Mataafa a Nuqussa a lammatta 23 - Mataafa Qulqulloota

Akka Iyyosiyaasi Waaqopa samayta tiitayshe

¹ Nuqusa ka qimoota a Yihuta isho a Yursaalami piisa kamma erke ka ollopa ishootta xaashe.

² Ka tika qulqulloota a Waaqa opa aane; isha olliiyyiiw samayta a Yihuta isho a Yursaalami piisa ka qeesewwa isho xuumampaya ka a qime isho a shakka samayta piisa ka sooke. Isha ka afa mataafase a seera Waaqa tika a qulqulloota a Waaqa kara teyade piisa ishootta nappape ikka dakkaysaden.

³ Nuqusa ka tuudase kapa qa'ade ka akkima Waaqa kamma aano ka ajajaadi ka tampeetaadi isho taantetaadi karitta piisa ka isi piisan tooytaado'e ka akkima kodayteeta mataafose kara taafamte kokkonnaysho'e, fuula Waaqa tura kodayteeta haarayaysade ka kodade; samaytase piisa ka asseew kodayteetoseti xasa daasade.

⁴ Nuqusa ka Hilqiya qeesittase kutta ka qeesewwa saaruman isha kamma qate isho orra xarra tika Waaqa tooytino ajaje ka kide, “Meehase a Waaqaysatta a pa'ali ka a asheera isho a hiikka moontati piisa tika qulqulloota a Waaqa kelaayye sooksha.” Ka oori Yursaalamiiyyi laka tulanne, meehase naabba a qedrooni kara kupe ka taraadi Petelipa haade.

⁵ Ka akka porrasene a sakatatta kunkunnawwa a katamadda Yihuta isho a Yursaalami kapandesa ca qara'e, tankarta qayyayshane'e qeesewwasene a nuqussa Yihuta shuumadene alle daane ka akkimoose mina'ew a killanna pa'aali ka a piirtota ka a leya ka a puusa isho a hiikka moonta piisa tankarta qayyanna alle daaneew.

⁶ Ka olahitta a asheera tika qulqulloota a Waaqa kela sookshe ka Yursaalamiiyyi laka tulanne, naabba a Qedrooni kara kupe ka yooqe ka nukkullayshe ka taraadi hawlalla samayta qarandesa fide.

⁷ Ka tika qulqulloota a Waaqa kelaayye kaataddasene a iskatta karaayye killoota asheerati kaarranta dawna isho kaataddasene a sharmuutta a tikka killowwa alle qitqishe.

⁸ Ka qeesewwa a katama Yihuta kara ca piisa sookshe ka Yursaalamipan aane ka Kepaa'i paayyatte haka Persaapeti porrasene a sakatatta a kunkunnawwa qara ca a qeesewwa qara tankarta qayyannaane alle pashshe ka xarra katamaatiiyyi qinda pittittatin xarrase a mukissampayta katama a Iyyaasu kapaayye porrasene a sakatatta a xarradaseneti alle qitqishshe.

⁹ Qeesewwa porrasene a sakatatta kunkunnawwa qara caati kadi punu poqase a kalisoota a Waaqa Yursaalami kara co qara koda kooni in kinnin nefooyye, akkima a qeesewwasene a pila mina'ew laaqqota a kara haddaya in qapnini dammi.

¹⁰ Nuqusa ka akka arepadesa nama takka nefo innaadi taaki enentaadi kalisoota kupannitto in koonin ka moleki in kalinnini'i, naabba Hinoomi karaayye porase a kalisoota toofeti kidammo alle nyalsheew.

¹¹ Ka fartadasene a nuqussa a Yihuta killoota piirtotati daashene alle pashshe ka sarakelladda killootose a piirtota alle kupe. Ishootta turanne tika saara takka Natan meleki kidammo isho xarra tika qulqulloota a Waaqa kapaayye caan.

