Mataafa a Nuqussa a lammatta 10 - Mataafa Qulqulloota

Akka sanynyeeta Aki'api piisa leysamte

¹ Aki'api katama Samaariya karaayye hellaa a diira kunda tappa qapa. Semmalla Iyyu ka kutkuttowwa a IyyIsira'eeli ka qimoota isho orra hellaa Aki'api qara tooyno ka Samaariya kara co kapopa taptaappeta taafe. Taptaappese nefo ikiini,

² “Hellaa a poqallaassina ka sarakelladda ka fartada ka katama a kapa kawwattan qorrame isho meeha oranna iqqaptaneey, kayna taptaapese ishin kapa kaytaatinni,

³ hellaa a diira a poqallaassina oppaayye a aako ka qalpeeta qapo reexada ka pakka aappaayshoti oppa nuqusumsha ka toola poqallaassina malla torpa!”

⁴ Ishootta xoori akata tammaqen ka kidene, “Nuqussa lakki isha tura qa'atta malaaleey, ino attan tura qa'atta ettaninna?”

⁵ Semmalla saara a tika mankisteeta ka mukissampayta a katama ka qimoota isho a hellaa nuqusa qara tooyna ka Iyyu kapopa erkana erken ka kidene, “Ino an orxayaatti, wa ino ajajta piisa in koona; ino nama takka nefo an nuqusuminnooy, atti wa ke aaka kode.”

⁶ Iyyu ka a lammattati taptaappeta taafe ka ishootta kide, “Ishina oton ana quda kodditen ka ana ajajammittaneeyye, hellaa poqallaassina a diira qara mattada quura ka parri esse Iyyisira'eli karopa ana turopan xooya.” Sitiiyyi hellaasene a nuqusa kunda tappa kutkuttowwa a katama a ishootta qara tooyna olli caan.

⁷ Ete taptaappese ishootta qara kayteeyye, kutkuttowwasene ka hellaasene a diira a nuqusa kunda tappa qaqqapen ka leyshen ka mattaddaasso sataradda kara xaayen ka Iyyisira'elipan Iyyu kapopa erken.

⁸ Erkamampayta ka Iyyu lele ka kide, “Mattadasene a hellaa diira a nuqusa tin ide'en.” Isha ka kide, “Xarra katama tura'e, pora lakkippa tuula ka haka teykantati eeyye diisha.”

⁹ Ka parraytaadiiyyi sooke ka samayta piisa tura qa'ade ka kide, “Ishina dapa a qaptan, a poqallaayyo sule ka ishshe ana; ma a sene piisa leyshe ayno?

¹⁰ Waaqa qaaletase xaadi orxaytase xaadi Eeliyaasi qudan toola Aki'api qara haasawade oppaayye takka nefo akka in hasnin amma upnaada.”

¹¹ Semmalla Iyyu ka toola Aki'api oppa nama hase piisa ka taanynyadaadi ka mottadaadi isho qeesewwaadi a takka in hattinnin mali piisa Iyyisira'eli kara leyshe.

Akka daltaya Akaasiyaasi leysamen

¹² Iyyu ete xa'e ka Samaariyaapa anno ka tika sikmaya kahirra kapa kayeeyye,

¹³ hellaapa Akasiyaasi a nuqusase a Yihuta mina de'e ka kaassade ka kide, “Ishina opa ayno?” Ishootta ka isha kidene, “Ino an hella opa Akasiyaasi ka nakayta hellaa a nuqusa isho a poqolteeta kaassatta anninna.”

¹⁴ Ikka ajaje ka kide, “Ishootta ca qaqqapa!” Ikka qaqqapen ka tika sikmaya kahirra kapaayye qaawa pisha kapa'e, nama kunda afuri lakki leyshen umma nama takka nefo in hattinne.

Akkima sanynyeeta Aki'api a kela haste leysamte

¹⁵ Iyyu ete eeppa xa'e ka annooyye, Iyyonataapi inna Rekaapi a isha turopa deeno mina kaye ka isha qara nakayta kaassade ka kide, “Anti wa atti koonitta piisa in teyyanniiy, hela atti asseewwe waan anti koona piisa teyyanni?” Iyyonataapi ka isha kide, “Aa in teyyanni.” Iyyu ka ishi kide, “Harka olli qeennanka!” Ikka harka olli qeeden. Iyyu ka oori sarkeella qaropa isha fayyishe ka iskapa kutiishe.

¹⁶ Ka ishi kide, “Ollin anna ka yoota an Waaqa qapo tooye.” Ka sarkeella qara ollin aanen.

