Mataafa Saamu'eeli a paayyota 25 - Mataafa Qulqulloota

Toota Saamu'eeli

¹ Saamu'eeli ito'e, Isira'eeleta piisa ka ollopa xoorte ka isha pooyte, ka Raamaayye enna tikaadi oppa isha hawlite. Sekammaayye Taawwiti ka koommayta Faraani opa lekkade,

Taawwiti isho Apikiyya

² piisse a Ma'oni oppa katama Qermeloosi karaayye teyantoolayta takka sanynyeeta Kaalepippa dalade Naapaali kidamo ka ca; isha akatan teyantoolayta ka kaharra kuma sessa ka telalla kuma takka qapa ka Qermeloosi kara kaharra quda nyirfa mujini.

³ Iskatteetaadi Apikiyya kidammi. Isheetta akata qalpeeta qapta kan xarjaallitteeta. Isha xoori nama qalpeeta in qapnin kan almalitta.

⁴ Taawwiti ete koommaytase oppa cooyye, Naapaali akka Qermeloosi karaayye kahirra quda nyirfa mujno dakaye.

⁵ Ka hella xayya qapa nama kudani Naapaali kapopa erke ka ishootta kide, “Qermeloosipa Napaali kapopa aana ka nakaytiyyo ishi lela”

⁶ Ka ishi kida, ‘Paraayti a ke deraado; nakayta ka ke ka toolaayti isho wa qapta piisa koddo!

⁷ Anti amma akka kaharra qara nyirfa mujnitto in dakaye, a sikmayaatti ino kapa caaneeyye, ino ishootta qara neequmta an koone. Umma a Qermeloosi caaneeyye, horeetaysho a patte takka nefo in kitto.

⁸ Kadi orxayaatti kassatta ike lelan, amma oori kuyyaata sankultatin tikaaytipa deneey, ino ulfeesse ka wa harkoppa qapta ino orxayaatti ka Taawwiti innaatti daashe.”

⁹ Orrase a Taawwiti erke ka erkanasene Naapaalin kayen ka wa ishootta oorsha mina asanni.

¹⁰ Naapali ka orxaya Taawwiti kide, “Ata Taawwiti ayno? Inna Isseyi kan ayno? Etoosen a amma oppa orxaya poqalladdaasso kela deddekade lekaya caay!

¹¹ Hela xawwi anti putteeniyyo ka pishaayyo isho so'a an orra ana kahirra nyirfa muja sookadeeti qale'en qeeda ka orra an ayysha akka de'e an upnini daasha?

¹² Orrase a Taawwiti porase a oppa de'e opa tiitaawe ka wa ishootta kidame piisa Taawwiti torre.

¹³ Taawwiti ka ishootta ajajeka kide, “Koraatewwaassin hidada!” Ikka pisani koraatewwaasso hidaden. Taawwiti kuli ka koraatetaadi hidadeew ka orra meeha tooyto nama dippa lakki eeyye hatishen. Taawwiti ka nama dippa afuri isquda qeede ka anta xa'e.

¹⁴ Orxaya Naapaali oppa takka ka iskatteeta Naapaali Apikiyya kide, “Taawwiti koommayta oppa cooyye dela poqallaanno'e orxayaadi qara nakayta erke; isha xoori otittanne ishootta mina xata oorshe.

¹⁵ Orrose xoori orra akata paxaara umma neequmta ino qara in koone. An ishootta ollin kappinoppa kinno pisaayye, we takkan nefo ino tura in panne.

¹⁶ An kahirraanno siksanninno ka eeyye ishootta kapa kinno pisaayye, halkeetta ka kuyyaateeyye oxinta ino kodden.

¹⁷ Amma oori poqallaanno isho toolaadi piisa qara'e rakkoota neeqa'e are deeniiy, isha aren akkan nama a neeqa ka nama a kela dakayo ka in kinnin i'uptaay, attiw oppa dikado ka wa ettaninnitta kode.

¹⁸ Apikiyya ka jarjarte ka putteena dippa lakki ka taadeta wayneeta okoleeta lakki ka laha keni ka maanqa a waatame taasa keni ka qoomayta a wayneeta matta dippa ka qoomayta luukkata hilteeta a laaqame dippa lakki pora takka olopa oorisse ka harrewwa qara fee'ite.

¹⁹ Ka orxayaadi kiite, “Qatta ka ana turan desa aana. Anti ishin kamma desan deaay” Umma dirtaadi kapa we takkan nefo in lelle.

²⁰ Isheetta nefo ka harreeta qara kutiite; ete naaba karopa xata lekkannittooye, Taawwiti ka orra isha quda co mina deete.

²¹ Taawwiti ka iskaranxata kiini, “Kaata maana mallan patta namoose kalata in qapnin kela koommayse oppa horeeta tooyte? we takkan nefo ka oppa in hatammin? Isha ka wa paxaara an isha kode kapa a neeqa ana oorshe!

