Mataafa Saamu'eeli a paayyota 9 - Mataafa Qulqulloota

Akkima Saamu'eeli Saa'ooli nuqusuma daate

¹ Kafa Piiniyaami oppaayye teyantoolayta takka a nama Qiisi kidammo ca. Isha inna Api'eeli ka oopa Siroori ka opopa Pikoraati. Pikoraatikan inna afiha a Piiniyaamitta.

² Qiisi inna Sa'ooli kidaamma'e qapa. Sa'ooli xarjaallitta nama ka xayya qapa umma orra Isira'eeli oppaayye a xarjaalluma isha kayno in co. Isha ideri ka xashsha opeela orra piisa qaran akkaanni.

³ Harrewwa Qiisi a aappa opa Sa'ooli ka paten Qiisi ka innaadi Sa'ooli kide, “Orxayaappa nama takka isquda qeede ka aane harrewwa fade.”

⁴ Sa'ooli ka piitase kunkunnawwa qapto a Efreemi isho a Shaliisha oppan tarpen, umma harrewwasene in teyne. Ka piita Sha'ilimi oppan tarpeneew, umma eeyye nefo in caan. Ka kamma piita Piiniyaami oppan tarpeneew, umma in teyne.

⁵ Ete piita Suufi kayeneeyye Sa'ooli i'orxaytase isha olli co kide, “Aappinno harrewwa alle diisha ka ino qaapa paayyaay, xooye alle tiitaawna”

⁶ Orxaytase ka ishi oorshe ka kide, “Tin katamoosen karaayye nama takka a Waaqa'e ca. Isha nefo nama ulfeessammo wa kiina piisa ka koddinaan takkapunu saanta an qara ishootta faano ino akeekaay, eeyyepa anna.

⁷ Sa'ooli ka orxaytaseti kide, “Hela oton anninnooyye maanan namaseeti daanna? Akallaanno kara damta ipiramteey umma daassata an namase a Waaqati ishin anno in kittooy, maanan qapna?”

⁸ Orxaytase ka kide, “Tin kaaja shakkayan are qapaay, senen namoose a Waaqati daasha, ikka qinda an qara faano ino lela.

⁹ Isira'eeli karaayye xatta nama oton Waaqa kaassatta'e anniiyyi ikiini, “Xooye ka akkampayta kapopa anna” Maana malla nama amma ishi xuumampayta kiinaan sitiiyyi akkampayta kidammiiy.

¹⁰ Sa'ooli ka orxaytaseti kide, “Ipaxaariiy xooye anna” Ka katamasene a karaayye nama Waaqa ca opa aanen.

¹¹ Ete katamasene opa annaan ka kunkunnaata fayyannaaneeyye, tuparra pisha oraapa anna mina kayen ka ishootta kaassaden ka kidene, “Hela akkampaytase are ca?”

¹² Tuparrasene ka ishootta kidene “Eeyye ca tin ishin tura ca. Kamma jarjara. Awwe qoota orra pora kalisoota oppa kalisoota kalinno malla, isha amma katamaappopa de'e.

¹³ A damta pora kalisoota opa in annin turanne, oto katamaappa kaytaneeyye eennowwe isha akkitan paayyota qara qoota isha kalisootase eeppisno malla, a isha de'o mali orra we dammi in co. Orra halaame nefo, kuli kamma dameeta paayyini. Semmalla qara'ela aana eennowwe isha akkitaneey.

¹⁴ Ikka oori katamasene opeela aanen. Ete katamasene karopa kullinaaneeyye, Saamu'eeli porase a kalisoota opa anni ka ishootta minaxata deeni ikka akken.

¹⁵ A Saa'ooli eeyyepa in annini kuyyaata takka turanne Waaqa Saamu'eeli haasawade ka kide,

¹⁶ “Parri esse piita Piiniyaamitin nama takka ke kapopa erka. Akka samaytiyyo a Isira'eeli qara saara koddo'e tooy isha daate. Isha hupna Filisteemeta kela samaytiyyo nataan sooksha. Anti samaytiyyo in akke ullupittaaysho ka ana kapa kayeey.”

¹⁷ Ete Saamu'eeli Saa'ooli akkeeyye, Waaqa iSaamu'eeli kide, “Namase an qootaadi desa ke lele sede ishaay, isha samaytiyyo muksha.”

¹⁸ xarra katamaseneti oppaayye, Saa'ooli ka Saamu'eeli kapopa desa dehaade ka isha kaassade ka kide, “Tika akkampayta a xaamo akkima koddite atara ana lele.”

¹⁹ Saamu'eeli ka Saa'ooli oorshe ka kide, “Ha akkampaytase ana; awwe ana olli damtaneey, ana tura qatta ka pora kalisoota opa fayyada parri teykanta karannen wa matta kara qapta piisa ke lela ka isi qara ke kalshaay.

²⁰ Harrewwasene xaayti kuyyaata sessa turan pate malla in qaapan iteyadeneey ma ata samayta Isira'eeli ayno a kuttati xajeelli? Ke ka toolaayshinanne?

²¹ Saa'ooli ka ishi oorshe ka kide, “Anti an Piiniyaamittanne? Ka kaffa Isira'eeli oppaayye kafa shakka oppa andalanne? Toolinno nefoow, toolla a kafa Piiniyaami oppaayye a kamma oorshonne? Ka kuli maana'e asse ana haasawanni?”

²² Saamu'eeli ka Saa'ooli isho orxaytase qeede ka tikase kutta a damta kelopan kulle ka orrase kunda sessa mina co halaame oppa'e pora ulfeena oppa ishootta kutiishe.

²³ Saamu'eeli ka namase damta koono kide, “Meelase an kide ‘Xawwi xaaye’ Ka ke' daashen xooye.”

²⁴ Namase damta koono ka loqta akka kitton qeede ka Saa'ooli tura' xaaye. Saamu'eeli ka Saa'ooli kide, “Tin are wa ke xaayame iketuropa dehaadeneey dame. Orrase an hale olli akka damto'e, haka kiseetose are kitto kaynitto kara'e sede xwwi'i ke xaayamteey” Kuyyaasetiiyyi Saa'ooli ka Saamu'eeli olli dame.

²⁵ Ete pora kalisoota qaraayye lekkaden ka katamaapa kallaaneeyye, tikeeyye tula qaranne Saa'ooli qoolla afen ikka eeyye qara muke.

²⁶ Ete para qiteeyye, Saamu'eeli ka Saa'ooli tikaqaraayye hale ka ishi kide, “Xa'e anka ke keesso” Saa'ooli ka xa'e Saamu'eeli isho isha ka ollin poroppopa sooken.

²⁷ Ete xeela katama opa xata lekkannaaneeyye, Saamu'eeli ka Saa'ooli kide, “Orxaytaayti kide, ‘Ino turopa qatte’ Ka ete qatteeyye, Saa'ooli kide, ‘Areppa shakkayteeta qa'ado anka wa Waaqa kide ke lelo.’”