Mataafa Saamu'eeli a paayyota 6 - Mataafa Qulqulloota

Akkima taapotase a kodayteeta Waaqa Isira'eelipa oorte

¹ Ete taapotase a Waaqa piita Filisteemiti leya tappa pirte,

² samaytase a Filisteemi qeesewwa isho so'aya ollopa hale ka ishootta kaassade ka kide, “Taapotase a Waaqa attan koona? Atta akkiman poraadipa oorinno ino lela.”

³ Ikka kidene, oton taapota a Waaqa Isira'eeli'i isqara kalinnittaneeyye, kalisoota a ishin dapayta quda qapeeta ka ishi erkeeta ishin faani diisheey, asse patta in erkan. Sitiiyyi iddintaneey ka wa malla harkaadi ishin qara in oorinnin nefo upnaattaneey.

⁴ Ikka kaassaden ka kidineewwe, “Kalisoota a ishin dapayta maanan quda qapanna ka ishi erkina?” Ikka kidene, “Erkannaata a ishin isho mukissampayaassin qara kayte takkaweey, lekuma mukissampaya Filisteemi mina'e, pahana qappaajoseeti a warqeetoppa kodame keni ka pahana tapayta a warqeetoppa kodame keni erka.

⁵ Semmalla pahana qappaaja isho a tapayoosen piita kalaafanna'e kootan ka Waaqa Isira'eeliti ulfeena daassan ikka takkapunu ishin ka Waaqaddaasin isho piitaayshin qara harkaadi maysada.

⁶ Akkima xatta orra Kipsi isho Feri'ooni karittaaysho kokkonnayshen mina'e, maana'e karittayshin kokkonnaannittan? Waaqa Isira'eeli ete Kipseeta payyahashe kammaayye, samaytase a Isira'eeli kamma xata in diinne ikka in sookne?”

⁷ Semmalla amma kaarreetta haraya kodada ka okkaya lakki a luukinna, a apari opani qara qanpara in qaasnini qeeda ka nyalqaasso ishootta kela alle qeeda ka tikopa kalsha. Ka okkayasene kamma kaarreettase hidda.

⁸ Ka taapotase a Waaqa qeeda ka kaarreettase qara xaaya ka pahanaddasene a warqeeta a kalisoota ishin dapaytati kootene ka ishi erkinittane saatineeta kara xaayaaw. Ka taapotase kapa'ew kaarreettase qara xaaya ka oori kaarreettase kammadesa diisha ikka xaadi qara aano.

⁹ Ka tooya, oton Peeteshemishi hamintase xaadipa anniiyyi, asseeyye Waaqase a Isira'eeli'i ino qara rakkoose kutta qeede. A taakiti akkima rakkoose isha ino qara in qeennin ikka asse patta koddite in upnaanna.

¹⁰ Orrase ka akkimoose qara kode. Ka okkayasene luukinna lakki qeede ka kamma kaarreettase hidde ka nyalqaasso tika kara dufen.

¹¹ Ka kaarreettase qara'e, taapotase a Waaqa xaayen. Ka saatinetase a pahanaddasene warqeetoppa kodame a qappaaja ka a tapaya kaarreettase qara taapotase kapa xaayen.

¹² Okkayasene ka aakkitta ka pittittopa in kiinin mali Peeteshemeshi minandesa jib kiden ka a iyyinaan quda pora olliiyyi aanen. Mukissampaya Filisteemi ka haka xeela Peeteshemeshi ishootta kamma aanen.

¹³ Sitiiyyi orra Peeteshemeshi naaba karaaye kappa mujanni ka ela kiden ka taapotase akken ka a kuttati xasooden.

¹⁴ Kaarreettase dula a nama takka a a Iyyaasu kidammo a Peeteshemeshi oppa kaye ka shila takka kutta kapa qa'ade. Orrase ka qora kaarreettaseti faate ka okkayasene kalisoota kupannitto kode ka ishin Waaqa dehayshe.

¹⁵ Orra kafa Lewwi kodde ka taapotase a Waaqa isho saatineetase isheetta kapa kitto a karaayye pahanaddasene a warqeeta caan lekkishe ka shilase kutta qara' xaaye kuyyaasetiiyyi orra Peeteshemeshi ka kalisoota kupannitto isho kalisowwa pila kuli Waaqa kalshen.

¹⁶ Mukissampayasene a Filisteemi keni piisa ka sede akken ka awse'ew katama Eqrooni opa tiitaawen.

¹⁷ Pahanaddasene warqeetoppa kodame a qappaaja keni, a Filisteemeta kalisoota ishin dapaytati koote ka Waaqa erkite, takka qoota katama Ashtootiti desa ka takka qoota katama Kaasaatidesa ka takka qoota katama Asqeloonatidesa ka takka qoota katama Kaatiti desa ka takka qoota katama Eqrooniti desa dehassa.

¹⁸ Akkimose mina'ew, pahanaddasene warqeetoppa kodame a tapaya, matta katamaddasene kapa kawwatta qapa isho palewwa kapa kawwatta in qapnini, isasene a mukissampaya a Filisteemi keni mukinnaane a mina. Shilase kutta dula a Iyyaasu a Peeteshemishitta oppa co, a qara' taapota Waaqa lekkishen nefo haka awweti maakkitta.

¹⁹ Qoota taapota Waaqa karanxata tooyyaden malla Waaqa ka orra Peeteshemeshi oppa'e, nama kunda tappa leyshe. Qoota Waaqa orra kuttayta ishoottoppa leyshe malla, samayta ka a kuttati pooye.

A taapotase a kodayteeta Waaqa Qiriyaatiyaarimiiyyi kitto

²⁰ Orra Peeteshemeshi ka kaassade kide, “Ka kuli qulqullittose a Waaqa Poqalla tura'e ayno qa'atta ettansha? Taapotose xaadi nefo ayno kapopa alle ino kapa haadan?

²¹ Ka oori orra katama Qiriyaatiyaarimi oppa kalo kapopa orra erken ka kidene, “Filisteemeta itaapota Waaqa oorisseey, lekkada ka opeela qeedada.”