Mataafa Saamu'eeli a paayyota 3 - Mataafa Qulqulloota

Akkima Waaqa Saamu'eeli isi upnayshe

¹ Innasene Saamu'eeli ka Eeli kela Waaqa koda kooni. Parroosen karaayye Waaqa tapo orra haasawanni in co. Umma kelashaata tapo opani akkini in caan.

² Sitiiyyi Eeli qara ilda lula ipaayyen ikka paata akkini in kinnin ka poraadippa muke.

³ Saamu'eeli'iw, tukkanase qulqullaawe a Waaqa kelaayye porase a taapota Waaqa kitto kara muke umma ipsa Waaqa ata in libbine.

⁴ Waaqa ka Saamu'eeli hale ikka ehade

⁵ ka Eeli kapopa keere ka kide, “In de'ey maana'e ana haleete?” Eeli ka ishi kide, “Anti an ke an haleeneey aane muke.” Saamu'eeli ka tiitaawe ka mukke.

⁶ Waaqa ka lammatta Saamu'eeli haleew, ikka xa'e ka Eeli kapopa aaneew ka kide, “In de'ey maana'e ana haleete?” Eeli ka ishi kide, “Innaayyo anti an ke an haleeneey, aane muke”

⁷ Saamu'eeli seturan Waaqa in upnaanne. Umma qaaleta Waaqa seturan ishi in dakaanne.

⁸ Waaqa ka a sessattati Saamu'eeli haleew, ikka xa'e ka Eeli kapopa aane ka kide, “In de'ey maana'e ana haleete?” Eeli oori akka Waaqa innasene haleeno upnaade.

⁹ Ka Saamu'eeli kide, “Aane ka muke ka oton amma ke haleeniiyyi kide, “Anti orxaytaayti in dakayniiy, Waaqqo haasawado” Saamu'eeli ka tiitawe ka poraadippa muke.

¹⁰ Waaqa ka de'e ka eeyye qa'ade ka akkamase a deyyo mina isha hale ka kide, “Saamu'eeli Saamu'eeli” Saamu'eeli ka kide, “Anti orxaytaayti in dakayniiy haasawado.”

¹¹ Waaqa ka ishi kide, “Tin anti wa nama dakayo piisa tammaqsha takkanen dehaynittoppa Isira'eeli kara koda.

¹² Kuyyaasitiiyyi, paayyote paayyatte haka piraampirati waan qoota Eeli isho a toolaaditi desa haasawade piisan Eeli qara koda.

¹³ Qoota hellaadi issi nyalinnaan isha ka ishootta in dawrinin malla, juppoota a upo malla akkiman haka paraparati toolaadi qatta'o in ishi lele.

¹⁴ Semmalla juppoota toola Eeli, lammatta kalisoota taaki daassatan in patto kide ka toola Eeli qara xaxanni.”

¹⁵ Saamu'eeli ka haka parinitto muke ka xa'e ka xarrada tika Waaqa pappane. Ka kelashaatase Eeli leleeta fuure.

¹⁶ Eeli xoori Saamu'eeli hale ka kide, “Innaayyo Saamu'eeli,” Saamu'eeli ka ehade.

¹⁷ Ikka isha kaassade ka kide, “Waaqa maana ke kide? Ana tura in juutan. Oton wa Waaqa ke lele oppaayye we takkan ana tura juuttaayye, a Waaqa wa akata neeqa ke qara kodo.”

¹⁸ Saamu'eeli ka we piisa ishi torre umma we takkan nefo tura in juunne. Eeli ka kide, “Ishi Waaqaay, wa ishi aaka a kodo.

¹⁹ Ete Saamu'eeli kuttattaan annooyye Waaqa ka isha olli caanni. Umma qaaletaadi oppa a koddito mali takka nefo hasni in kitto.

²⁰ Katama Taaniti paayyite haka Persaapeti'i, akkima Saamu'eeli xuumampayta Waaqa kodde samayta Isira'eeli piisa ka upnaade.

²¹ Waaqa ka Seelo kara issi akissa kammaaw caade ka eeyye kara qaaletaadi qudan Saamu'eeli issi akkinni. Qaaleta a Saamu'eeli haasawanno samayta Isira'eeli piisa ka teyyanni.