Mataafa a Nuqussa a lammatta 11 - Mataafa Qulqulloota

Akka Ataaliya Yihuta qara nuqusumte

¹ Ataaliya aayya opa nuqusase a Akasiyaasi ete akka innaadi to'en dakayteeyye, sanynyeeta a toola nuqusa piisa lessaata'e ixaate.

² A koddito ma Yihoshepaa'i enenta nuqusase a Iyyohoraami alawta Akasiyaasi hellaasene a nuqusa leena oppaayye Iyyo'asi inna Akasiyaasi qeette ka akka isha in ikannini'i, Ataaliya turaayye iskatteeta takka isha ampannitto ollin kaata kara juutte.

³ Ka a Ataaliya Yihuta qara nuqusumittooyye, innasene haka para lehiti'i anpattootaadi ollin tika Waaqa kara dekte.

⁴ Ma xoori para tappattatiiyyi, Yoodaahe tooytampaya a nuqusa ka motoloqadda a tooytampaya ajajna kamma erke ka akka tika Waaqa opa isha kapopa de'ane kode. Ka ishootta olli kodayteeta kodade ka tika Waaqa kela ishootta xaxacciise. ka sekkammaayye innasene a nuqusa ishootta akkishe.

⁵ Ka ishootta ajaje ka kide, “Asse koda! Ishina kita paayyota kodde ka kuyyaata sampataati tooytota kullina, harka sessa oppaayye harka takka a tika nuqusa tooyto.

⁶ Harka sessa oppa takka'ew, a xarra Suuri tooyto. Harka takka'ew, a xarra tulta tooytampayaatin co tooyto ka oori asse tikoose tooyta.

⁷ Ishina a kuyyaata sampataati xaysanna, kita a kela hase lakkiiyyi, tikase a qulqulloota a nuqusa kela co tooyto.

⁸ Mehaddaassin a oranna harkopa oorsada ka nuqusa kapa tiitaysha ka oto sookno ka kullinooyye, isha kapa caada. Nama jirfaayshin kapan dehaanno ishsha.

⁹ Motoloqaddasene ka wa qeesittase Yoodaahe ishootta ajaje piisa koden. Ishootta ka matta matta mina'e, orra a kuyyaata sampataati tooytota kullino isho a xaysanno Yoodaahe kapopan de'en.

¹⁰ Qeesittase ka mehaddasene a oranna a Taawwiti a tika qulqulloota a Waaqa kela ca oranna ka kontalewwa sookshe ka motoloqadda qoote.

¹¹ Tooytampaya ka matta matta mina'e, mehaddaasso a oranna qaqqapaden ka tika qulqullootati qindadda piisan haka poqa kalisootati nuqusa kapa tiitayshen.

¹² Yoodaahe ka inna nuqusa sookshe ka kulleeta a nuqusuma qara kalshe ka mataafase a seera mankisteeta ishi daashe ka isha daaten ka nuqusa koden ka kanaata qapen ka nessa kuttan kidene, “Nuqusa a para kuma nuqusumo!”

¹³ Ataaliya ete nessa a tooytampaya isho a samayta dakayteeyye, samayta kapopa tika qulqulloota a Waaqa opa ante.

¹⁴ Ka akka aata mina'e, nuqusase a tuuda kapa qa'ade ka saarra a xela oranna isho a kaasa dawna a isha kapa qa'qade akkite. Samayta piiseti piisa ka xasoonni ka kaasa dawni. Ataaliya ka mehadda isquda kaa'ite ka ullupte ka kiite, “Ini nama qara' xaana! Ini nama qara' xaana!”

¹⁵ Qoota qeesittase Yoodaahe turan kide, “Tika qulqulloota a Waaqa kara in ishshammin” malla, motoloqaddasene xela oranna qara shuumame ajaje ka kide, “Jirfa xela oranna kara alle isheetta sooksha ka a isheetta quda koddina piisa koraatetan leysha.”

¹⁶ Ikka isheetta qapen ka haka porase a tika mankisteeta a fartada oppan kullinaaneti ishin aanen ka eyye ishshen.

¹⁷ Yoodaahe ka akka samayta Waaqa koddane'e, arta Waaqa ka a nuqusa isho a samayta kara'e, kodayteeta kode. Ka akkimose mina'ew, arta a nuqusa ka a samayta kara'e, kodayteeta kodeew.

¹⁸ Samayta a piisiti piisa ka tika pa'aali opa aane ka qitqishshe. Ka poqaadi a kalisoota isho pahana a xefame mooje ka qeesittase a pa'ali Mataani kidammo poqase a kalisoota tura ishshen. Qeesittase Yoodaahe ka orra tika qulqulloota a Waaqa tooytino reexe.

¹⁹ Ka motoloqadda a tooytampaya ajajna ka tooytampaya a nuqusa ka tooytampaya isho samayta piisseti piisa ollin kodden ka tika qulqulloota a Waaqa kela nuqusa qeeden ka xarra tooytampaya karanne, tika mankisteeta karopa kullishen; nuqusa ka alkaadi qara kuti'e.

²⁰ Samayta piisseti piisa ka xasoode. Qoota Ataaliya tika nuqusa kapa ishshamte malla, katama Yursaalami piisa ka nessuma akkaden.

²¹ Iyyo'asi a nuqusumooyye paraadi tappa.