erke ka kide, “Aane ka kirra Yurtaanoosi oppa'e tappaan jaqado dakintaayti idinta atti nefo iqulqullaawtaay.”

¹¹ Ni'imaani xoori imiiroode ka alle aane ka kide, “Tin allu anti in dikade ka kide, ana kapopa de'a ka maxxa a Waaqa Poqallaadi hala ka porase a qoosha qarandesa harkaadi a'aansha ka ana dinsha;

¹² hela kirrada katama a Tamaasqo a Paana isho Farifaari pishadda Isira'eeli qara in qapane? Anka helati ishoottoppa an jaqado ka an dino.” Ka miirode ka tiitaawe ka tawe.

¹³ Orxayaadi ka isha kapopa de'en ka ishi kidene, “Aappo, katin xuumampayta sede qaropa wa kokkoka ke kide kiite kooni a henne? Ka kuli ete ke kide, ‘Jaqado ka qulqullaaweeyye’ maana ke dipe?”

¹⁴ Ni'imaani ka lekkade ka akka namase a Waaqa ishi kide mina'e, kirrase a Yurtaanoosi oppa tappan ela ka xata kide; dakintaadi ka oorte ka dakinta inna shakka mina koddite, ikka qulqullaawe.

¹⁵ Ikka oori orra a isha quda co piisa ollin namase a Waaqa kapopa tiitaawe ka isha tura qa'ade ka kide, “Tin akkima Isira'eeli maliiyyi Waaqa pora pila takka nefo oppa in kinnin in upnaade. Semmalla in ke naappanniiy, ana orxaytaayti qaraayye daassata teyyado.”

¹⁶ Elsa'i ka ishi kide, “Maxxa Waaqa Poqalla isase an orxaytaadi koddennen xaxanni, ke qara an teyyado.” Ni'imaani ka akka isha qara teyyado isha naappade, isha xoori iqara tiite.

¹⁷ Ni'imaani ka oori ishi kide, “Anti Waaqa maliiyyi arepadesa kalisoota kupannitto taaki kalisoota a pila waaqadda pilaati an kalshooy, piita a fee'isa kaanketa lakki akka ana daasso'en ke naappanni.”

¹⁸ Ma xoori nuqusa poqallaayyo oto killootase a Remooni sakatatta kullinooyye, qoota ana quda qapanno malla a Waaqa ana orxaytaayti sede patta diisho. Oton ana tikase a killoota a Remooni kela kaareeta oorshaayye, a Waaqa ana orxaytaayti sede nefo diisho.

¹⁹ Elsa'i ka ishi kide, “Nakaytan kale.” Ni'imaani ka isha kapadesa shakkayteeta aane.

²⁰ Orxaytase a nama Waaqa Ki'asi ka dikade ka kide, “Poqallaayyo Elsa'i namase a Sooriya asse patta diishe umma wa ishin de'e oppa takkan nefo in teyyanne. Maxxa Waaqatinnin xaxanni! Kamma'en keera ka isha qara we takkan teyyada.”

²¹ Ka oori Ni'imaani kamma anni. Ni'imaani ka a nama isha kamma keerro akke ka isha teyyatta'e, sarkeella qara lekkade ka kaassade ka kide, “We piisa nakaytawwe?

²² Ki'aasi ka ishi oorshe ka kide, “We piisa nakaytaw ma poqallaayyo Elsa'i ana erke ka kiini ‘Tin olqapa xuumampaya oppaayye xayyoolayse nama lakki piitase a kunkunnawwa qapto a Efreemitiiyyi amma ana qara de'ey, mekliteeta dakara pirreeta takka ka mehadda a kalsannaane lakki akka ishootta daasso'en ke naappanni.’”

²³ Ni'imaani ka kide, “Dakara pirreeta, mekliteeta lakki teyyado.” Ka isha naappade ka dakara pirreeta mekliteeta lakki akala lakki kara hidde ka mehadda a kalsannaane lakki ollin orxayaadi qara qape; ishootta ka qapaden ka Ki'asi tura qaten.

²⁴ Ete kunkunnaata qara kayeneeyye, Ki'asi ka harkaaysho oppa teyyade ka tika kelopa kalsade ka ishootta nakayta oorshe; ishootta ka kalen.

²⁵ Ka oori aane ka fuula poqallaadi a Elsa'i tura qa'ade. Elsa'i ka isha kaassade ka kide, ‘Hela Ki'asi ayshaayye kalli?” Ki'asi ka ishi kide, “Ha anti orxaytaayti aparipa an anne.”

²⁶ Elsa'i ka ishi kide, “A namoose ke teyyatta sarkeella qara xata lekkade, hapuriyyo ke olli in anne? Hela ini eta a oppa pirreeta ka mehadda a kalsannaane ka dula dishma a ekerta ka a wayneeta taaki xelloota kahirra ka a okkaya taaki orxaya diira isho a iskatta teyyatto?

²⁷ Semmalla oori qooshose a Ni'imaani a ke ka sanynyeetaayti qara haka paraparati de'o.” Ki'asi ka qooshode ka a fuuttota mina attaade ka isha kapaayye sooke.