Mataafa Saamu'eeli a paayyota 8 - Mataafa Qulqulloota

Akkima Isira'eeleta nuqusa shuumatta Saamu'eeli kaassatte

¹ Saamu'eeli ete kereeyye, hellaadi a diira'e qeede ka Isira'eeli qara taanynyada kode.

² Maxxa innaadi a kuuta Iyyu'eeli a kussitta kan Apiya ishootta ka Persaape kara taanynyada kodden.

³ Hellaadi xoori saantaadippanne in anne tookta ishootta in parpaaccisnin akkatta'e saanta qara maqqen. Ka nooddota teyyanni ka dukaata qindandesa quu'ini.

⁴ Seminan qimaya Isira'eeli piisa ka oli xaashen ka Raama karopa Saamu'eeli kapopa de'en.

⁵ Ka ishi kidene, “Amma atti ikerite umma hellaatti saantaytin anni in caaneey, akkima mankistewwa a taakkane piisa nuqussa qapan mina'e, nuqusa ino shuume.”

⁶ Ma xoori ete kiinaane “Nuqusa ino shuumeeyye” Sede Saamu'eeli in xasanne ikka Waaqopa qinsade,

⁷ Waaqa ka ishi kide, “Akkan anti nuqusaaysho an koddinini'i, ishootta ana jippen diisheey ke in jippineey, atti nessa samaytoseti dakaye, ka wa ke kiinaane piisa kode.

⁸ Kuyyaata an oppaayye Kipsi kara ishootta sookshe paayyatte haka awweti'i, ishootta alle ana diishen ka waaqadda pila waaqaysaden ka kodoose a ana qara koden amma ke qara kooniiw.

⁹ Semmalla nessaaysho dakaye. Ma xoori nuqusa ishootta qara nuqusumo wa ishootta qara koda ammaaw turan fayya ishootta lele.”

¹⁰ Saamu'eeli ka samaytase akka nuqusa ishootta nuqusumsho isha kaassanno'e, wa Waaqa ishi kide piisa ishootta lele.

¹¹ Ka kide, “Nuqusase ishin qara nuqusumo wa ishin qara fada tooy sene. Hellaassin a dirra'e qeeda ka a sarakeella isho fartan oranna torpinaati kodada. Ikka sarakeellaadi a oranna turandesa hiran

¹² ka demo shalaqadda ka amsalaqadda kodada. Demo ka isha kela piita qotan ka ishi unta feran ka meeha oranna isho a sarakeella oranna ishi tuman

¹³ ka tuparraassin ishin kela qeeda ka a isha kela a shittowwa koona ka a watewwa isho putteenna koonaati kodada.

¹⁴ Ka dullaassin isho porraassin a dishma wayneeta isho a sayteeta isasene fayya palanna ishin qara qeeda ka saarraadi daasha.

¹⁵ Ka untaayshin isho wayneetaayshin qara kuma kundatta qeeda ka saarraadi isho orxayaadi daasha.

¹⁶ Ka orxayaassin a hamiyya ka a tuparra qeedada. Ka okkayaassin isho harrewwaassin oppa a aaka teyyada ka kodaan kodada.

¹⁷ Ka xellootaayshin a kahirra isho a telalla qara kuma kundata qeedada. Ishina ka karpishshaddaadi kodditan.

¹⁸ Oto kiseese kaytooyye, akka nuqusase xaayshin a reexattan kela ulluptan umma Waaqa ishina in dakayo.

¹⁹ A koddito ma samaytase wa Saamu'eeli kiina dakaya itiite ka kiini, “In koddito, nuqusa qapnaattan faaninna.

²⁰ akkan ino kuli mankistewwa a taakane pahanaanno, nuqusaayno ka ino muksho ka ino tura qato ka inon tuulo ka oranna ino torpon faaninna.”

²¹ Saamu'eeli ka wa samayta kide piisa dakaye ka sedeew Waaqa lele.

²² Waaqa ka Saamu'eeli kide, “Afaasso dakaye ka nuqusa ishootta shuume.” Saamu'eeli ka oori orra Isira'eeliti kide, “Piisani tikkaassin opa kala.”