Mataafa Saamu'eeli a paayyota 29 - Mataafa Qulqulloota

Akka Filisteemeta Taawwiti shiishte

¹ Filisteemeta Afeeqipa xelaadi a oranna piisa haleete. Isira'eeleta ka elase naaba Iysira'eli kara co kapa safarteew.

² Saarra a Filisteemi ka xelaaysho a oranna oppa nama dippa dippa isho kuma kuma kitte. Ka tuulte. Taawwiti isho orrase isha quda co ka ollin xelase a oranna kamma qaten ka tuuleneew.

³ Ajajampaya a xela oranna Filisteemeta ka de'en ka Taawwiti isho orraadi akken ka kidene, “Ata Iproota maana are kooniiw?” Ankusi ka ishootta oorshe ka kide “Sede xawwi Taawwiti orxaytase a nuqusa Isira'eeli? A Saa'oolinni? Ha isha kiseeta kutta'e ana kapa kallaade; isha a ana kapopa oore paayyatte haka awweti dapa takka nefo isha qara an akkine.”

⁴ Ajajampaya a xela oranna Filisteemi xoori imiirooden ka Ankusi kidine, “namoose eeyye co akka ino olli oranna in tuullin ka desa in oorrin ka ino in torpnin katama ishi daasse oppopa isha tiitayshe. Isha poqallaadi olli araarama malla orrinno qara mattaada quureeta mali wa dikanna maana?

⁵ Isase a iskatta qootaadi desa kirpino ka kiino, ‘Saa'ooli kuma leyshe’ Taawwiti ka kuma kudani leyshe kiden ka isha saarinnaan Taawwitise ishanne?”

⁶ Semmalla Ankusi ka Taawwiti hale ka ishi kide, “Waaqa caattampaytannen xaxanni atti a orxayta amaname. Ka ana olli oranna tuulteey, kati ana olli oranna torpinittaayye, alu atta ana paxaari. Haka ana kapopa deete paayyatte haka awweti'i dapa ke qara an akkineey. Ma xoori ajajampaya a xela oranna Filisteemi ke in heenan,

⁷ amma oori alle tiitaawe ka nakaytan kale ka ilta a saarra Filisteemi tura wa neeqa in kodan.”

⁸ Taawwiti xoori ikide “Poqallaayyo maanannen dape? kuyyata an ke kapopa de'e paayyatte haka ammati oto dapa ana qara in akkaanniniiyyi paarkaaladda a poqallaayyo a nuqusa torpeeta maana'e ana dawra?”

⁹ Ankusi ka Taawwiti kide, “Ha atti a xayyo desa akka erkampattoota Waaqa mina akka qaja a qapnin in ke upa; ma xoori saarra oranna a Filisteemi'i ikiini, ‘Ino olli orana tuuleeta isha parpaaccisni in kitto.’

¹⁰ Semmalla orxayasene a poqallaatti ke olli de'e, olli parri paraappan xa'e ka poraayshin opa alle tiitaawa.”

¹¹ Taawwiti isho xelase isha quda co ka parraytaadiiyyi paraappan xa'en ka alle Filisteemipa tiitaawen. Filisteemeta ka Eeyisira'elipa orannaseniti tuulte.