Mataafa a Nuqussa a lammatta 4 - Mataafa Qulqulloota

Elsa'i akkima hiyyetteta a teekte qaarqaare

¹ Iskatteeta olqapa xuumampaya oppa a nama takkati ka Elsa'i kapopa deete ka ullupte ka ishi kiite, “Diirtiyyo a ana orxayteese xaayti ito'e. Isha nefo akkima Waaqa fuurro i''upta. Ma xoori, nama takka ino qara kuura qapa ka kapa'e, hellaayyo a diira lakki karpishshadda kodatta'e, ishootta teyyatta de'e.”

² Elsa'i ka isheetta kide, “Akkan maana ke kodo heenta? Intoonno wa tikoppa qapta ana leleey!” Isheetta ka ishi kiite, “Anti orxayteetaayti, sayteeta shakkayteetan okta kela qapa diisheey wa pila takkan nefo tikoppa an qapo.”

³ Elsa'i ka isheetta kide, “Aane ka kantaaytippandesa meeha a kara paata oorinnaan a lulle co qinsado ka in qajisadan.

⁴ Ka kale ka issi isho hellaatti a diira tura tika dufe ka meehose kara paata oorinnaan piisa kara sayteetoose o'oorshe ka meeha immakaade iskelaayye qindopa mammaysha.”

⁵ Isheetta ka oori ante ka isi isho hellaadi a diira tura tika dufte. Hellaa ka isheetta meehase deddehanni, isheetta ka sayteetase okkotowwa kara kikishshini.

⁶ Ete okkotowwasene piisa immakaadeneeyye, ikka innaadi kiite, “Meeha pilaatin ana xooyeew!” Ishi ka isheetta kide, “Meeha a pila in co.” Sayteetase ka oori qa'atte.

⁷ Isheetta ka sookte ka namase a Waaqati lelte, isha ka isheetta kide, “Aane ka sayteese kate ka kuurase aappaaseti oorshe ka kaaja a hase ke isho hellaatti ishin tikumada.” Ikka ishin tikumaden.

Akka inna Sunaamitteeta tootoppa xa'en

⁸ Kuyyaata takkaayye Elsa'i ka katama Sunaami opa aane. Teyantoolayteeta takka a iskateeta ka eyye kalta. Ka akka damta damo'e, isha naappatte. Oto eeppan tarpino pisaayye ikka damta dama eeyyepa maqni.

⁹ Iskatteetase ka diirtaadi kiite, “Ha namoose awta piisa ino kapan maqno akkama qulqullitta nama Waaqa kodde anti in upa.

¹⁰ Semmalla fooqeta qara tika shakkayteeta qupna ka kela'e, alka ka tarabbeesa ka parjuma isho ipsa xaayna. Ikka oto de'oyye eyye xaysado.”

¹¹ Kuyyaata takkaayye Elsa'i ete eeyyepa aaneeyye, ikka tikase kelopa kale ka eyye nessade.

¹² Ka orxaytaadi Ki'asi kide, “Intoonno Sunaamitteetose haleey.” Ete haleeyye, ikka deete ka fuulaadi tura qa'atte.

¹³ Elsa'i ka isheetta kide, se piisa ana dikatteey, maanan kapa ke koda? Hela qootaayti desa waan nuqusa taaki saara xela orannaati haasawada icaane?” Isheetta ka ishi kiite, “Ha anti are orriyyoppan kala.”

¹⁴ Elsa'i ka kide, “Ata kuli maanan isheetta koona?” Ki'asi ka ishi oorshe ka kide, “Ha isheetta inna in qapto, diirtaadi nefo ikere.”

¹⁵ Elsa'i ka Ki'asi kide, “intoonno isheetta haleey.” Ete haleeyye, isheetta ka deete ka xarroppa qa'atte.

¹⁶ Elsa'i ka isheetta kide, “Paranna esse inna diirta'e hadduunatta.” Isheetta ka ishi kiite, “Poqallaayyo atti a nama Waaqa'ey, atara ana orxayteetaayti in sassapadan.”

¹⁷ Iskatteetase ka inna hitte ka akka Elsa'i isheetta kide mina'e, parase deeno oppaayye etasene oppa inna diirta xaayte.

¹⁸ Innasene ka kuttaden ka kuyyaata takkaayye pora oppa aappaaysho orra unta ferro olli co opa sookaden.

¹⁹ Ka aappaayshoti kidene, “Oo mattiyyo, oo mattiyyo!” aappaaysho ka orxaytaadi kide, “Xayshe ka aayyaasso kapopan kale.”

²⁰ Ikka innasene xayshe ka aayyaasso kapopan kale. Aayyaasso ka haka olliqqootta kuyyaatati isqara qapatte, sekkammaayye ikka to'en.

²¹ Ikka ishin fayyatte ka alkasene a nama Waaqa qara mukkisse ka tura xarra dufte ka sookte.

²² Ka diirtaadi haleete ka ishi kiite, “Akkan nama Waaqa kapopa jarjartan aano ka tiitaawo'e, orxayta takka isho harreeta takka ana erke.”

²³ Isha ka isheetta kide, “Awwe kuyyaata xaysonessuma taaki a sampata'enneey, maana'e nama Waaqa kapopa anta?” Isheetta ka kiite, “Nakayta'ewwen anni.”

