Mataafa Saamu'eeli a paayyota 26 - Mataafa Qulqulloota

Taawwiti a lammattati'i Saa'ooli ishshaata qara oore

¹ Orra Sifi ka kipi'apa aane ka Saa'ooli kide, “Ha Taawwiti koommayta Yesemooni minaadesa kunkunnaata Ekela qara dekade ka eeyye ca.”

² Saa'ooli ka jarjartan xa'e ka orra xela oranna a Isira'eeli oppa reexame nama kuma sessa isquda qeede ka koommayta Sifi opa Taawwiti pora fada tuule.

³ Saa'ooli pora a kunkunnaatase Ekela qaran anno kapa'e Yesemooni minadesa safare Taawwiti sitiiyyi koommaytan xata ca ka ete akkima Saa'ooli pora isha fada eeyyepa de'e akkeeyye,

⁴ Kelopa lettissampaya erke ka akka Saa'ooli keeto eeyye kaye upnaade.

⁵ Ka xa'e ka porase a oppa Saa'ooli isho saarase a xela oranna Apneeri inna neeri muken akke. Saa'ooli sitiiyyi otantoppa'e muke xelaadi a oranna ka isha kapa tiitayshe.

⁶ Sekamma aayya Taawwiti ka Kettittase Apemeleki ka apiisa inna Suruyya inna opa Iyyo'api kide, “Ayno ana olli safara Saa'oolippopa anna?” Apiisa ka kide “Ana ke olli aana”

⁷ Taawwiti isho Apiisa ka halkeessetiiyyi, xa'en ka porase a oppa opa Saa'ooli caan opa aanen ka a Saa'ooli otanta xelaadi kara muke akken oranaadi mattaadi kapa'e piitoppa jikkame; Apeneeri isho xelaadi a oranna ka isha kapa tiitayshe ka muke.

⁸ Apiisa ka Taawwiti kide “Waaqa awwe ipaarkalaatti harkaaytippa daasheey, ana oranaadiiw qeedo ka doto ka piitoppa ollin jaqqalsho, takkasew isha kayaay; umma oppa lammassa nefo in parpaaccisto!”

⁹ Taawwiti xoori i'Apiisa kide “Ishan ishshan! Nama nuqusa a Waaqa daatade qaropa harka xa'inno pahani in cooy.

¹⁰ Dukaata Waaqa'en ke lelli, Waaqadda mattaadi isha qara erkannaatan de'a; taaki kuyyaataadi kayta ikka to'a; taaki orannaappe to'a!

¹¹ Ma nama a Waaqa daate qaropa harka xa'issa a Waaqa ana qara dadwro. Ma xoori oranaadi ka shawwaadi a pisha a matta xaayade qeede ka ishin anna.”

¹² Taawwiti ka oori oranase a Saa'ooli isho shawwase a pisha patta qeede ka Apiisa ollin alle aanen. Qoota Waaqa ishootta qara mukitta kutta kate malla, ishootta mukittaappopa ollin tawen. Umma a sede piisa koddinittooyye, nama impase ka upnaade takka nefo in co.

¹³ Sekkamma Taawwiti ka afa disi opa tuulle ka kapa sekaade ka kuuta irroota qaropa fayyade

¹⁴ ka qinda a xelase a oranna isho a Apeneeripa nessa kuttan kide, “Apeneeri! Ana kela a ehatto?” Apeneri ka kide “Atti a ayno ka asse nuqusa qara pora ullupni?”

¹⁵ Taawwiti ka kide “Apeneeri atti Isira'eeli karaayye a xormitta kokkokanne? Ka kuli mana'e poqallaatti nuqusa tooyta diisse? Nama takka ka poqallaati ikassa de'e.

¹⁶ Apeneeri Waaqa caattampaytannen dukaatan xaxanni; wa paxaara a koone; nuqusa a Waaqa daate a tooytineey, ke isho orraayti le'eta ishin parpaaccisni! Amma laadi orana isho shiwwayta a pisha a matta nuqusaati ca aysha caan?”

¹⁷ Saa'ooli ka nessa Taawwiti upade ka kaassade ka kide, “Innaayyo Taawwiti hela sede dukaata'en nessaayti?” Taawwiti ka oorshe ka kide, “Aa poqallaayyo nuquso! Sede nessiyyo.

¹⁸ Ata poqallaayyo maana'e ana orxaytaayti kamma pora daanni? Maanan nyapalshe? Maanaannen ke dape?

¹⁹ Poqallaayyo nuquso amma nefo akka ana orxaytaayti dakayto'en ke naappanni; oton Waaqa ana qaropa ke xaasheeyye, a kalisoota unta teyyado; ma xoori oton orra ana qaropa ke nyarsheeyye, i'ana kidene aane killowwa sakatado ka qoottota Waaqa oppa ana daaneneey, fuula Waaqa tura a jiijamen.

²⁰ Amma nefo akkama nama irroota qaropa koskorta kama kunno mina'e nuqusa a Isira'eeli ana kamma deeniiy, diikiyyo akka Waaqa kapa sekaado ka piita qara tuqamo in kodan.

²¹ Saa'ooli ka kide, “Innaayyo Taawwiti keeton ishin dape ma tiitaawe ka ana kapopa xooye; anti lammata wa neeqa ke qare an kodooy, ati halkeesse a awwe oppa toota kela i'anan pahate, anti xoori in eepume ka dapa akata kutta kode.”

²² Taawwiti ka oorshe ka kide, “Tin oranaayti a nuqusa are caay, orraaytippa nama takka a de'o ke qeedo.

²³ Waaqa akka amanumadi ka a hanqeellumaadi mina'e a isha nama daasho, ma Waaqa allu awwe harkiyyoppa'e ke kate, anti ka kide nama a Waaqa daatade qaropa harkiyyo an xaasho.

²⁴ Akkamase an anti awwe napseetaaytin pahe mina'e, a Waaqa asseew rakkoota kela anan paho ka ana tooyto!”

²⁵ Saa'ooli ka Taawwiti kide, “Innaayyo, Taawwiti a Waaqa ke sako! Ha atti wa kutta'e koota ikka ke koddan.” Taawwiti ka pora opa anno opa aane, Saa'ooli ka tikaadipa alle tiitaawe.