Mataafa Saamu'eeli a paayyota 24 - Mataafa Qulqulloota

Taawwiti akka Saa'ooli ishshaata alle diishe

¹ Saa'ooli ete Filisteemeta torpe ka desa ooreeyye, akkama Taawwiti koommayta Aynikaadi oppa co ishi lelen.

² Saa'ooli ka oori xelase a oranna a Isira'eeli kara reexame nama kuma sessa isquda qeede ka shilallasene a kara koraata kallaannitta oppopa Taawwiti isho orra isha quda co xema aane.

³ Ete anno ka pora kapa moona kaharra kapa kayeeyye, rahana akke ka uta karopa maqe. Taawwiti isho orra isha quda co rahanose karopa xata qaa'en ka eyye caan.

⁴ Orrase Taawwiti quda co ka Taawwiti kide, “Isase a Waaqa kide, “Paarkaalaattin harkaaytippa daasha kuyyaatase awweey, wa heenta isha qara kode.” Taawwiti ka kessan piitan desa shire ka a Saa'ooli in upniniiyyi, ohaata Saa'ooli kamma kayla mure.

⁵ Sekammaayye Taawwiti qoota ohaata Saa'ooli kamma kayla mure malla inyarrahe.

⁶ Ikka orraadi a isha quda co kide, “namoose Waaqa isha daateey, anti nama a Waaqa daatade poqallaayyo qara wa asse paha kodeeta ka isha qaropa harkiyyo xa'issa a Waaqa ana qara dawro.”

⁷ Ka sede a asse hasawaden orra isha quda co akka Saa'ooli qara rakkoota in qeennini dawre. Saa'ooli ka rahanase kara sooke ka tawe.

⁸ Taawwiti ka isha kamma'ew sooke ka nessa kuttan ishi wellele ka kide, “Poqallaayyo nuquso!” Saa'ooli ka iskamman desa tooyyade ka Taawwiti a itturandesa pi'e ka fuula piitan kaye ka ishi harka xaashe akke.

⁹ Taawwiti ka Saa'ooli kide, “Atti maana'e orrose ke kiino Taawwiti wa neeqa'e ke qara koda faani kela dakkaysanni?

¹⁰ Awwe porase a rahana kara kittooyye, akka Waaqa harkiyyoppa ke kate ildaattinni i'akkite, orra demo akkan ke isho nefo i'ana nyershe; anti xoori in kide, ‘Isase a Waaqa isha daatade, poqallaayyo qaropa harka an xaasho ka ke suraysade.

¹¹ Aapo! Amma kayla ohaataayti are harkiyyoppa tooye! Kayla ohaataayti'in mure diishe, ke an ikanne; semmalla akka harkaayyoppa wa neeqa in kinnini anka ke qara an xaanin, atti ka patta quda ana kamma ikassa annitto seden upnaado.

¹² Amma oori harkiyyo ke quda in kayo ma a Waaqa otantinno oppa farato! Ka wa ana qara koote malla haalota pooyyo.

¹³ ‘Deymatteeta orra xatta oppa akka kiinitto a neequmta koono kara neequmta sookni i'upta; harkiyyon wa neeqa ke qara koda an heeno.

¹⁴ Ata nuqusa Isira'eeli ayno kamma daana'e xa'e? Atti ka ayno kamma daannittaaw? Hela kuta to'e moon fillayyaata?

¹⁵ Amma nefo a Waaqa otantinno oppa taanynya koddo ka inoppaayye ayno akkima dapampayta kodde isha farato ka ana qara tamaakkado ka ke kelaayye anan paho.

¹⁶ Taawwiti ete haasoosen dikkishe kammaayye, Saa'ooli i'ishi kide, “Taawwiti innaayyo! Hela sede nessaayti? Ka nessa kuttishe ka pooye.

¹⁷ Ka kamma Taawwiti kideewwe, “Ati ana qaran qapto'e a hanqeellayta! An ke qara wa neeqa kode kapa'e, a paxaara'e ana oorisseey.

¹⁸ Kadi punu Waaqa keturopa ana tuukke nefooyye, a ana ikanne. Akka ana wa fayya dikannitto awwe ana lelte.

¹⁹ Hela a paarkalaadi akkino ka qara rakkoota qeenni in kinnin ayyno ca? Awwe qoota wa paxaara ana' koote malla, a Waaqa ke daasho.

²⁰ Ammadesa atti akkama nuqusa Isira'eeli koddito mankisteeta Isira'eeli ka mukissaaytin kokkonnaatto in upnaade.

²¹ Amma arepa desa akka sanynyeetiyyo a qitinnin ka tika aappinno oppaayye maxxiyyo a patinnini maxxa Waaqatin ana' xaxado.

²² Taawwiti ka Saa'ooli xaxade; sekkamma Saa'ooli ka tikadipa kale Taawwiti isho orra isha quda co ka safaraaysho oppopa tiitaawen.