¹² Ka poqaddasene a kalisoota tika Akaasiiyyi tula qara ca a nuqussa Yihuta qaatishene ka paapahase lakki tika qulqulloota a Waaqati otantoppa ca oppa'e, poqaddasene a kalisoota a nuqusase Minaase kode alle pootacciise ka qitqishshe ka musqannaadi naaba Qedrooni karopa alle tuqe.

¹³ Ka Yursaalamiiyyi qinda piirtotatin ka kunkunnawwa nyalaatiiyyi qinda tupattatin porrasene a sakatatta kunkunnawwa qara ca a Selemooni nuqusa Isira'eeli Astaarooti iskatteeta a waaqa piita Sitoonati ka kamooshi waaqa piita Mo'apiti isho moleki waaqa piita Amooniti kode alle poote.

¹⁴ Ka dakaddasene deddera oppa faate ka olaahiyya asheera alle quure ka porroosen lafa orra le'etin immake.

¹⁵ Ka porrasene a kalisoota a Iyyorpi'ami inna Napaati isase Isira'eeli saanta Waaqa qara maqqishe kode qitqishe. Ka asseew porase a sakatatta kunkunnaata Peteli qara ca alle poote ka dakaddaadi alle pappaqshe ka yooqe ka nukkullayshe ka olahitta asheera alle kupe.

¹⁶ Iyyosiyaasi ka tiitaaweew ka hawlalla kunkunnawwa qara ca akke ka orra erke ka hawlallasene kara lafa pootacciise; ka porrasene a kalisoota qara kupsiise ka nyalshe. Sede nefo xatta kuyyaata xaysonessumaatiiyyi awta Iyyorpi'ami kalisoota kapa qa'adeeyye afasene a nama Waaqa haasawade akka qaaleta Waaqa qara dikkatto malla asse koddite. Ikka tiitaawe ka hawlase a nama Waaqa a xuumose haasawade akkeew.

¹⁷ Ka kaassade ka kide, “Ini hawla ayno?” Orra katamooseneti ka ishi oorshe ka kide, “Ha ini hawlase a nama Waaqa Yihutaayye de'e ka wossene a amma koote akka poqase a kalisoota a Peteli qara koddane'e xuuma haasawadeeti.”

¹⁸ Iyyosiyaasi ka kide, “Diisha! Hawloose karaayye nama lafa namooseti in qappannin.” Ikka oori lafa namooseti isho a xuumampaytase samaariyaayye de'eti eyye diishen.

¹⁹ Iyyosiyaasi ka akka Peteli qara kode mina'e, Samaariya karaayye porrasene a sakatatta kunkunnawwa qara ca a nuqussa Isira'eeli Waaqa miirassa kodene alle pashshe.

²⁰ Ka qeesewwasene a porroosen a sakatatta kunkunnawwa qara ca piisa qeede ka poqaddasene a kalisoota qara ishootta leyshe ka poqaddosen a kalisoota qara'ew lafa orra le'eti apittan kupe ka oori Yursaalamipa tiitaawe.

Akka Iyyosiyaasi xaysonessuma a qaran tarpeeta ulfeesse

²¹ Nuqusa ka samayta piisa ajaje ka kide, “Akkima mataafose a kodayteeta Waaqa qara taafamte mina'e, Waaqa Poqallaassina'e xaysonessuma a qarantarpeeta koda.”

²² Umma anda a tanynyadasene Isira'eeli muksheeti paayyatte ka parra a nuqussa Isira'eeli isho a Yihuta mukshene piisa karaayye, xaysonessuma a qarantarpeeta asse paha apari in ulfeessamme.

²³ Ma xoori a Iyyosiyaasi nuqusume para kudanka settattatiiyyi xaysonessuma a qaran tarpeeta a asse paha'e Yursaalami kara Waaqa ulfeessame.

