Mataafa a Nuqussa a lammatta 18 - Mataafa Qulqulloota

Hisqiyaasi nuqusa Yihuta

¹ A Hoosei inna Eella Isira'eeli qara nuqusume para sessattatiiyyi Hisqiyaasi inna Akasiyaasi Yihuta qara'e nuqusume.

² A nuqusummooyye paraadi kunda lakki ken. Ikka Yursaalami kuti'e ka para kunda lakki sakal mukshe. Aayyaasso Apiya kidammi. Isheetta nefo enenta Sakkariyaasi.

³ Isha akkima a akkaaysho a xatta Taawwiti kode mina'e fuula Waaqa tura wa paxaara kode.

⁴ Ka porrasene a sakatatta kunkunnawwa qara ca alle pashshe; ka dakadda deddera pappaqshe ka olaahiyya asheera alle quure; ka qoota Isira'eeleta haka kiseesetiti isha sakatannitto malla, maakaase a sipla poora a Muuse kode oppa mooje ka maxxaadi “Nehushitaan.” kide ka hale.

⁵ Ka Waaqa Poqallasene a Isira'eeli kippade, umma isha turopa ka isha kammaayye nuqussa Yihuta oppaayye a isha paho in kinnaanne.

⁶ Ka Waaqa quda koke umma isha kamma iskammopa in oorre; ka ajajaddasene a Waaqa Muuse daashe tooytaade.

⁷ Waaqa ka isha olli caade, wa koona piisa ka ishi olkela teyen. Ikka nuqusa Asoori falqe ka ishi kappara tiite.

⁸ Ka Filisteemeta torpe ka pute ka haka xeela katama Kaasaati'i katamadda shashakka apoqa tooya qapaati paayyatte haka katamadda kukutta a kapa kawwattan qorrameeti piita piisa ishootta qara qeede.

⁹ A Hisqiyaasi nuqusume para afrattati ka a Hoose'i inna Eella Isira'eeli qara nuqusume para tappattatiiyyi, Selminasoori nuqusa Asoori katama Samaariya opa oranna tuule ka isheetta kapa mure.

¹⁰ Para sessa kammaayye a Hisqiyaasi nuqusume para lehattati ka a Hoose'i Isira'eeli qara nuqusume para sakalattati Samaariya qara pire.

¹¹ Nuqusa Asoori ka Samaariya pute; ka Isira'eeleta pooje ka Asooripa kotaanshe; ka katamadda Halaahi ka a Hoosaani kirra Hapoori kapaayye isho katama a orra Metooni oppa ishootta kutiishe.

¹² Sede nefo qoota ishootta qaaleta Waaqa Poqallaassoti in dakaynin ka kodayteetaadi pooten ka wa orxaytase a Waaqa Muuse ajaje in dakaynin ka in koonin malla.

Akka Asoorata Yursaalami torpeeta nyarte

¹³ A Hisqiyaasi nuqusume para kudanka afrattatiiyyi, Senakiremi nuqusa Asoori katamaddasene a Yihuta kawwattan kapa qorrame pisa torpe ka qara pire.

¹⁴ Semmalla Hisqiyaasi ka nuqusa Yihuta ka Senakiremi nuqusa Asoori isase Laakiishi kara safarepa erkana erke ka kide, “Ana ishin dapeey, ana qara tiitaawe ka wa ana qara kaassannitta pisan ke daashaay.” Nuqusa Asoori ka akka nuqusa Yihuta Hisqiyaasi mekliteeta dakara pirreeta dippa sessa ka warqeeta mekliteeta kunda sessa ishi daasho isha kaassade.

¹⁵ Hisqiyaasi ka sipla dakara tika qulqulloota a Waaqa isho a tika mankisteetaatiiyyi kinjapeeteta kela kitto piisa ishi daashe.

¹⁶ Nuqusa Yihuta Hisqiyaasi ka tika qulqulloota a Waaqa karaayye warqeeta xarrada quda kitto isho isase a mattaadi qora a xarra quda jajaqqalshe pupuqqishe ka nuqusa Asooriti erke.

¹⁷ A koddito ma, nuqusa Asoori ka Laakiishi desa Saaraadi a xela oranna a pisa qara saarummo ka saara a mankisteeta a kutta isho saara a dehaamampaya a nuqusa a xela oranna a kutta ollin Hisqiyaasi nuqusa Yihuta kapopa Yursaalamipa erke. Ishootta ka de'en ka Yursaalami kayen ka kaba hartase ela qatto kapa qa'aden. Kaboose nefo pora dula a aappase ohawwa diipno oppanne tarpini.

¹⁸ Ka nuqusa kamma orra erken; mukissampayta a tika mankisteeta Eliyaqimi inna Helqiya ka taafitta a tika mankisteeta Shepinna isho salissampayta a tika mankisteeta Yo'ahi inna Hasaafi ka ishootta turopa sooken.

