Mataafa Saamu'eeli a paayyota 31 - Mataafa Qulqulloota

Saa'ooli isho hellaadi akkima le'en

¹ Filisteemeta ka irroota Kilpo'a qara Isira'eeleta torpite, Isira'eeleta ka alle qahate. Isheetta ka Isira'eeleta oppa lekaya lesse.

² Filisteemeta xoori Saa'ooli isho hellaadi kammaaw xopta dawte ka hellaa ishootta qannisse ka hella Saa'ooli; Yonataani ka Apinataapi isho Melkisa lesse.

³ Oranna kokkoka qoota Saa'ooli kapa maren malla, orra lawa pokno ka Saa'oolin teye, ikka a kuttati qarame.

⁴ Saa'ooli ka xayyoolayse isha kela meeha oranna haano kide, “A sene dawra qara in murannini ana ishshan ka anoppa kahadan kapa; atti koraatetaayti yukado ka alle ana ishshe, isha xoori ifuure ka isha ikassa tiite. Saa'ooli ka qarta koraatetaadi iskelopa oorshe ka qara pi'e.

⁵ xayyoolaytase isha kela meeha oranna haano ka ete akka Saa'ooli to'e akkeeyye, isha kuli koraateta mattaadi yukadeew ka qartaadi iskelopa oorshe ka qara pi'e ka Saa'ooli olliiw to'e.

⁶ Saa'ooli ka hellaadi sessa ka nama isha kela meeha oranna haano isho xela a Saa'ooli olli anno piisa ka awseew kuyyaaseti isha olliiw le'en.

⁷ Isira'eeli a Yurtaanoosiiyyi qinda piirtotatin kalto isho naabase a Iyyisira'eli tula afa disitiiyyi kitto ete akka xela oranna a Isira'eeli alle qahe Saa'ooli isho hellaadi ka le'en dakayteeyye, katamaddaasso'e alle diisse ka oppa alle qahate; Filisteemeta ka dete ka katamaddaasso piisa qara pirte.

⁸ Kuyyaatase a orana paarraytaadiiyyi Filisteemeta ka orrase le'e quda mehadda oranna furatta deete; ka Saa'ooli isho hellaadi sessa a irroota Kilpo'a qara le'e akkite.

⁹ Ka Saa'ooli qara matta murte ka mehaddaadi a orana quda furatte ka akka tikase xaaysho a killoota ka samaytaaysho oppa otootase a putayma salishane'e, erkamampaya erken.

¹⁰ Ka mehaddasene a Saa'ooli a oranna tikase a killootaayshoti a astaarooti kela xaayen. Ka pukka a Saa'ooli katamasene a Petishanitiiyyi oxinta qara xata raa'ishen.

¹¹ Orra Yapeeshi a Kele'adi ete wa Filisteemeta Saa'ooli qara koote dakayeeyye,

¹² xormewwaasso a oranna a opani isi qara in upnin mali xa'en ka halkeesseti Peteshanipa aanen ka pukka a Saa'ooli isho a hellaadi oxinse a katama qara lekkishen ka Yaapeshipa kalen. Ka apittan kupen.

¹³ Ka lafaasso qeeden ka katamaappa qoyra takka taamaari sike kidammo kela hawlen ka haka kuyyata tappaati damta musaden.