Mataafa Saamu'eeli a paayyota 28 - Mataafa Qulqulloota

¹ Kiseese karaayye Filisteemeta ka Isira'eeleta torpa'e xelaadi a oranna ollopa oorsatte. Ankusi ka Taawwiti kide, “Ke isho xelaayti a oranna akka ana olli oranna torpitan upnaado.”

² Taawwiti ka Ankusi kide, “Wa orxaytaayti koda kuli akkita. Ankusi ka ishi kide, “Ipaxaari! Anti hakan co'e tooytampaytiyyo a ulfeenati'in ke kodada.

Saa'ooli akka so'ayteeta kaarayya haleenitto soosade

³ Sitiiyyi Saamu'eeli ito'e; Isira'eeleta pisa ka isha pooysatte ka katamaadi a raama kara isha hawlite. Aren Saa'ooli seturanne Isira'eeli kara so'aya isho orra kaarayya haleeno piisa alle daane.

⁴ Xela a Filisteemi ka tuule ka katama Sunaami oppa safare. Saa'ooli ka Isira'eeleta piisa ollopa qeedeew ka irroota Kilpo'a qara safare.

⁵ Saa'ooli ete xela oranna a Filisteemi akkeeyye itammaqe ka akata fuure.

⁶ Ka malla Waaqa qinsade, Waaqa xoori olsaappanne taaki urimippan taaki xuumampayaappan oppa ishi in oorinne.

⁷ Saa'ooli ka orxayaadi kide, “Aana ka iskatteeta a karayya haleenitto ana fada; isheetta qaran dehaama kaassadaay.” Ikka ishi kidene, “Ha iskatteeta takka a Initoori'i eeyye ca.”

⁸ Saa'ooli ka mehaddaadi pursade ka nama pila pahanade ka isquda nama lakki qeede ka halkeetteeyye otomalaappa xa'e ka iskatteetase kapopa aane, ete kapa kayeeyye isheetta kide, “Hapura suumatin ana kaarayya kaassado ka nama an anti ke lelo ana xaashe ikka wa itturopa kodda ana lelo.”

⁹ Isheetta xoori ishi oorisse ka kiite, “Saa'ooli akka piita Isira'eeli oppa so'aya isho orra kaarayya haleeno alle pashshe i''uptaay, ata maana'e akkan to'o'e ana turuura qaasni?”

¹⁰ Saa'ooli ka isheetta kide, “A dukaata Waaqa caattampaytatinnin ke xaxanni. Wossen minanne, wa neeqa ke qara in kayan ka maxxa Waaqatin ishi xaxade.”

¹¹ Iskatteetase ka kiite, “Ka kuli aynon ke xaasha?” Isha ka kide “Saamu'eeli ana xaashe.”

¹² Isheetta ka ete Saamu'eeli akkiteey, ullupita oppa qaallite ka kiite, “Atti a Saa'ooliiyyi, maana'e ana sassapatte!”

¹³ Isha ka ishi kide, “In fuuran! Ma maana akkini: ikka kiite, “Hapura takka piita kareela sooknon akkini.”

¹⁴ Isha ka kide, “Pissaadi atta paha?” Ikka ishi kiite, “Qimayta takka kaappa kalsade sookni.” Saa'ooli ka namoose akka Saamu'eeli kodde upnaade ka isha ulfeessa malla piita kilpiippe ka fuula piitan kaye ka kaareta ishi oorshe.

¹⁵ Saamu'eeli ka Saa'ooli kide, “Ata maana'e ana qara nessuma dawrite? Ka maana malla ana xa'isse?” Saa'ooli ka kide, “Ha anti rakkoota kokkoka karan ca! Filisteemeta ana torpini Waaqa nefo i'alle ana diishe, umma xuumampayta taaki olsa nefoppanne ana olli hasawanni in co. Semmalla maana koda akka ana parpaaccisnitto akka ana lelto mallan ke halacciise.”

¹⁶ Saamu'eeli ka Saa'ooli kide, “Ete Waaqa alle kediishe ka paarkaalaatti koddeeyye, maana'e pora ana halacciisni?

¹⁷ Waaqa wa ana qidan ke lele piisa dikissa qara ca. Mankisteetaadi nefo ike qara qeede ka kantittaayti Taawwiti daashe.

¹⁸ Atti qoota qaaleta Waaqati a ajajammin ka Amaaleqeeta qara miirase xaadi kutta a qeennin malla Waaqa awwe ke qara asse kode.

¹⁹ Waaqa ke isho Isira'eeleta piisa harka Filisteemeta oppopa tarpisha, parriiyyi ke isho hellaati poroose an anti oppa co oppopa deetan. Waaqa ka xela oranna Isira'eeli harka Filisteemeta oppa'e daasha.”

²⁰ Saa'ooli ka lelase a Saamu'eli quda tammaqe ka piitopa pi'e ka piita deraade; qoota halkeesse isho kuyyaaseti damta in dammin malla akata makke.

²¹ Iskatteetase ka Saa'ooli kapopa deete ka akka akata tammaqe akkite ka ishi kiite, “Tin ana orxayteetaayti lelaayti in dakaye ka karitta isi qara kutade ka wa ana lelte kode.

²² Amma ati'iw lela a orxayteetaayti dakaye. Akka damto ka hupna a ishin kalto akkatto'e ana dammta shakkayteeta ke dehaysho ka dame.

²³ Isha xoori itiite ka kide, “An damo; ma xoori orxayaadi iskatteetase olli isha naappade ikka ishootta dakaye ka piite xa'e ka alka qara kuti'e.

²⁴ Iskatteetase innaayya a sa'a, a kappade'e jarjartan qalte ka daamma shakkayta qeette ka tiqqiirte ka laaqqota laqqite.

²⁵ Ka damtase Saa'ooli isho kodampayaadi daasse ikka damen ka halkeessetiiyyiiw eeyye xa'en ka tawen.