Mataafa a Nuqussa a lammatta 13 - Mataafa Qulqulloota

Iyyo'akaasi nuqusa Isira'eeli

¹ a Iyyo'asi inna Akasiyaasi a Yihuta qara nuqusumeeyye para kunda lakki sessattaatiiyyi Iyyo'akaasi inna Iyyu Isira'eeli qara'e nuqusume. Ka Samaariya kara kuti'e ka para kudanka tappa mukshe.

² Ka fuula Waaqa tura wa neeqa kode ka juppoota a Iyyorpi'ami a inna Napaati isase Isira'eeli saanta Waaqa qara maqqishe kammayyew aane; umma juppoose kamma in oorre.

³ Miira Waaqa ka Isira'eeli qara opaye; parraadi piisa karaayye ikka parra Asaheeli a nuqusa Sooriya isho innaadi Penehataati mukinnaane piisa karaayye Soorata turopa ishootta tuukke.

⁴ Iyyo'akaasi ka Waaqa qinsade; Waaqa ka miiddota nuqusa Sooriya ishootta miidde akke ka isha dakaye.

⁵ Ka a Isira'eeletan paho ishootta daashe, ikka miiddota Soorata kela pahen. Isira'eeleta ka a xata mina nakaytan kallaatte.

⁶ A koddito ma juppootase a toola Iyyorpi'ami isase Isira'eeli saanta Waaqa qara maqqisse kamma in oorre ka koda kammaaw caaden. Umma Samaariya karaayye olahitta asheera qa'ame in patinne.

⁷ Iyyo'akaasi'i orra a fartan torpino nama kunda keni ka sarakeella kudani ka xela loqqaan torpino kuma kudani maliiyyi we takkan nefo ishi in hasne. Maana malla nuqusa Sooriya'e ishootta pire ka akka raanda awtaappa mina ishootta nukkulaysheey.

⁸ Wa a ata hase a Iyyo'akaasi kode ka xormumaadi piisa torra mataaffa a nuqusa Isira'eeli qara'e taafamen.

⁹ Iyyo'akaasi ka to'e ikka samaariya kara isha mooken. Innaadi Yo'asi ka pakkaadippa nuqusume.

Yo'asi nuqusa Isira'eeli

¹⁰ A Iyyo'asi Yihuta qara nuqusumeeyye para kunda sessa tappattatiiyyi, Yo'asi inna Iyyo'akaasi Isira'eeli qara'e nuqusume ka Samaariya kara kuti'e ka para kudanka lehi mukshe.

¹¹ Ka fuula Waaqa tura wa neeqa kodeew ka juppootase a Iyyoorpi'ami a inna Naapaati isase Isira'eeli saanta Waaqa qara maqqishe kammaaw aane diisheey, kapa in sekaane.

¹² Wa a ata hase a Yo'asi kode piisa ka xormuma ishin Amesiyaasi nuqusa Yihuta torpe piisa mataaffa torra nuqussa a Isira'eeli kara'e taafamen.

¹³ Yo'asi ka to'e ka Samaariya kara'e turka a nuqusa Isira'eeli oppa mookame. Innaadi Iyyorpi'ami ka pakkaadi oppa nuqusume.

Toota Elsa'i

¹⁴ Sitiiyyi Elsa'i paaqase a kuli ishin to'onne paaqni. Yo'asi nuqusa Isira'eeli ka a intoonin turan Elsa'i tooyya lekkade ka isha qara pooye ka kide, “Oo aappo! Aappo! Sarakellada isho fartada a Isira'eeli!”

¹⁵ Elsa'i ka isha kide, “Paanta isho lawadda teyyado.” Ikka teyyade.

¹⁶ Ka nuqusa Isira'eeliti kide, “Pokka harmisado” Ikka harmisade. Ete harmisadeeyye, Elsa'i ka harkaadi harka nuqusaseti qara qapade.

¹⁷ Ka ishi kide, “Maskooteta a qinda piirtotatin kitto pane” Ikka pane. Elsa'i ka ishi kide, “Pokke!” Ikka pokke. Elsa'i ka ishi kide, “Ini tooy lawa a putayma Waaqa! A Soorata kela ishinan paho; atti katama Afeqi kara'e Soorata torpita ka ishootta pirta.”

¹⁸ Ka a lammattati kideewwe, “Lawaddasene qeedew” Ikka qeede. Ikka nuqusa Isira'eeliti kide, “Piitan dote!” Ikka sessaan piitan dote ka qaatishe.

¹⁹ Elsa'i namase a Waaqa ka miirode ka kide, “Kadinkeni isho lehinni dotte kiiteyye, haka Soorata pirritto'e ishootta putta; ma amma oori sessaanneewwe ishootta putta.”

²⁰ Elsa'i ka to'e ka hawlaame. Sitiiyyi a dampaya piita Mo'api ka para mina piita Isira'eeli karopa kullini.

²¹ Takkaayye ete Isira'eeleta nama to'e hawlinittooyye, a isi qara in upnin mali adampaya akkite ka pukkase rehnase a Elsa'i kara mookame karandela katte. Pukkase ka lafa Elsa'i quda kaye ka eennow dine ka xa'e ka qa'ade.

Oranna a Isira'eeleta isho a Soorata

²² Xelta Iyyo'akaasi nuqusume pisa oppaayye, Asaheeli nuqusa Sooriya Isira'eeleta rakkacciise.

²³ Waaqa xoori ishootta'e nyarrahe ka suraysade. Ka kodayteetase a Aprihaami ka Hisaaqi isho Yayqoopi olli kodade malla ishootta tooyyade, umma ishootta patissa ka fuulaadi tura alle ishootta pireeta in faane.

²⁴ Asaheeli nuqusa a Sooriya ka to'e; innaadi Penehataati ka pakkaadippa nuqusume.

²⁵ Sekkammaayye Yo'asi inna Iyyo'akaasi ka katamaddasene a Penhataati inna Asaheeli aappaaysho Iyyo'akaasi qara orannaan qeede Penhataati inna Asaheeli qara oorsade. Yo'asi ka sessaani Penhaataati pute ka katamaddasene a Isira'eeli oorshe.