Mataafa Saamu'eeli a paayyota 27 - Mataafa Qulqulloota

Akka Taawwiti Filisteemipa aane

¹ Taawwiti ka iskaran xata dikade ka kide, “Awwta takkaayye Saa'ooli ana ikassa in diishooy, amma piita Filisteemi opa qaheeta ana wayyi. Sitiiyyi pattaayye Saa'ooli Isira'eeli kara ana pora fada diishaay, anka seden isha kela paha.”

² Taawwiti isho xelase isha quda co namase dippa lehi ka oori xa'en ka nuqusase a piita Keetti Ankusi inna Ma'ooki kapopa aanen.

³ Taawwiti isho orrase isha quda co ka toollaasso ollin Keetti kuti'en, Taawwiti ka iskattaadi lakki Eeyisira'elitteetase Okinihoomi ka Qermeloositteetase a Naapaali qara to'e Apikiyya isha olliiw caan;

⁴ Saa'ooli ete Taawwiti Keettipa qahe, ise a pora isha faano alle diishe.

⁵ Taawwiti ka nuqusase Ankuusi kide, “Oton i''ana jaalanniiy, piisse oppa akkan katama takkan oppa kallaado'e, ana daashe diisheey anti orxaytaayti attan katama nuqusa kara ke kapa kallaada?”

⁶ Semmalla Ankusi ka awsetiiyyi katama Siqlaaki Taawwiti daashe. Awseti paayyatte Siqlaaki ka katama a nuqussa Yihuta qapaden koddite.

⁷ Taawwiti ka piita Filisteemiti'i para takka ka leya afuri kallaade.

⁸ Taawwiti isho xelaadi a oranna ka ollin tuulen ka Keshuurata ka Kerisaata ka Amaaleqeeta torpen. Samayse a torpen xattaaw piisse Suuri paayyatte haka Kipsiti kitto oppa kalan.

⁹ Taawwiti awta piita takka torpinooyye, diira isho iskatta piisa alle lenni ka pirri. Ka kahirra ka lo'alla ka harrewwa isho kaalla ka ohawwa piisa tura poojni ka Ankusi kapopa tiitanni.

¹⁰ Oton Ankusi isha kassanni ka kiini, “Awwe qinda a xaamenne tuulteneeyye,” Taawwiti i'ishi oorinni ka kiini, “Piita Yihutaatiiyyi qinda tupattatin kitto opan tuulle. Taakki xeela Yirahimeli oppa kalo taaki xeela a Qenaateta oppa kalto oppopan tuulle.”

¹¹ Taawwiti akka pora isha in torrinin qoota fuure malla, porroosen a oppopa tuule oppa diira ka iskatta a co piisa alle lenni ka pirri diisheey, takka nefon Keetipa kalli in co. Parra a Filisteemi kallaade pisa oppaayye asse kodaanne tarpishe.

¹² Ankusi iskaran xata dikade ka kide, “Taawwiti qoota Isira'eletoppa needdame malla, haka cooyye orxaytiyyo kodda ka isha amane.”