¹⁷ Ete Samaariya kayeneeyye, akka Waaqa qaaletaadin xuumampaytase Eeliyaasi qudan haasawade qara'e, Samaariya kara sanynyeeta a Aki'api a hase piisa leyshe.

Akkima orxaya paa'ali leysamen

¹⁸ Sekkammaayye Iyyu samayta piisa ollopa hale ka ishootta titte ka kide, “Aki'api shakkayta'ew pa'ali sakatade ma; anti Iyyu a kuttati'in ishi sakatada.

¹⁹ Amma xuumampaya pa'aali piisa ka a ishi sakatanna piisa isho qeesewwaadi piisa ana kapopa hala; anti kalisoota kutta'en pa'aali kalshaay, nama takka nefo in hassnin. Nama a haso piisa alle'e ishshan. Iyyu ka orxaya pa'aali pira'e, mala asse paho dawe.

²⁰ Iyyu ka kide, “Ulfeena a paa'ali xora kata ka salisha.” Ishootta ka salishen.

²¹ Isha ka erkanoosen piita Isira'eeli piisa oppopa erke; orxaya a pa'ali piisa ka ollopa de'en. Nama kela hase takka nefo ka in kinnin. Ikka pisanti tika pa'ali kelopa kullen; tikase ka qinda oppa oorto pisan immakaatte.

²² Iyyu ka saarase a tika mehadda a qeesewwa pa'ali kalsannaaneti kide, “Orxaya a pa'ali pisa'e, mehadda a kalsadane sookshe isha ka mehaddasene sookshe.”

²³ Sekkammaayye Iyyu isho Iyyonataapi inna Rekaapi ka ollin tikase a pa'ali kelopa kullen. Isha ka orxayasene a pa'aliti kide, “Ishin oppa orxayta pa'ali mali orra Waaqa sakatanno takka nefo akka in caannini'i, fayya oli qora.”

²⁴ Ka oori kalisoota kupannitto ka kalisoota a pila kalissa kullen. Sitiiyyi Iyyu laka tulanne nama kunda sette harmishe ka ishootta kide, “Orra an harkaayshin oppopa tarpisho ka daasho oppaayye, oton nama takka kela nama miliqaayye, isha pakkaadippa to'a.”

²⁵ Ete kalissota kupannitto kalissa dikkisheneeyye, Iyyu tooytampayasene isho saarraasso'e ajaje ka kide, “Kulla ka leysha, nama takka nefo ka in pahanin. Ikka koraatetan ishootta leyshen. Tooytampayasene isho saarrasene ka pukkaaysho laka tulopa dakken ka oori kaata tika pa'ali karopa kullen.

²⁶ Ka waakkadasene a dakadda tika pa'ali kara sookshen ka kupen.

²⁷ Ka waakkadasene a pa'ali oppa pappaqshen ka tikase a pa'ali kuli qitqishshen ka haka awweti pora dinaati kodaden.

²⁸ Iyyu ka pora asse pahonne piita Isira'eeli kara sakatatta a pa'ali pashshe.

²⁹ Ma xoori Iyyu juppoota a Iyyorpi'ami a inna Napaati isase a ishin akka Isira'eeleta katamadda Peteli isho a Taani kara innayya warqeetati sakatatto kode kapa in sekaanne.

³⁰ Waaqa ka Iyyu kide, “Qoota fuuliyyo tura wa paxaara koote ka wa an dikade piisa toola Aki'api qara koote malla, sanynyeetaayti haka xelta afuriti'i Isira'eeli qara nuqusumta.”

³¹ Iyyu xoori seerase a Waaqa Poqalla Isira'eeli karitta pisan in tooytaanne ka juppootase a Iyyorpi'ami isase a ishin Isira'eeleta piisa juppootoppopa kate qara in oorre.

Toota Iyyu

³² Sapanosetiiyyi Waaqa ka xeela piita Isira'eeli shakkissa paayye; Asaheeli nuqusa Sooriya ka torkada piita Isira'eeli torpe.

³³ Ka piitase a Kele'adi kirra Yurtaanoositi qinda piirtotatin qatte piisa qeede ka qinda tupattatinni, haka katamasene Aro'eri kirra Arnooni kapa ca torpe ka piitase a Kele'adi isho a Paasaani isase haminta Kaati ka a Roopeeli isho a Minaase koddite qara pire.

³⁴ Wa a ata hase a Iyyu kode ka kodaddaadi ka xormumaadi piisa mataffa torra a nuqussa a Isira'eeli qara'e taafamen.

³⁵ Iyyu ka to'e ka Samaariya hawlaame. Innaadi Iyyo'akaasi ka pakkaadippa nuqusume.

³⁶ Iyyu Samaariya'e kuti'e ka para kunda lakki sette Isira'eeli qara nuqusume.