Mataafa Saamu'eeli a paayyota 23 - Mataafa Qulqulloota

Akkima Taawwiti katama Qe'ilaatitin pahe

¹ Ikka Taawwiti lelen ka kidene, “Tin Filisteemeta katama Qe'ila'e torpini ka awtadaadippa unta saranni.

² Taawwiti ka semmalla Waaqa kaassade ka kide, “Hela in tuula ka Filisteemese torpa?” Waaqa ka Taawwiti kide, “Tuule ka Filisteemeta torpe ka katama Qe'ilaatin pahe.”

³ Xela Taawwiti ka Taawwiti kide, “Tin are katama Yihuta kuli karan fuurrinnaay, oton xela Filisteemi torpa katama Qe'ila opa tuullinnooyye, desa kuli attan fuurraaw?”

⁴ Taawwiti ka a lammattati Waaqa kaassadeew. Waaqa ka ishi kide, “Anti harkaaytippa'en Filisteemeta kataay, xa'e ka Qe'ilaapa xata lekkado.”

⁵ Taawwiti isho xelaadi a oranna ka Qe'ilaapa tuulen, ka Filisteemeta torpen. Ka horeetaaysho Taawwiti poojen ka a kuttati ishootta leyshe ka orra Qe'ilaatin pahe.

⁶ Innasene a Apimeleki Apyataari ete Qe'ilaapa Taawwiti kapopa qaheeyye, isqudaayyeew efuudi qapa ka ishin opa xata lekkade.

⁷ Akkima Taawwiti Qe'ilaapa aane Saa'ooli ka dakaye ka kide, “Taawwiti qoota katama a kapa kawwattan qorrame ka xarrada sipla a qulfamma qapa karopa kale malla, ishaaw ittura qaaddeey, Waaqa iharkiyyopa isha kate.

⁸ Saa'ooli ka akka Qe'ilaapa xata lekkadan ka Taawwiti isho xelaadi kapa murane'e xelaadi a oranna piisa oranna xaashe.

⁹ Taawwiti ka akkima Saa'ooli isha qara neequmta sulanno upnaade ka Apiyataari qeesitta kide, “Efuudin arepa xooye”

¹⁰ Ka kide, “Oo Waaqa Isira'eeli Waaqqo, akkima Saa'ooli Qe'ilaapa deena heeno ka ana minan katamoosen patissa faano ana orxaytaayti dukaatannen dakayeey,

¹¹ hela kuli orra Qe'ila isha turopa ana tuukka? Akkiman anti orxaytaayti dakaye mina'e, hela Saa'ooli keeto arepaxata lekkada? Oo Waaqa Isira'eeli Waaqqo in ke qinsanniiy, ana orxaytaayti lele. Waaqa ka kide, “Saa'ooli ilekkada.”

¹² Taawwiti ka kideewwe, “Hela orra Qe'ila i'ana isho orriyyo Saa'ooli turopa tuukka? Waaqa ka kide, “I'ishin tuukkan.”

¹³ Taawwiti ka xelase xaadi dippa lehi mina co ka ollin Qe'ila kara sooken ka pora oppa kaya ettaninnaan piisa opa aanen. Saa'ooli ka akkima Taawwiti Qe'ila kara qahe dakaye ka eeyyepa antaadi diishe.

Wa piitase a kunkunnawwa karaayye Taawwiti qara kodde

¹⁴ Taawwiti ka koommaytase laka Sifi oppa co oppaayye piitase a kunkunnawwa qara kawwaya kara kallaade; Saa'ooli ka awta piisa isha xema kamma anni. Ma Waaqa harkaadippa Taawwiti in kanne.

¹⁵ Akkima Saa'ooli isha ikassa de'e Taawwiti ka upnaade; sitiiyyi Taawwiti koommayta Sifi oppaayye Horeeshi karaayye ca.

¹⁶ Inna Saa'ooli Yoonataani ka xa'e ka Horeeshi karopa Taawwiti kapopa aane. Ka Waaqan xasaadi kokkonnayshe.

¹⁷ Ka ishi kide, “In fuuran harka aappinno a Saa'ooli ke quda in kayooy. Atti Isira'eeli qara'e nuqusumta. Anti ka shuumattan ke kamma qata. Aappinno Saa'ooli kuli sede upaay.”

¹⁸ Ishootta lakki ka fuula Waaqa tura olli kodayteeta kodaden. Taawwiti ka Horeeshi kara hase. Yoonataani ka tikopa kale.

¹⁹ Orra Sifi ka Kipi'a karopa Saa'ooli kapopa aane ka ishi kide, “Ha Taawwiti, hamintinno oppaayye, Horeeshi kara, kunkunnaatase a Hakiila laka Yihuta oppa kara kammatin kitto qara kawwaya kara dekade.”

²⁰ Semmalla nuquso awta ke ettannittooyye xata lekkado. Xanno desa harkaaytippa isha daassata patta haseey.”

²¹ Saa'ooli ka ishootta kide, “Qoota ana qaapatten malla a Waaqa ishina sako.

²² Aana ka xoptaadi qara oora ka qanqannissa upnaada ka nama isha akke ayno akkima kodde qorada; ilattayta kiiniiy.

²³ Semmalla lettisha ka porrada a kara dekanna upnaada. Ka wa qalpeeffattene xooya ka ana lela. Ishin ollin de'a ka oton ipiitose oppaaw caayye, kaffa Yihuta piisa oppa isha fadaay.”

²⁴ Ikka xa'en ka Saa'ooli tura qatten ka Siifipa aanen. Taawwiti isho orraadi Sitiiyyi lakase a Yihutaati kara kammatin naaba Yurtaanoosi kara koommaytase a Ma'oni oppa caan.

²⁵ Saa'ooli isho xelaadi ka Taawwiti fada aanen; Taawwiti ka dakaye ka shilase koommayta Ma'oni oppa co opa xata lekkade. Ete Saa'ooli sede dakayeeyyeew, koommaytase a Ma'oni oppopa Taawwiti xematta aaneew.

²⁶ Irrootasetiiyyi Saa'ooli qinda takkanne ca ka isha kamma daanni. Taawwiti isho orraadi ka qinda pilaatin caan. Taawwiti ka Saa'ooli kela paha jarjarri. A Saa'ooli isho xelaadi Taawwiti isho xelaadi qapa'e, ishootta qaatqaata qara cooyye,

²⁷ nama erkame takka ka Saa'ooli kapopa de'e ka ishi kide, “Filisteemeta piita torpiniiy, jarjartan xooye.”

²⁸ Saa'ooli ka Taawwiti pora daaneeta alle diishe ka Filisteemeta torpeeta aane. Porose ka seminan “Shila olkela qapno” Kidame ka halaame.

²⁹ Taawwiti ka eeyye xa'e ka aane ka kawwaya Aynikaadi kara kallaade.