Mataafa a Nuqussa a lammatta 22 - Mataafa Qulqulloota

Iyyosiyaasi nuqusa Yihuta

¹ Iyyosiyaasi a nuqusummooyye paraadi sette'ew ikka Yursaalami kuti'e ka para kunda sessa takka mukshe. Aayyaasso Yidiidda kidammi, isheetta enenta Ataayya a nama katama Posiqaati.

² Isha fuula Waaqa tura'e wa paxaara kode; ka saanta aakkaaysho a xatta a Taawwiti oppan aane umma akkitta isho pittittopa in kiine.

Akka mataafa seera Waaqa teyade

³ Nuqusase Iyyosiyaasi a nuqusume para kudanka settattatiiyyi, Safaani taafittase a tika mankisteeta oopaase a Meshulaami inna Asaaliya tika qulqulloota a Waaqa opa erke.

⁴ Ka ishi kide, “Hilqiya qeesittase kutta kapopa aane ikka tooytampaya a tika Waaqa kaaja samayta qara pohene ikka tika qulqulloota a Waaqa opa kalene meeqa akkima kaynaan diko.

⁵ Ikka harka orrase tika qulqulloota harmissa shuumame oppa daasho; ishootta ka turaayye orra tika qulqulloota a Waaqa harminno ka qupno xaffalen.

⁶ Ka akkimose mina'ew, harmoota qora laajnitto ka qupeeta qupnitto isho a dakadda xefnitto xaffalen; ka tikase a qulqulloota harmissa'e, asseew qora isho dakadda xefameetin pidden.

⁷ Orrase tika qulqulloota harmissa shuumame nefo qoota amanammaan malla, ishootta qara tooyeta parpaacciisni in kitto.”

⁸ Hilqiya qeesittase kutta ka Safaani taafitta kide, “Ha tikase a qulqulloota a Waaqa kela'en mataafase a seera Waaqa teye.” Ka Safaani daashe. Isha ka qara qeede ka nappape.

⁹ Ka nuqusa kapopa aane ka ishi kide, “Orrase tika qulqulloota harmissa shuumame, kaajasene a tika qulqulloota a Waaqa iqeeden ka orrase tika qulqulloota kela koda kodacciisno daashen.”

¹⁰ Ka nuqusa kideewwe, “Tin Hilqiya qeesittase kutta mataafose ana daashe.” Ka nuqusa tura nappape.

¹¹ Nuqusa ka ete nessa mataafa seera Waaqa dakayeeyye, mehadda isquda kakkaa'e.

¹² Ka Hilqiya qeesitta ka Ahiqaami inna Safaani ka Akapoori inna mikaaya ka Safaani taafittase a tika mankisteeta isho Asaayya orxaytase xaadi isha quda deha ajaje ka kide,

¹³ “Aappadaanno wa mataafose kara taafame koda qara nakassa'e, qoota nessa mataafoseti in ajajammin malla miira Waaqa a ino qara opaye akata kuttiiy, aana ka qootiyyo ka qoota samayta isho qoota Yihuta piisa malla qaaleta a mataafose kara taafamte desa Waaqa kaassada.”

¹⁴ Qeesittase Hilqiya ka Ahiqaami ka Akapoori ka Safaani isho Asaayya ka xuumampayteeta takka Hulda kidammitto a diirtaadi Shaalumi kidammo oopa Aharhasi inna Tiqiwa a ohawwa tooytino kapopa aanen ka isheetta haasawsiisen. Isheetta nefo Yursaalami karaayye kanta a lammatta oppa kalta.

¹⁵ Isheetta ka ishootta kiite, “Waaqa Poqalla a Isira'eeli ikiini, ‘Nama ana kapopa ishin erke lela ka kida,

¹⁶ “Waaqa ikiini, ‘Mataafose a nuqusa Yihuta nappape kara'e, akka taafamte qara'en porose are co isho orra kara kalo qara erkkannaata qeeda.

¹⁷ Qoota alle ana diishen ka killanna a harkan kodeneetin ana miirayshen ka killannoseneti tankarta qayyayshen malla miiriyyo porose qara'e opaya diisheey in harfo.”

¹⁸ Ma xoori nuqusoose a Yihuta isase akka ana Waaqa kaassattane'e ishin erke kida, “Waaqa Poqalla a Isira'eeli wossen a dakayte malla ikiini,

¹⁹ “Porose are co isho orra piisse oppa kalo qara akkima jiija ka pateeta kayto nessa an haasawade ete dakayteeyye, qoota karittaayti qappatame akka fuuliyyo tura issi jeerisse ka mehadda isquda kakkaa'ite ka pooyte malla, Waaqa ikiini, ‘Anti in ke dakaye.’

²⁰ Semmalla anti akka nakaytan tooto ka hawlamton koda. Umma rakkootan piisse are kitto qara qeedo a akkito.” Ishootta ka wa isheetta kiite qeeden ka nuqusa kapopa tiitawen; ka erkanoosen ishi lelen.