Mataafa Saamu'eeli a paayyota 30 - Mataafa Qulqulloota

Akka Amaleqeeta torpamte

¹ Kuyyaata sessattatiiyyi Taawwiti isho orraadi ka tiitaawen ka Siqilaaki kayen, Amaleqeta ka shootta turan piitase qinda tupattati qatto isho Siqilaaki torpite ka Siqilaaki apittan kupte.

² Ka iskatta ka hellaa isho nama qime ka wa kara ca piisa poojte. Ma xoori in lenne ma iqeette ka ishin tawte.

³ Taawwiti isho orraadi ete Siqilaaki kayneeyye katama ikupaden iskattaaysho ka hellaasso a diira isho a tuparra ipojamen ka tawen.

⁴ Taawwiti isho orraadi ka haka qoota, ishootta kara pannito ullupen ka pooyen.

⁵ Iskattase a Taawwiti lakki Iysira'elitteetase Akinahoomi isho Qermeloositteetase a Naapali qara to'e Apikiyya kuli ipoojamen.

⁶ Orraase qoota iskattaaysho isho hellaasso tura a diira ka a tuparra tura poojamen malla akata miiroden ka akka dakaddaan Taawwiti dakkane'e oorsaden. Taawwiti ka akata qaapa qara pi'e. Ma xoori Waaqa Poqallaadinni karittaadi kokkonayshe.

⁷ Taawwiti ka qeesittase Apyataari inna Apemeleki kide, “Ohaatase a qeesuma efuudin ana xooye.” Apyataari ka ishin ishi de'e.

⁸ Taawwiti ka Waaqa kaassade ka kide, “Hela orroose ino torpe kadan kamma aana in qaqqaapa?” Waaqa ka ishi kide, “Iqqaqqaapta ka qara poojetose oorissaay kamma aane.”

⁹ Semmalla Taawwiti isho orrase isha quda co nama dippa lehi ka xa'en; ka kamma aanen, ete kirra Posoori kapa kayeneeyye, ishootta oppa orra lamayta ka kirra Posoori kapa hase.

¹⁰ Maana malla ishootta oppa nama dippa lakki kirrase tuulleeta in ettaninneey. Taawwiti isho nama dippa afuri xoori, orrase qaqqaapa'e kirra Posori tuulen ka anta kammaaw caaden.

¹¹ Isasene tuule ka ittura xayyoolayse takka a Kipsi koommaytoppa akken ka qapen ka Taawwiti kapopan de'en ka damta ka pisha ishi daashen. Ikka dame ka ikke.

¹² Ka qoomayta luukkata hilteeta laaqqota quda paka takka isho qoomayta a wayneeta horkooka lakki ishi daashen. Ikka damttase dame ka nessa oorsade, maana malla ha kuyyaata sessa ka halkeetta sessaati damta in in damme; umma pisha in ikkneey.

¹³ Taawwiti ka ishi kide, “Atti a orxayta ayno? Ka ayshaayye deeni?” Isha ka kide, “Anti an Kipsitta ka an karpishsha Amaleqitta takkati, kuyyata sessa turannen paaqan makke Poqallaayyo ka ana diishe ka alle ana kapa tawe;

¹⁴ sede turanne, Kelitaata a qinda tupattati kitto ka piita Yihuta isho qinda tupattatin piita Kaalepin torpine ka Siqilaaki apittan kupne.”

¹⁵ Taawwiti ka ishi kide “Amma pora oppa torpampayoosen caanepa i'anan anta?” xayyoolaytase ka kide, “Akka ana a ikannin taaki harka poqallaayyo oppopa ana a daannin, maxxa Waaqatin ana xaxado. Anti poroose a oppa caan in ke akkisha.”

¹⁶ xayyoolaytase ka ete Taawwitin aane ka porase a oppa torpampayasene caan oppan ishootta kaye. Qoota poojeta akata kutta poojan qaran xaate'e, pora pora oppa'e oli qooten ka damen ka iken ka kirpoppa caan.

¹⁷ Taawwiti ka kallapseti paayyatte shootta qara oranna qishshe ka haka paarri kalakalati ishootta torpe ka ishoottoppa xayyoolayse nama dippa afuri a kaallaan kulufna ka qahe maliiyyi a kela pahe takka nefo in co.

¹⁸ Taawwiti ka poojetase a Amaleqeeta ishootta tura qeette piisa ishootta qara kate; ka iskattaadi lakki piisa qeede.

¹⁹ Umma wa Amaleqeeta poojte a shakka ka a qime ka hellaa ka iskatta a we takkan oppa in qajinin mali piisa oorshe.

²⁰ Ka xelloota a kahirra isho a telella piisan pahe. Orraase isha quda co ka horeetase xaaysho itturandesa qulli ka kiini, “Ha sede piisa poojeta Taawwiti!”

²¹ Taawwiti ka orrase kakkafade ka kirrase a Posoori kapa nessade nama dippa lakki kapopa tiitaawe. Ishootta ka Taawwiti isho orrase isha quda co teyyattaa'e ishootta mina mina aanayta aanen. Isha ka ishootta kapopa heqqe ka ishootta qara nakayta kaassade.

²² Orrose Taawwiti quda co oppa ukkuttowwa ca ka kidene, “Ishootta ino olliiyyi in tuulleey, poojetinno oppa we takkan nefo in qoottadan ma iskattaaysho isho hellaasso patta qeedadan.”

²³ Taawwiti ka ikide, hellaanno! Putayma a Waaqa ino daashe qara'e wa ase paha in kodan! A'ino tooyte ka akan paarkaalaanno punno kode Waaqa,

²⁴ wossene a ishina kiinittane in paxaaran; a mehadda tooyte ka a oranna aane piisa oli qara in qapooy, waan poojetoppa qeenne piisa a olimina kikitton qootanna.”

²⁵ Taawwiti haka awseti paayyatte haka awweti'i sede Isira'eeleta seera isho aatayteeta kode, orra ka ishin kallaanni.

²⁶ Taawwiti ete Siqilaaki kayeeyye, poojetase a oorshe oppa paka takka qeede ka daltayasene xaadi qimootas a Yihutaati erke ka kide, “Sede poojeta a paarkaala Waaqa qara qeedamteey teyyada.”

²⁷ Ka poojese oppa a demo kaffa a Peteli ca ka Yihutaayye qinda tupattatin Raamaayye ca ka akkamose mina'ew kaffaadi a katamadda Yateri kara ca piisa erke.

²⁸ Ka sede maliiyyiiw, a katama Aaro'eri kara caati ka a Sifimooti caati ka a Eshtemo'a isho

²⁹ a Raakali caati ka akkamose mina'ew, sanynyeeta Yirahimeeli ka a Qenaatati

³⁰ ka a katamadda Horma ka a Porashani ka a Ataki isho

³¹ a Keprooni kara kala piisa erke. Ka sede maliiyyiiw, orra porrasene a turan Taawwiti isho orrase isha quda co oppan aane oppa kalo piisa poojewwosen erke.