Mataafa a Nuqussa a lammatta 12 - Mataafa Qulqulloota

Iyyo'asi nuqusa Yihuta

¹ A Iyyu nuqusume para tappattatiiyyi Iyyo'asi nuqusa a Yihuta'e kodde ka Yursaalami kuti'e ka para kunda afur mukshe. Aayyaasso Persaapitteeta ka Siipiya kidammi.

² Qoota qeesittase Yoodaahe isha kollishe malla Iyyo'aasi parra a kallaade piisa kara'e, fuula Waaqa tura wa fayya'e kode.

³ A koddito ma porra a sakatatta a kunkunnawwa qara ca alle in patinne. Samayta ka porrasene a sakatatta kunkunnawwa qara ca qara'e, kalisoota kalinni ka tankarta qayyanni.

⁴ Iyyo'asi ka qeesewwa kide, “Kaaja a daasata tika qulqulloota a Waaqa opa daasamma piisa, a samayata dikammooyye pohame ka a nama xasa a daasade mali ishin de'e ka a nama jaalalaadi ishin de'e ollopa poha.

⁵ Qeesewwa ka matta mina'e, nama kaaja qapno qara ollopa pohen. Ikka tika qulqulloota karaayye wa qitqiteetin harmishen.”

⁶ A koddito ma a Iyyo'asi nuqusume haka para kunda lakki sessa kaynitto kara'e, qeesewwa wa tika qulqulloota kara qitqite in harminne.

⁷ Nuqusase Iyyo'asi ka qeesittase Yodaahe isho qeesewwa a pila ollopa hale ka ishootta kide, “Tika qulqulloota karaayye maana malla wa qitqite a harminnin? Arepa desa kaaja, a tika qulqullootatin harmishen diisheey, orra kaaja qapno qara in teyyadan.”

⁸ Qeesewwa ka oori kidene, “Oowwe, arepadesa ino orra qara kaaja an pohonno umma ino mattinno wa tika qulqulloota kara qitqite an harminno.”

⁹ Ma xoori qeesittase Yoodaahe saatineeta qeede ka dufanaadi ure ka xarrase karan tika qulqulloota a Waaqa opa kullinaaneeyye qinda akkitatinni poqa kalisoota kapa xaaye. Qeesewwasene xarra tooytina ka kaajasene tika qulqulloota a Waaqa opa deena piisa karopa kalinni.

¹⁰ Oto akka kaaja kutti akkaneeyye, taafitta nuqusa isho saara qeesewwa'e deeni ka kaaja tika qulqulloota a Waaqa kela ca dikni ka koroja kara sukkin ka eeyye xaayni.

¹¹ Oto kaajasene dikame upnaataman kammaayye, harka orrase tika qulqulloota a Waaqa harmissa shuumame oppopa daanni. Ishootta ka turaayye harmootase a qora isho a dakaan tika qulqulloota qupnitto xaayya daanni.

¹² Ka orra dakadda faanno ka laajnon xaayyen ka asseew qora isho dakadda a laajame a tika qulqulloota a Waaqa harmishineetin piddini, ka kodadda a pila a tika qulqullootati parpaaccisna kamma daanni.

¹³ Ma xoori kaaja tika qulqulloota opa kalla oppaayye, mehadda tika qulqulloota a Waaqati kodda, sahinna a sipla dakara ka qaptowwa apitta ka tistewwa ka kaassa a dawnaane ka meeha a warqeeta isho a pirreetatin opani in koone.

¹⁴ Ma xoori orra tika qulqulloota harminno patta'e xaayya daasammi.

¹⁵ Akka orra koda koono'e xaayya daashane'e, orrose kaaja qapno qoota amanammo malla, akka kaaja koonaan ishootta kaassatta in parpaaccisne.

¹⁶ Kalisoota ishin dapayta isho a juppoota oppa kaaja kalla xoori, qeesewwa'e daasammi diisheey, kaaja tika qulqulloota a Waaqa oppopa kalli in caan.

¹⁷ Sitiiyyi Asaheeli nuqusa a Sooriya ide'e ka katama Kaati torpe ka qara pire ka sekammaayye Yursaalami torpa aane.

¹⁸ Iyyo'asi nuqusa a Yihuta ka mehaddasene qulqullaawe ka Waaqa xawwi reexxene a aappadaasso nuqussasene a Yihuta Iyyoosafiti ka Iyyohoraami isho Akaasiyaasi xawwi reexxene ka meehase a mattaadi ishi xawwi reexxe isho warqeetase a tika qulqulloota a Waaqa ka a tika mankisteeta kara kitto piisa qeede ka Asaheeli nuqusa Sooriyaati erke. Isha ka oori Yursaalami qara alle tiitaawe.

¹⁹ Wa a ata hase a Iyyo'asi kode piisa mataaffa torra a nuqussa Yihuta qara'e taafamen.

²⁰ Saarraadi ka isha qara suladen ka porase Siillan xata lekkanooyye porase a piita teettamte kara'e, isha ishshen.

²¹ Saarrasene xaadippa Yisaakori inna Shimi'ati isho Yihosapaati inna Shoomeri ka isha ishshen. Ikka katama Taawwiti kara'e, turka aappadaassoti oppa mooken. Innaadi Amesiyaasi ka pakkaadippa nuqusume.