Mataafa a Nuqussa a lammatta 20 - Mataafa Qulqulloota

Akka Hisqiyaasi paaqe ka dine

¹ Sitiiyyi Hisqiyaasi a kuttati'i paaqe ka toota foolsade. Inna Amoosi xuumampaytase Issayyaasi ka isha kapopa aane ka ishi kide, “Waaqa ike kiini, ‘Itoota diisheey a dintooy, tikaayti olkela oorsado.’”

² Hisqiyaasi ka fuuladi qussopa oorshe ka Waaqopa qinsade ka kide,

³ “Oo Waaqqo! akkan amanteeta ka karitta immakkootan fuulaayti tura kallaade ka wa ke xasanna kode dikado.” Ka a kuttati pooye.

⁴ A Issayyaasi tikase a mankisteeta karaayye paapahase a otanta in tarpininiiyyi, nessa Waaqa ka isha kapopa de'e ka ishi kide,

⁵ “Tiitaawe ka saarase a samaytiyyo Hisqiyaasi kide, ‘Waaqa a aakkaayshina a xatta a Taawwiti ikiini, “Qinsetaayti in dakaye ka ilmaamaatti akkeey, tin in ke dinsha; akka kuyyaata sessattatiiyyi tikiyyo a Waaqa opa deeta;

⁶ anka paraayti qara'e, para kudanka ken ke padaawa; ka harka nuqusa Asoori kelaayye ke isho katamoosenen paha; anti ulfeeniyyo malla ka kippeeta an orxaytiyyo Taawwiti daashe mallan kida ka katamoosenetin pahada.’”

⁷ Issayyaasi ka kide, “Qoomayta hilteeta a laaqamen ana xooya.” Ikka ishin de'en ka qappaaja Hisqiyaasi qara ishi koden ikka dine.

⁸ Sede turan Hisqiyaasi ka Issayyaasi kaassade ka kide, “Akkima Waaqa ana dinsho anka kuyyaata sessattati tika qulqulloota a Waaqa opa aano milikkitaadi maana?”

⁹ Issayyaasi ka ishi oorshe ka kide, “Waaqa akkima wa haasawade kodo milikkita a Waaqa kapa ke koddo sede. Hela akkima kattillayta itturandesa fayma kudan aano heentam, a iskammandesa fayma kudan ooro heenta?”

¹⁰ Hisqiyaasi ka kide, “Oton kattillayta fayma kudan itturandesa anniiyyi we'en ma, a fayma kudan iskammandesa ooro.”

¹¹ Xuumampaytase Issayyaasi ka Waaqopa qinsade; Waaqa ka faymase a Akaasi kode qara xata kattillaytase tarpe iskammandela fayma kudan oorshe.

Orra Paapilooniiyyi erkame

¹² Sitiiyyi inna nuqusa Paapilooni a Palataani, Merodaaki palataani ka akka Hisqiyaasi paaqe dakaye ka taaptaappewwa isho daassata ishi erke.

¹³ Hisqiyaasi ka xasan orrase teyyade ka wa tikaadi a meeha kela ca piisa pirrewwa ka warqewwa ka qimaamewwa ka sayteeta kokkoka meeha a oranna isho wa tikka meeha a ata hase kela ca piisa ishootta akkishe. Umma tikaadi a mankisteeta isho piitaadippaayye wa ishootta akkissa diishe takkan nefo in caan.

¹⁴ Xuumampaytase Issayyaasi ka Hisqiyaasi kapopa aane ka ishi kide, “Orroose ayshaayye de'e ka maana ke kide?” Isha ka ishi oorshe ka kide, “Piita Paapilooni a sekati de'en.”

¹⁵ Issayyaasi ka kide, “Tikaayti a mankisteeta kara maana akken?” Hisqiyaasi ka ishi kide, “Tikiyyo amankisteeta kara we piisa akken umma tikiyyo a meeha karaayye waan ishootta akkissa diishe in caan.

¹⁶ Issayyaasi ka Hisqiyaasi kideewwe, “Afa Waaqa dakaye.”

¹⁷ Waaqa ikiini, ‘Wa tikaayti a mankisteeta kara ca isho wa aappadaassin a xatta haka awweti ollopa tuulene piisa eta oppaayye Paapiloonipa qeedamane de'a; umma we takkan nefo kela in hasan.

¹⁸ Ka hellaa ke kara dalanna a atti xaayte kuli poojan ikka tika a nuqusa Paapilooni karaayye kunaya koddan.’”

¹⁹ Hisqiyaasi ka Issayyaasi kide, “Afoosen a Waaqa a haasawatte ipaxaari;” Sede nefo qoota dikade ka kide, “Oto anddaayyo oppaayye nakayta co piita ka fayya qaptooyye isheetta qaapissa” malla.

Andada Hisqiyaasi akkima dikkaden

²⁰ Wa a ata hase a Hisqiyaasi kode piisa, xormumaadi ka akkima katamaappa harta qote ka piita kelan pisha oppopa qeede, mataaffa torra a nuqussa Yihuta qara'e taafamen.

²¹ Hisqiyaasi ka to'e; innaadi Minaase ka pakkaadippa nuqusume.