Mataafa Saamu'eeli a paayyota 7 - Mataafa Qulqulloota

¹ Orrase a Qiriyaatiyaarimi ka de'e ka taapotase a Waaqa opeela teyyade ka tikase kunkunnaata qara kitto a Apinataapi opan kale. Ka akka taapotase a Waaqa tooyto'e, innaadi Eli'asaari xawwi reexxe.

Akkima Filisteemeta putamte

² A taapotase Qiriyaatiyaarimi kara xaayamte paayyatte eta i'ollin sekaaden ka para kunda lakki kayni samayta Isira'eeli piisa ka Waaqopa pooye.

³ Saamu'eeli ka samayta Isira'eeli piisa kide, “Oton karittaayshin piisanne Waaqopa oorrittaneeyye waaqadda orra hapta isho astaarooti alle iskapa sekaysha. Ka Waaqa isi daasha ka isha patta piddama; isha hupna Filisteemi kela i'ishinan pahaay.”

⁴ Isira'eeli ka waaqaddasene a pa'ali isho a astaarooti iskapa sekasse ka Waaqa patta piddamte.

⁵ Saamu'eeli ka kide, “Waaqopan ishina qinsadaay, samayta Isira'eeli piisa Misippopa xaasha.

⁶ Ikka Misippa karopa ollopa xooren. Ka pisha oraapen ka Waaqa tura tuttuqen ka kuyyaaseti damta musaden ka juppootaaysho leladen ka kidene, “Waaqa qara'en juppoota koone” Saamu'eeli ka Misippa karayya samayta Isira'eeli qara taanynyummi.

⁷ Orra Filisteemi ka akkima Isira'eeleta Misippa karopa xoorte dakayte. Mukissampaya Filisteemi ka Isira'eeli torpeeta sooken. samayta Isira'eeli ete sede dakayeeyye, iFilistemeeta fuure.

⁸ Ka Saamu'eeli kide, “Akka hupna Filisteemeta kela inon paho'e, Waaqa Poqallaapa ino ullupa in qaatishan.”

⁹ Saamu'eeli ka innayya laha a ama luukna qeede ka innayyasene piisa kalisoota kupannitto kode ka Waaqa dehayshe. Ka Isira'eeli malla Waaqopa ullupe Waaqa ka ishi dakaye.

¹⁰ Ete Saamu'eeli kalisootase kupannitto dehannooyye, Filisteemeta Isira'eeleta torpa'e dehaatte kuyyaasetiiyyi Waaqa ka Filisteemeta qara nessa kuttan moontexata xirare ka ishootta tammaqshe ikka Isira'eeleta tura qahate.

¹¹ Isira'eeleta ka Misippa kara sookte ka kumpaappe Filisteemeta daante ka paleeta Peetikari tarpisse ka porraappan xata ishootta lesse.

¹² Saamu'eeli ka daka takka qeede ka otanta a Misippa isho a Sheeni kara dishe. Ka maxxa ishi kode ka kide, “Haka awwiti Waaqa ino qaarqaare” Ka “Apeniesere” kide ka hale.

¹³ Isira'eeleta ka Filisteemeta iskelopa oorsatte, umma haminta Isira'eeli oppa lammatta in kayne, haka Saamu'eeli co kara'e, Waaqa ka Filisteemeta miidde.

¹⁴ Katamaddasene a xatta Filitemeeta Isira'eeleta qara qeette Ekrooni paayyatte haka Kettiti ka Isira'eeleta ooren; Isira'eeleta ka harka Filisteemeta oppa piitaadi a katamaddoosen kapandesa kitto oorsatte. Isira'eeleta isho Amooreta nefo ka olli fayya qapnaaden.

¹⁵ Saamu'eeli ka haka co piisa kara'e, Isira'eeli qara taanynyume.

¹⁶ Ka parapara oppa Peteli ka Kelkela isho Misippa opa tara taran olkamma anni ka porradoosen piisa oppa Isira'eeli qara taanynyummi.

¹⁷ Ka qoota tikaadi Raama kara kitto malla Raama opa kalli ka eeyye kuli kara Isira'eeli qara taanynyammi ka eeyye kara Waaqa'e, pora kalisoota kode.