²⁴ Ka harreeta qara koorricca harmisatte ka qara fayyatte ka orxaytaseti kiite, “Jarjartan qule ka hakan ke lelo maliiyyi ana malla in kidan ka lokkooti in qulan.”

²⁵ Ikka oori xaate ka irroota Qermeloosi qaropa namase a Waaqa kapopa ante. Namase a Waaqa ete laka desa isheetta akkeeyye, i'orxaytaadi Ki'asi kide, “Tin eeyye Sunaamitteetase'e deeniiy,

²⁶ turopa keere ka ishi kide, ‘Atta nakaytaawwe qapta? Diirtaayti nakaytaawwe? Innaatti nakaytaawwe?’” Isheetta ka oorisse ka kiite, “We piisa nakaytaaw.”

²⁷ Ka ete irroota qara nama Waaqa kapa kayteeyye, isha kela pi'ite ka loqqaadi qapte, Ki'asi ka isha quda pasissa de'e, nama Waaqa xoori iKi'asi kide, “Akata nyarrahateey, diishe. Waaqa xoori sede ana tura ijuute. Umma ana'en lelleey.”

²⁸ Isheetta ka kiite, “Hela in ke poqallaayyo qara inna qinsade? Anan sassapadan an kiine.”

²⁹ Elsa'i ka Ki'asi kide, “Kaappaatti opeela hiddado ka uleetiyyo harkoppa teyyado ka keere, ma oto nama ke mina de'oyye, nakayta qara in kaassadan, oto nama ke qara nakayta kaassanniiyyi, oppa in oorshan ka uleetiyyo fuula innooseneti tura xaaye.”

³⁰ Aayya opa innaseneti xoori ikiite, “Maxxa Waaqa isho maxxaaytinnin xaxanni, anti ke an diisho ka an aano!” Ikka xa'e ka isheetta olli aane.

³¹ Ki'asi ka ishootta tura qatte ka uleetase fuula innaseneti tura xaaye; ma xoori nessa innaseneti dakanni in co. Umma lehni in caan. Ki'asi ka Elsa'i kapopa tiitaawe tiitaawe ka ishi kide, “Innasene in xaane.”

³² Elsa'i ete tikase kayeeyye, inna a to'e ka eeyye alkaadi qara deraade'e akke.

³³ Ka ete kulleeyye, innasene isho isi tura xarra dufe ka Waaqopa qinsade.

³⁴ Ka innasene qara mukke ka afaadi afa innaseneti oppa qape ka ildaadi ilda innaseneti oppa qape ka harkaadi harka innaseneti qara qape, dakinta innaseneti ka foolsatte.

³⁵ Ikka xa'e ka tikase kelandesa tittitaawe ka amma alkasene qaropa fayyadeew ka innasene qara mukkeew. Innasene ka tappaan qishaden ka tooyyaden.

³⁶ Elsa'i ka Ki'asi hale ka ishi kide, “Aane ka Sunaamitteetase hale.” Ete deeteeyye, Elsa'i ka isheetta kide, “Innasene xaayti teyyado!”

³⁷ Isheetta ka kullite ka xata kiite ka loqqaadi kela pi'ite ka innasene xaadi qeette ka ishin sookte.

Wa orra qawwanna lakki a qoota damtati desa kodame

³⁸ Elsa'i ka a lammattati Kelkela opa tiitaawe. Sitiiyyi piitoseti loota ca. A olqapa xuumampaya kollissa qara cooyye, Elsa'i i'orxaytaadi kide, “Okkota kutta qara qa'e ka ishootta damta kode.”

³⁹ Xuumampayasene oppa takka ka mida piita poha'e, lakoppopa aane ka saartayta kappina akke ka qaraayye daltaadi pohe ka ohaatoppa immake ka ishin kale ka oppa quure ka damtase oppopa tuqe, ma xoori maana akka koddite nama takka nefo in upnaanne.

⁴⁰ Ka akka orrase damo'e, shaqen orrase ka ete damtase dama paayyeeyye, ullupe ka kidene, “Oo nama Waaqatiiyyi, damtose kara wa orra ikanna'e ca.” Ka damtase dama diishen.

⁴¹ Elsa'i ka ishootta kide, “Daamma ana daasha!” Ka damtase oppa tuqe ka kide, “Akka damane'e samayta daasha.” Umma damtase kara'e, wa orra ikanna in teyanne.

⁴² Kuyyaata pilaatiiyyi, nama takka a katama Pe'alshalsha ka laaqqota a poorta a qarpattoppa laaqqamte kunda lakki isho maanqa matta lamayta okoleetoppa qapade ka namase a Waaqati ishin de'e. Elsa'i ka orxaytaadi kide, “Samayta daashe ikka damo.”

⁴³ Orxaytase xaadi ka isha kaassade ka kide, “Hela attan koda ka sene nama dippa daasha?” Ma xoori Elsa'i i'ishi kide, “Akka damane'e samayta daashe. Maana malla Waaqa ikiini, ‘Idaman ikka kela hastaay.’”

⁴⁴ Ikka ishootta daashe, ikka damen ‘Akka Waaqa kide mina'e, ikka kela haste.