Mataafa a Nuqussa a lammatta 1 - Mataafa Qulqulloota

Xuumampaytase Eeliyaasi isho nuqusase Akasiyaasi

¹ Ete nuqusase a Isira'eeli Aki'api to'e kammaayye, Mo'api Isira'eeli piddama tiitte ka isheetta torpini.

² Sitiiyyi Akaasiyaasi nuqusa Isira'eeli a samaariyaayye Fooqetaadi qara cooyye, maskooteta karaxata pi'e ka paaqni. Ka orra erkade ka kide, “Akkan paaqose oppa dino ka an dinnin, aana ka pi'elsapuuli waaqa katama Ekrooni ana kaassada.”

³ Erkampattoota Waaqa ka Eeliyaasi Tesipittaseti kiite, “Xa'e ka orrase a nuqusa Samaariya erkade turopa sooke ka ishootta kide, ‘Hela qoota Isira'eeli karaayye Waaqa in kinnin malla pi'elsapuuli waaqa Ekrooni kaassatta annittane?’

⁴ Semmalla Waaqa ikiini, “Ittoota diisheey loshshaatti qara a xaato.” Eeliyaasi ka oori aane.

⁵ Orraase ka Akkaasiyaasi kapopa tiitaawe. Isha ka ishootta kaassade ka kide, “Maana'e alle tiitaawten?”

⁶ Ishootta ka ishi kidene, “Nama takka ino turopa de'e ka ino kide, ‘Nuqusase ishin erke kapopa tiitaawa ka ishi kida, Waaqa ikiini, ‘Wa malla pi'elsapuuli waaqa Ekrooni kapopa orra erkite, hela qoota Isira'eeli kara Waaqa in kinnin malla? Semmalla ittoota diisheey, loshshaatti qara a xaato!’”

⁷ Isha ka ishootta kaassade ka kide, “Namoose ishin turopa sooke ka asse ishina kide atta paha?”

⁸ Ishootta ka ishi kidene, “Nyirfoolayta nama ka surraappa teepa kollatta hidade.” Isha ka kide, “Tesipittase Eeliyaasi.”

⁹ Nuqusa ka amsalaqaadi olli nama kunda keni erke. Sitiiyyi Eeliyaasi irroota qara'e qa'e. Amsaleqitta ka isha kapopa fayyade ka ishi kide, “Nama Waaqatiiyyi! Nuqusa ike kiini, ‘Lekkado!’”

¹⁰ Eeliyaasi ka ishi oorshe ka kide, “Oton anan nama Waaqatiiyyi, a apitta moonte lekkado ka ke isho orraayti kunda keni kupo!” Apitta ka moonte lekkade ka isha isho orraadi kunda keni kupe.

¹¹ Nuqusase ka a lammattati amsalaqitta pila nama kunda ken ollin erkeew. Amsalaqittase a lammatta ka fayyade ka Eeliyaasi kide, “Atti nama Waaqatiiyyi! Nuqusa ike kiini, ‘Jarjartan lekkado!’”

¹² Eeliyaasi ka ishi kideewwe, “Oton anan nama Waaqatiiyyi, a apitta moonte lekkado ka ke isho orraayti kunda keni kupo!” Apitta ka moonte lekkade ka isha isho orraadi kunda keni kupeew.

¹³ Nuqusa ka a sessattati amsalaqitta pila isho nama kunda keni erkeew. amsalaqittase ka fayyade ka Eeliyaasi tura kilpiippade ka isha naappade ka kide, “Atti nama Waaqatiiyyi! Ana isho namoose kunda keni orxayaatti suraysado ka inon piran.

¹⁴ Setturan apitta moonte lekkade ka amsalaqadda lakki isho namaaysho kunda keni keni pireey, amma oori ana suraysadoow!”

¹⁵ Erkampattoota Waaqa ka Eeliyaasi kiite, “Isha in fuuran, isha olli lekkado!” Ikka xa'e ka isha olliiyyi nuqusa turopa lekkade.

¹⁶ Ka nuqusa kide, “Waaqa ikiini, ‘Hela Waaqa Isira'eeli kara in kinnini akka pi'elsapuuli waaqa Ekrooni kaassatta orra erkatte? Qoota asse koote malla ittoota diisheey, loshshaatti qaraayye a xaato!”

¹⁷ Semmalla akka qaalese a Waaqa Eeliyaasi haasawade qara'e Akasiyaasi ka to'e. Qoota inna diirta in qapnin malla Iyyohoraami inna Iyosaafiti Yihuta qara nuqusumeeyye para lammattatiiyyi innaasso Iyyoraami ka pakkaadippa nuqusume.

¹⁸ Wa Akasiyaasi kode a pila mataaffa torra a nuqussa Isira'eeli qara'e taafamen.