Mataafa a Nuqussa a lammatta 2 - Mataafa Qulqulloota

Akka Eeliyaasi moontopa qeedame

¹ Ete Waaqa puppeetan moontopa Eeliyaasi qeeda fadeeyye, Eeliyaasi Elsa'i olliiyyi katama Kelkelaatiiyyi anta xa'e.

² Ka Elsa'i kide, “Waaqa katama Peteli opa ana erkeey, atti are tawe!” Elsa'i xoori i'ishi kide, “Maxxa Waaqa isho maxxaaytinnin xaxanni! Ke kapa an ma'o!” Ka Petelipa ollin lekkaden.

³ Sitiiyyi, olqapa xuumampaya a peteli kara co ka Elsa'i kapopa de'e ka isha kide'e, “Hela awwe Waaqa akkima poqallaatti ke kapa qeedo i'upta?” Isha ka ishootta kide, “Aa, in upaay ishina jaw kida.”

⁴ Eeliyaasi ka Elsa'i kideewwe, “Waaqa katama Iyyaarko opa ana erkeey, atti are tawe.” Elsa'i ka ishi kideewwe, “Maxxa Waaqa isho a xaaytinnin xaxanni! Ke kapa an ma'o!” Ka Iyyaarkopa ollin aanen.

⁵ Olqapa xuumampaya a katama Iyyarko kara co ka Elsa'i kidene, “Hela awwe Waaqa akkima poqallaati ke kapa qeedo i'upta?” Isha ka ishootta kide, “Aa, in upaay ishina jaw kida.”

⁶ Sekkammaayye, Eeliyaasi ka Elsa'i kide, “Waaqa kirra Yurtaanoosi opa ana erkeey, atti are tawe.” Elsa'i ka ishi kideewwe, “Maxxa Waaqa ka a xaaytinnin xaxanni! Ke kapa an ma'o!” Ka oori lamatti ollin aanen.

⁷ Olqapa xuumampaya nama kunda keni ka aane ka porase a Eeliyaasi isho Elsa'i kirra Yurtaanoosi kapa oppa qa'adeneeyye lakadesa qa'ade ka ishootta tooyni.

⁸ Eeliyaasi ka isquda kaappa sookshe ka ollopa marre ka pishasene oppan dayshe; pishasene ka qinda qindopa qootamen, ikka lamatti piita kokteppan tuullen.

⁹ Ete tuullen kammaayye, Eeliyaasi ka Elsa'i kide, “Ke kapa an qeedammin turanne, wa an ke koda a heenta kaassado!” Isha ka kide, “Akkan pakkaaytippa kodaayti kodo'e, hapuraayti akka ana qara harka lakki koddo'en faani.”

¹⁰ Eeliyaasi ka ishi kide, wa kokkoka'e kaassatte, a koddito ma oton ke kapa qeedammo akka ana akkitooyye, ike koddita. A taakiti in koddito.”

¹¹ Ete annaan ka ollin torraannaaneeyye, a isqara in upniniiyyi sarakeella apitta isho fartada apitta'e otantaaysho karopa kale ka olkela ishootta qoote. Eeliyaasi ka oori puppeetan moontopa qeedame.

¹² Elsa'i ka sede akke ka ullupe ka kide, “Oo aappo! Aappo! Sarakeelladda isho fartada a Isira'eeli umma kammaayye isha in akkine. Ka mehaddaadi a kalsade lakki kaa'e.

¹³ Ka kaappasene Eeliyaasi qara pi'e qeede ka tiitaawe ka kirra Yurtaanoosi kapa qa'ade.

¹⁴ Ka kaappasene Eeliyaasi qara pi'e qeede ka pishasene oppan dayshe ka kide, “Ata Waaqa Poqalla Eeliyaasi aysha ca?” Ete pishaasene oppan daysheeyye, pishasene ka qinda qindopa qootamen, Elsa'i ka tuulle.

¹⁵ Olqapa xuumampaya a Iyyaarkooyye de'e ete sede akkeneeyye ikidene, “Ha hapurase Eeliyaasi qara co Elsa'i qara'e lekkade.” Ka isha turopa aanen ka xata kiden ka fuula piitan kayen ka ishi kaareeta oorshen.

¹⁶ Ka ishi kidene, “Ino orxayaatti tin orra kokokkoka kunda kenin are qapnaay, takka punu hapura Waaqa Poqallaatti qeede ka irroota qara taaki naaba kara lekkishe kodditaay, a aanen ka pora faden.” Isha ka ishootta kide, “Inna! ishootta in erkan.”

¹⁷ Ishootta xoori qoota haka ishi dappaawnitto'e isha kitteessen malla, i'ishootta ikide, “Erka.” Ikka namase kunda ken erken ikka haka kuyyaata sessaati'i pora isha faden ka dapen.

¹⁸ Ka oori Elsa'ise Iyyarkooyye co kapopa tiitaawen. Isha ka ishootta kide, “Turanneew ishina an kiine, ‘In annini'i!”

Daxxowwa lakki a Elsa'i kode

¹⁹ Orra katamooseneti ka Elsa'i kide, “Tin poqallaanno! Akka akkinitto mina'e, kallaata katamooseneti ipaxaari, ma xoori pishaadi ineeqi. Umma piitaadi unta palanni in kitto.”

²⁰ Isha ka ishootta kide, “Okkota ammayteeta kela sookitta kata ka ana ishin xooya.” Ikka isha ishin de'en.

²¹ Isha ka pora oppa paada pisha co oppopan aane ka sookitta oppa tuqe ka kide, “Waaqa ikiini, ‘Anti pishoosen in me'ayshe, arepadesa toota in qeedan, umma piita nefo akka unta in palannin in kodan.’”

²² Akka Elsa'i kide mina'e, haka awweti pishasene ka harmisamen.

²³ Sekammaayye Elsa'i ka Iyyaarkooyye xa'e ka Petelipa anni, a poroppa cooyye hellaa diira lekaya ka katama kara sooken ka isha kojeessini ka kiini, “Moololayto are kara sooke! Moololayto are kara sooke!”

²⁴ Isha ka iskammandesa tooyyade ka maxxa Waaqatin ishootta jiije. Akkoottewwa pinaana lakki ka mura kara sooken ka ishoottoppa hellaa kunda afuri lakki kakkaa'en.

²⁵ Isha ka irroota Qermeloosi qaropa fayyade ka sekkammaayye Samaariyaapa tiitaawe.