²² Oton asu parri parita anka inna a diirta a xaadi kodde takkan hattisha, a Waaqa ana qara wa asse paha kodo ka qaran jaalsho.

²³ Apikiyya ete Taawwiti akkiteeyye ennoow jarjartan harreetaadi qara lekkate ka Taawwiti tura kilipiippatte ka ishi kaareta oorisse.

²⁴ Ka loqqaadi kela pi'ite ka kiite, “Poqallaayyo anti orxayteetaayti atara waan kiina ana qara dakaye! Ka juppoose xaadi ana qara dike,

²⁵ poqallaayyo eepayse a nama Naapaali weti in dikan! Isha asu akka maxxaadi mina karan eepaay, poqallaayyo ha annti orxayteetaayti ete orxayaatti de'eneeyye anti eeyye an co ka an akkine.

²⁶ Poqallaayyo akka paarkaalaatti qara a haalota a qeennin a ke tooyte mattadi Waaqa; anti amma maxxa Waaqa a caattampaytatinnin ke xaxanniiy. Paarkaaladdaatti isho a ke midda faana piisa akka Napaali mina'ew kodden.

²⁷ Poqallaayyo! Daassase an anti orxayteetaayti ishin de'e teyyado ka orxayaatti daashe.

²⁸ Poqallaayyo atti qoota oranna a Waaqa torpinitto malla atti wa neeqa a dikanni a kitto. Waaqa parra lekaya ke nuqusumshaay, dapa a kode ana orxayteetaayti diishe.

²⁹ Oton nama apari ke ishshaata faaniiyyi, akkama nama mehaddaadi a kokkoka qara tooyanno mina'e, Waaqa Poqalla nakaytan ke tooyta. Paarkaalaatti xoori akka daka kulluma mina'e palaqsama.

³⁰ Oto Waaqa kippeeta ke poqallaayyo daashe mina'e paxaarumse ke dikkisho. Akka Isira'eeli qara nuqusumtooyye,

³¹ nyarrahata taaki karitta karan xata ishin dapayta takka nefo ke in dakaannin poqallaayyo atti patta quda a xaane ka haalota malla nama takka nefo a ikanneey, oto Waaqa Poqallaayyo paxaarumta kodooyye, ana orxayteetaayti dikado.”

³² Taawwiti ka Apikiyya kide, “Akkaman awwe oli akkino'e a ana kapopa ke erke Waaqa Poqala Isira'eeli a kalataysamo.

³³ Awwe akkan haalota an pooyyinini ka harkiyyon diika an tuqnini a kela anan pahe dikattose xaayti a eeppisamo ka atti kuli eeppisame.

³⁴ Akkan ke qara rakkootan an qeennini Waaqa i'anan pahe, kadi jarjartan ana mina a deenini kiiteeyye, xoori a in parinin turan akkan hellaa a diira a Naapaali piisa leyysho ka piro'en maxxa Waaqa cattampaytatin xaxade”

³⁵ Sekkamma Taawwiti ka daassatase a isheeta ishin dete isheetta qara teyyade ka kide, “Tikaaytipa nakaytan kale; lelaayti in dakayeey wa a kaassatte pisan ke koda.”

³⁶ Apikiyya ka Naapaalise sankulta a tika nuqusa pahato koda qaara co kapopa tiitaawte. Isha qoota akata maashshoode ka xasoottoppa co malla, isheetta haka parinito'e, we takkan nefo isha in lelle.

³⁷ Ete pariteeyye maashshasene ka ishoppa taweneeyye, isheetta ka sede piisa ishi torrite, ikka tammaqtan eyye koke ka daka kodde.

³⁸ Kuyyaata kudani kamma Waaqa qoota Naapaali qara erkannaata qeede malla ito'e.

³⁹ Taawwiti ete toota Naapaali dakayeeyye ikide, “Waaqa isase a Naapaali ana ote malla, isha qara haloota pooyye ka akkan neequmta an koonini ana orxaytaadin pahe a kalataysamo.” Taawwiti ka akka Apikiyya hemo'e, isheetta kamma orra erkade.

⁴⁰ Orxaya Taawwiti ka Qermeloosipa aanen ka Apikiyya kidine, “Taawwiti akka ke hemo'e ke kapopa ino erke.”

⁴¹ Isheetta ka ishootta tura kilpiippatte ka ishootta kaareta oorisse ka kiite, “Anti orxayteetaadi isha koda koda'e ka orxayaadi kela loqqa jaqa'e, in harmisade.”

⁴² Ka jarjartan xaate ka harreetaadi qara kutiite ka orxayaadi a tuparra keni isquda qeette ka orxayasene a Taawwiti erke olli ante ka iskatteeta Taawwiti koddite.

⁴³ Taawwiti ka isheetta quda'e Iyyisira'elitteeta takka Akino'ami kiinaane hemeew, ikka lamatti iskattaadi kodden.

⁴⁴ Saa'ooli xoori enentase xaadi a Taawwiti heme Melkooli qeede ka Kaalemitta takka Feeliti kidammo inna Laawishi hemitta daashe.