Mataafa a Nuqussa a lammatta 16 - Mataafa Qulqulloota

Akaasi nuqusa Yihuta

¹ A Faaquhe inna Remaaliya nuqusume para kudanka tappattatiiyyi Akaasi inna Iyyo'atami Yihuta qara'e nuqusume.

² A nuqusummooyye, paraadi kunda lakki. Ikka Yursaalami kuti'e ka para kudanka lehi mukshe. Isha akkima aakkaaysho a xatta a Taawwiti mina'e fuula Waaqa Poqallaadi tura'e wa paxaara in koone;

³ Saanta nuqussa a Isira'eeli oppanne aane. Ka akkima nyalaasene a orra Waaqa amanni in kinnini isasene a Waaqa fuula Isira'eeli tura alle daane koono mina kode. Ka innaadi kalisoota a kupannitto kalshe;

⁴ ka akkimoose mina'ew porra a sakatatta a kunkunnawwa qara ca ka kuuta kunkunnawwa isho qora kaatta qapa piisa kela kalisoota kalinni ka tankarta qayyanni.

⁵ Sitiiyyi Reesiini nuqusa a Sooriya isho Faaquhe nuqusa Isira'eeli Yursaalami torpa' deeni ka Akaasi kapa muren; ma xoori isha puta in ettaninne.

⁶ Sapanosetiiyyi Resiini nuqusa Sooriya ka Yihutaata a kara kitto alle daane ka katama Elaati haminta Sooriya opa oorshe. Etoometa ka katama Elaati opa deete ka haka awweti oppa kutiite.

⁷ Semmalla Akasiyaasi ka Tiklaati peleseri nuqusa Asoori opa orra erkade ka kide, “Anti an orxaytaayti ka an innaaytiiy xooye ka harka nuqussasene ana torpina a Sooriya isho a Isira'eeli kela anan pahe.”

⁸ Akaasi ka warqeeta isho dakara pirreeta a tika qulqulloota a Waaqa isho a tika mankisteeta kara co qeede ka nuqusa Asooriti daasata erke.

⁹ Nuqusa Asoori ka ishi awsade ka Tamaasqopa tuule ka qara pire ka samayta a kara co pooje ka katama Qiiri opan kale; ka nuqusase Resiini kuli ishshe.

¹⁰ Nuqusase Akaasi ka Teklaati peleseri nuqusa Asoori kapopa Tamaasqopa aane ka poqa a kalisoota a eeyye ca akke ka atta akkima kodamen ka pahanaasso xaashe ka qeesittase Uriiya erke.

¹¹ Qeesittase Uriiya ka akkima nuqusase Akaasi Tamaasqo desa ishi erke ka ajaje mina'e poqa kalisoota kode. Ka a nuqusase Akaasi in tiitaawnin turan dikkishe.

¹² Esete nuqusa Akaasi Tamaasqooyye tiitaawe, poqase a kalisoota akkeeyye ka kapopa dehaade ka qara kalisoota kalshe.

¹³ Ka poqase a kalisoota qara'e kalisoota a kupannitto isho a unta kalshe. Ka kalisoota ikkayta qara tuttuqe. Ka diika a kalisoota a takkumta qara fide.

¹⁴ Ka poqase a kalisoota a sipla poora oppa kodame fuula Waaqa tura qaatishen; isase arta poqase a kalisoota haaraya isho tika qulqulloota kara co qeede ka poqase a kalisoota haarayatiiyyi a isha kodacciiseeyye qinda qutattatin xaaye.

¹⁵ Nuqusase Akaasi ka qeesittase Uriiya ajaje ka kide, “Poqase a kalisoota kutta amma kodame qara'e, kalisoota a teykanta kupannitto ka kalisoota unta a kalaakala kallitto ka kalisoota a nuqusa a kupannitto ka kalisootaadi a unta ka kalisoota kupannitto ka piisseti dehaannitto isho kalisoota a unta ka ikkayta a samayta piisiti dehanno kalshe; ka diika a kalisoota kupannitto isho diika kalisoota a pila piisa poqase a kalisoota qara fide. Poqase a kalisoota a sipla poora xoori ana dehaamta parpaaccisnitton kaassada.”

¹⁶ Qeesittase Uriiya ka akkimase a nuqusase Akaasi isha ajaje qara kode.

¹⁷ Nuqusase Akaasi ka mirka pisha a kela kanaannawwa qapo mayshe ka pahana a qindadda quda ca qeede ka mirkase a pisha a akata kutta a pahana xormada a sipla poora kudanka lakki qara co qara lekkishe ka daka palda qara xaaye.

¹⁸ Akaasi sede piisa nuqusase a Asoori xasassa malla asse kode. Ka porase akka kuyyaata sampataati nuqussa qara kuti'ane'e, moontopeela kodame ka tika qulqulloota kara harmisame isho xarrase laka tulan co a nuqussa oppan tika qulqulloota a Waaqa karopa kullinaan kuli dufe.

¹⁹ Wa a ata hase a Akaasi kode piisa mataaffa torra a nuqussa Yihuta qara'e taafamen.

²⁰ Akaasi ka to'e ka katama Taawwiti kara'e turka aappadaassoti oppa mookame.