Pursama a pila a Iyyosiyaasi kode

²⁴ Qaaletase mataafase a seera Waaqa a qeesittase Hilqiya tika qulqulloota a Waaqa kela teye akka koda qara nakayto'e, Iyyosiyaasi a kaarayyadda haleena ka so'aya ka killanna toolla ka killanna isho wa nyale a piita Yihuta isho Yursaalami kara akkaade piisa alle pashshe.

²⁵ Umma akka seera Muuse qara taafamte mina'e, nuqussa isha turopa ca ka a isha kamma xa'e oppaayye akka nuqusase Iyyosiyaasi mina'e a karittaadi pisanne ka dikattaadi pisanne isho hupnaadi pisanne Waaqopa tiitaawe in co.

²⁶ Ma xoori kodaddasene neeqa a Minaase kode ka ishin Waaqa tanayshe minanne miirase a Waaqa Yihuta qara opaye ka orra fuurinno sitiiyyi ata in harfine.

²⁷ Waaqa ka sede minan kide, “Akkan Isira'eeli isi kapa sekayshe mina'en Yihuta kuli iskapa sekaysha ka katamoosen are ca an reexade a Yursaalami an kide, ‘Maxxiyyo kara halaama.’ Ka tikase xayyo a qulqulloota kuli alle diisha.”

Akka xelta Iyyosiyaasi dikatte

²⁸ Wa a ata hase a Iyyosiyaasi kode piisa mataaffa torra a nuqussa Yihuta kara'e taafamen.

²⁹ Sapana Iyyosiyaasiiyyi nuqusa takka a Kipsi Nekko kidammo nuqusa Asoori qaarqaara'e kirra Efraatisi opa tuule. Iyyosiyaasi ka isha torpa tuuleew, a oli torpinaaneeyye Nekko ka Mekido kara isha ishshe.

³⁰ Orxayaadi ka Mekido kara pukkaadi qeeden ka sarakella qara fee'en ka Yursaalamipan kalen ka turkaadi oppa isha mooken. Samayta Yihuta ka innaadi Iyo'akaasi reexe ka pakkaadippa nuqusumshe.

Iyo'akaasi nuqusa Yihuta

³¹ Iyo'akaasi a Yihuta qara nuqusumooyye paraadi kunda lakki sessa. Ikka Yursaalami kuti'e ka leya sessa mukshe. Aayyaasso Hamutaali kidammi; isheetta enenta Ermiyaasi a nama piita Lipina.

³² Isha akka aappadaasso a xatta mina'e, fuula Waaqa tura wa neeqa kode.

³³ Nuqusa Kipsi Nikaa'u ka akka Yursaalami kara in nuqusummini'i, piita Hamaati karaayye katama Ripila kara isha hide ka Yihutaata qara'e, dakara pirreeta mekliteeta dippa takka ka warqeeta mekliteeta takka akka kapparto kipira qara kate.

³⁴ Nuqusa Kipsi Nikaa'u ka pakka Iyyosiyaasi oppa'e, inna Iyyosiyaasi Eliyaaqemi nuqusumshe. Ka maxxaadi kuli purshe ka “Iyyo'aqeemi” Kide ka hale ka Iyo'akaasi qeede ka piita Kipsi opan aane ikka eyye to'e.

Iyyo'aqeemi nuqusa Yihuta

³⁵ Iyyo'aqeemi ka pirrewwa isho warqewwasene a Nikka'o nuqusa Kipsi kipira kaassade xaffalli ka akkima samayta piitaaysho qara kapparo kode; nama ka teyanta a qapo mina kitto qaraayye pirreeta isho warqeeta kapparri.

³⁶ Iyyo'aqeemi a Yihuta qara nuqusumooyye paraadi kunda lakki keni. Ikka Yursaalami kuti'e ka para kudanka takka mukshe. Aayyaasso Sepita kidammi. Isheetta nefo enenta Petayya a nama katama Ruuma.

³⁷ Iyyo'aqeemi ka akkima aakkadaasso a xatta mina fuula Waaqa tura wa neeqa kode.