Mataafa Saamu'eeli a paayyota 4 - Mataafa Qulqulloota

Poojamitta a taapota

¹ Isira'eeleta ka Filisteemeta torpa tuulte ka Apeeneseri kara safarte. Filisteemeta ka Afeeqi kara safarteew.

² Filisteemeta ka Isira'eeleta torpeeta porra qapatte ete orana ollin koopeeyye, Filisteemeta ka Isira'eeleta putte. Ka orannaappa nama kuma afuri mina co ishoottoppa lesse.

³ Ete xelase a oranna a Isira'eeli safaroppopa kaleeyye, qimaya Isira'eeli ka ikidene, “Waaqa awwe maana malla akkan Filisteemeta kela putammo kode? Akka Waaqa ino olli tuulo ka harka nyaappinno kela inon paho'e anna ka taapotase a kodayteeta Waaqa Seelo karaayye qeenna.

⁴ Samayta ka Seelopa orra erke. ikka taapotase a kodayteeta Waaqa a we piisa ettaninnooti a isase kirupeelewwa otantoppa'e ulfeenan kuti'eti eeyye qeede. Hellaasene a Eeli lakki Hofini isho Finihaasi nefo taapotase a kodayteeta Waaqa olliiyyiiw eeyye caan.

⁵ Ete taapotase a kodayteeta Waaqa safaroppa kayteeyye, samayta Isira'eeli piisa ka kuttumtan uuyade, piita ka kela duutite.

⁶ Filisteemeta ete uuyatase dakayteeyye ikiite, “Safara Iproota oppaayye ata uuyata maana'e ollin koope?” Ka akkima taapota Waaqa safaraaysho oppopa kullite upnaaden.

⁷ Filisteemeta ka fuurte ka kiite, “Ha Waaqa safarase oppopa de'e. Wa asse paha turan in koddineey oo ino kido!

⁸ Oo ino kido! Hupna a waaqaddosen kokkoka kelaayye ayno inon paha? A erkannawwa ika lekaytan orra Kipsi koommaytoppa pire waaqaddosen ishootta.

⁹ Oo Filisteemi xormume ka diirumaayti akkishe. Akka Iproota xatta ke kela karpishshumte mina'e, akka isheetta kela a karpishshummini'i, kokkonnaado ka a hamiyya mina torpe.”

¹⁰ Filisteemeta ka oranase torpite ka Isira'eeli putte. Nama piisa ka alle tukkanaadi kelopa qahe. Orra kuttayta ka pirame Isira'eletoppa xela oranna a loqqaan anna nama kuma kunda sessa ka pirame

¹¹ taapotase a Waaqa nefo ka poojamte hellaasene a Eeli lakki Hofini ka Finihaasi kuli ka le'en.

Toota Eeli

¹² Kuyyaasetiiyyiiw kafa Piiniyaami oppa nama takka ka mehadda isquda kakkaa'e ka mattoppa kuyyaalayta fidade ka pora orannaati keerittan kale ka Seelopa de'e.

¹³ Ete eeyye kayeeyye, Eeli qoota taapota Waaqa malla qaapni ka parjumaadi qara pora kapa kuti'e ka minaadesa tooyanni. Ete namase katamaappa kaye ka otoota leleeyye, katama piisa ka ullupitta xaashen.

¹⁴ Eeli ete nessase a ullupitta dakayeeyye ikide, “Ini ullupitta maana?” Namase ka jarjartan keere ka otootase Eeli lelew.

¹⁵ Sitiiyyi Eeli paraadi kunda sakali sette ildaadi nefo iqara lulen, umma paata akkini in co.

¹⁶ Namase ka Eeli kide, “Ha orannaappan kalli. Ka awwe orannaappaayye qahe.” Eeli ka kide, “Ka kuli innaayyo maana kodde?”

¹⁷ Namase otootan kale ka ishi oorshe ka kide, “Ha orra Isira'eeli alle Filisteemeta tura qahe. Xelase a oranna oppa orra kuttayta ka pirame. Hellaatti lakki Hofini isho Finihaasi kuli ka le'en taapota Waaqa nefo ipoojamte.”

¹⁸ Ete namase taapota Waaqa maxxa daweeyye, Eeli xarrase a katama kapaayye parjumaadi qara iskammandesa pi'e. Ka qoota nama qime kodde ka ulsi malla xolmaandesa qepe ka to'e. Isha para kunda afuri Isira'eeli qara taanynyume.

Toota iskatteeta Finihaasi

¹⁹ Haantota a innaadi a Finihaasi sitiiyyi, inna karittoppa qapta ka xaaya kayte. Ete otootase a poojamitta taapota Waaqa isho a toota diirtaadi ka a aappa opa diirtaadi dakayteeyye, xaaya isheetta qape, ikka kilpiippatte ka xaayte.

²⁰ A toonittooyye, iskatteeta isheetta xaaysannitto ka ishi kiini, “Inna diirta'e xaayteey in furan” Umma isheetta in upnaanne, umma oppa in oorinne.

²¹ Ma qoota taapota Waaqa poojamte malla diirtaadi isho aappa opa diirtaadi ka le'en malla, “Ulfeena Isira'eeli qara tawe kiite ka innaseneti maxxa koote ka kiite Ikaapoodi”

²² Ka kiiteewwe, “Qoota taapota Waaqa poojamte malla ulfeena Isira'eeli qara tawe.”