¹⁹ Saara a dehaamampaya a nuqusa ka ishootta kide, “Hisqiyaasi kida, nuqusase a Asoori kutta ikiini, ‘Ayno qara'e kippese xaayti xaayatte?

²⁰ Hela nyaanynyeta afaatti a ookuma ka hupna oranna ke koddane ke pahata? Hela ayno kippatte ka asse ana falqite?

²¹ Tin atti, kippeeta xaasha feejame pahato kippanni. Oton ishinni xalissanniiyyi, iqepni ka harka nama donni. Nuqusa Kipsi Feri'ooni kuli a isha kippannaati asseew.

²² Oton ikkiinittane, Waaqa Poqallaannon kippanninnaayye, ishanne a Hisqiyaasi turaayye porrasene a sakatatta ka a kalisoota kunkunnawwa qaraayye ca alle poote; ka orra Yihuta isho a Yursaalamiti kiino, poqase a kalisoota Yursaalami kara co patta tura sakatada.’

²³ Semmalla amma intoonno poqallaayyo nuqusa Asoori oli nyaraay! Oton i'orra ishin kulufo teyniiyyi, anti farta kuma lakkin ke daasha.

²⁴ Oton fartada isho sarakelladda a Kipsi'i kippanniiyyi, saarra xela oranna a poqallaayyo oppaayye a shakka nefo tura'e atta qa'atta?

²⁵ Hela amma an fiqaata Waaqa mali piisse torpeeta ka patissa de'e ke pahata? Ha Waaqa isha mattaadi ana kide, ‘Piisse torpe ka pashshe.’”

²⁶ Elyaqemi inna Helqiya ka Shepinna isho Yo'ahi ka saarose a dehaamampaya a nuqusa Asooriti kidine “Ino in dakayninnaay, atara ino orxayaatti'i afa a Sooriyaatin haasawado diisheey afasene a Ipru a orrase kawwatta qara co dakaynaatin ino in haasawadan.”

²⁷ Saarase ka oorshe ka ishootta kide, “Hela poqallaayyo akkan sede ishin isho poqallaassin patta haasawado'e ana erke? Hela sene kawwatta qara ca ka ishin olli utaasso dameeta ka sindaasso ikeeta ca kuli haasawatta an deene?”

²⁸ Saara a dehaamampaya a nuqusa Asoori ka qa'ade ka nessa kuttishe ka afa iprutin haasawade ka kide, “Nuqusase kutta a Asoori wa kiina dakkaysada.

²⁹ Nuqusa ikiini, ‘Hisqiyaasi ana kela ishinan paha in ettanshooy, ishinan sassapannin.’

³⁰ Hisqiyaasi sede a haasawanno ka kiino, ‘Waaqa dukaatanne inon paha umma nuqusa Asoori katamoosen ino qara in qeedo’ Ka akka Waaqa kippattane ishin dehaammo in teyyadan.

³¹ Hisqiyaasi in dakayan. Nuqusa Asoori ikiini, ‘Ana olli araarama sooka ka harka daasada! ka matta mattanne wayneetaayshin ka hilteetaayshin dama ka ellaassin oppa pisha ika.

³² Sede nefo hakan anti deeno ka piitase xaayshin pahato a oppaayye unta ka taadeta wayneeta ka laaqqota ka dishma wayneeta ka qora ekerta isho takma caan oppopa ishin qeenno kara'e koddita. Ishina toota kapaayye caatta reexada. Oto Hisqiyaasi kiino, “Waaqa i'inon pahaayye’ Isha qara an teyyadan.

³³ Hela waaqadda a piita pila oppaayye, a xaamo nuqusa Asoori kela piitaayshotin pahe?

³⁴ Hela waaqadda a Haamaati isho a Arfaati ayshaayye caan? waaqadda a Safarwaaymi ka a Hena'ina isho a Iiwa ka ayshaayye caan? Waaqadda a samaariya ayshayye caan? Hela i'ana kela piita samaariyaatin pahene?

³⁵ Waaqadda piitaddooseneti oppaayye a xaame ana kela piitaayshotin paha ettanshe? Xawwi Waaqa atta ana kela Yursaalamin paha ettansha?’”

³⁶ Qoota nuqusa turan samayta kide, “Isha mina we in kidan.” Malla samaytaka di'i kide umma oppa in oorinne.

³⁷ Mukissampaytase a tika mankisteeta Eliyaqimi inna Helqiya ka taafitta a tika nuqusa Hepinna isho salisampayta a tika nuqusa Yo'ahi inna Hasaafi ka mehaddaasso isquda kakkaa'en ka Hisqiyaasi kapopa kalen ka wa saara a dehaamampaya a nuqusa Asoori ishootta kide ishi torren.