Mataafa a Nuqussa a lammatta 3 - Mataafa Qulqulloota

Oranna Isira'eeleta isho a Mo'apeta

¹ A nuqusa Yihuta Iyyosaafiti nuqusumeeyye para kudanka settattatiiyyi, Iyyoraami inna Aki'api samaariya'e kallaanni ka Isira'eeli qara'e, para kudanka lakki nuqusume.

² Isha fuula Waaqa tura'e juppoota kode, ma qoota killootase a aappaaysho kode pa'aali alle pashshe malla, juppootaadi a aappaaysho isho a aayyaasso koden mina in kitto.

³ Ma xoori juppootase a Iyyoorpi'aami a innasene a Naapaati kode ka ishin Isira'eeli akka juppoota kooto kode oppe qapame ka oppa in oorrin.

⁴ Mesha'i nuqusa Mo'api kahirra siksanni ka para mina haara kahirra kuma dippa ka nyirfa laahadda kuma dippa nuqusa Isira'eeliti kipira kalinni.

⁵ Ma xoori ete Aki'api to'eyye, nuqusase a Mo'api nuqusa Isira'eeliti piddama tiitteka torpini.

⁶ Sitiiyyi nuqusase Iyyoraami ka samaariyaayye xa'e ka Isira'eeleta piisa oranna xaashe.

⁷ Ka Iyyosaafiti nuqusa Yihuta kamma orra erke ka kide, “Nuqusa Mo'api ana piddama tiitte ka ana torpa heenaay, i'ana olli oranna tuulta?” Isha ka kide, “In tuula! Ana isho ke an takkan, orriyyo akka orraaayti mina, fartadaayyo kan fartadaatti mina.”

⁸ Ma xoori ikaassade ka kide, “Pora a xaamennen tuulla?” Iyyoraami ka kide, “Pora koommayta Etoomitinnin tuulla.”

⁹ Sekkammaayye nuqusa Isira'eeli ka nuqusa Yihuta isho a Etoomi olli orannaseneti tuula xa'e. Ete kuyyaata tappa aanen kammaayye, pisha a xela oranna isho horeeta afe'adene daashane dapen.

¹⁰ Nuqusase a Isira'eeli ka kide, “Oo ino kido! Hela Waaqa ino nuqussa sessa akka nuqusa Mo'api turopa ino tuukko malla olopa ino hale.”

¹¹ Iyyosaafiti ka kaassade ka kide, “Hela xuumampayta Waaqa an qudan Waaqa kaassanno are in co?” Saarrasene a xela oranna a nuqusa Isira'eeli oppa takka ka kide, “Elsa'i inna Safaati isase Eeliyaasi harka jaqno are ca.”

¹² Nuqusase Iyyosaafiti ka kide, “Nessa Waaqa isha kapa'en teyna.” Nuqusase Isira'eeli ka Iyyosaafiti isho nuqusa Etoomi ka isha kapopa lekkaden.

¹³ Elsa'i ka nuqusa Isira'eeliti kide, “Ino maanan olkapa qapna? Xuumampayasene a aappaayshina isho a aayyaassina kapopa aane.” Nuqusa Isira'eeli ka kide, “Inna! Ha Waaqa isha ino nuqussa sessa akka nuqusa Mo'api turopa ino tuukko'e, ollopa ino hale.”

¹⁴ Elsa'i ka ishi kide, “Maxxa Waaqase we piisa ettaninnooti isase an anti orxaytaadi koddennen xaxanni, kadin Iyyosaafiti nuqusa Yihuta'en an ulfeessini an kinnin kiite, kenefondesa an tooyyado; umma we kapa ke an diko.

¹⁵ Ma amma nefo nama kehayta dawno ana hala.” Namase kehayta dawno ete dawnooyye, hupna Waaqa ka Elsai qara lekkade.

¹⁶ Ikka kide, “Waaqa ikiini, ‘Are naabose piisa kara qaawwa qota.’

¹⁷ Waaqa ikiini, ‘Xayxayta a akkitan umma roopa a akkitan ma naabose pishaanne immakaada. Ishin ka okkayaassin isho horeetaayshin a pila kuli akka pisha iktan.’

¹⁸ Sede nefo fuula Waaqa tura wa a kella'en. Ikka Mo'apeta kuli ishin turopa tuukka.

¹⁹ Akka katamaddaasso a kapa kawwattan qorrame ka papaxxaara piisa poottan. Ka qoraasso a dalta dalla piisa quurtan ka ellaasso a pisha kuli alle kiyyitan ka dullaasso a papaxxaara dakaan immaktan.”

²⁰ Parraytaadi ete eta kalisoota kalissa kayteeyye, tin pora Etoomitixata pisha ka urrqini, piita ka pishaan immakaatte.

²¹ Sede turanne Mo'apeta piisa ka akkima nuqussa ishootta torpa de'en dakayte, nama a meeha oranna qapatta ettaninno a shakka isho a qime piisa ka ollopa xore ka tuule, ka xeela qara pora qapade.

²² Ete teykana paraappan xa'eneeyye, piirtota ka pishasene qara oorte, Mo'apeta tura'e pishasene ka a diika mina tiipinaaden ikka akkite.

²³ Ka olli kiite, “Sede diika, keeto nuqussasene oli torpen ka oli leyshen; semmalla Mo'apeteeyye anna ka safaraaysho saarra.”

²⁴ Ete Mo'apeta safara Isira'eeleta oppopa deteeyye, Isira'eeleta ka ishootta torpite ka putte, Mo'apeta ka turaayye qahate. Isira'eeleta ka Mo'apeta lesse ka qara pirte.

²⁵ Ka katamaddaasso kuli qitqitisse, nama piisa ka daka takka takka iskela qeede ka dullasene xaaysho papaxxaara dakaddaan immaken ka ella pisha piisa kiyyen ka qoraasso a dallta dalla piisa quuren. Katama Qiriheresi patta quda kawwattaadi ka haste. Xela kulluman torpino ka kapa mure ka isheetta kuli torpe.

²⁶ Nuqusase a Mo'api akkima oranna isha qara koopen ete akkeeyye, xela a koraatewwa hidade nama dippa tappa isquda qeede ka pora oppa nuqusa Etoomi co oppan tarpeeta ekkaysade, umma isha in koddine.

²⁷ Ikka innaadi a kuuta isase pakkaadippa nuqusumo qeede ka kawwatta katama qara'e kalisoota a kupannitto kode ka dehayshe. Isira'eeleta ka a kuttati miirootte ka alle kapa sekaatte ka piitaaysho oppa kalte.