Mataafa Saamu'eeli a paayyota 22 - Mataafa Qulqulloota

Akkima Taawwiti Atulaami isho Misippopa qahe

¹ Taawwiti ka katama Kaattitiiyyi xa'e ka rahana Atulaami opa qahe. Hellaasso isho toolaaysho ete sede dakayeneeyye, ikka eeyyepa isha kamma lekkaden.

² A rakkade ka a kuura nama qapa isho a nyarrahe piisa ka isha qudopa ooren. Ikka isha ollopa nama dippa afuri mina caan. Isha ka saaraysho kodde.

³ Taawwiti ka eeyye xa'ew ka piita Mo'api karaayye Missippopa aane. Ka nuqusa Mo'apiti kide, “In ke naappanniiy, wa Waaqa ana koda hakan upnaanno kara'e, aappinno isho aayyaanno a de'en ka ke kapa tawen.”

⁴ Ka oori nuqusa Mo'api kapa ishootta diishe. Ikka haka Taawwiti qorrima kawwatta kara dekattaan kallaanno kara'e, isha kapa tawen.

⁵ Sekkammaayye, xuumampaytase Kaati ka Taawwiti kide, “Qorrima kawwatta kara in tawan ma, xa'e ka piita Yihuta opa aane” Taawwiti ka ka xa'e ka mura Hereti karopa kulle.

Akkima Saa'ooli qeeseewwa Noopi leysacciise

⁶ Akkima Taawwiti isho orra isha quda co aparin akkaaden Saa'ooli ka dakaye. Sitiiyyi Saa'ooli Kipi'a karaayye kunkunnaata qara qoyra taamariski kela'e kuti'e. Ka orana harkoppa qapade, saarraadi piisa ka isha kapa qaqqa'aden.

⁷ Saa'ooli ka saarrasene xaadi isha kapa qannaati kide, “Ishin piiniyaameteeyye dakkaysada. Hela inna Isseyi ishin takka takka'e dulla isho porra dishima wayneeta daasha? Ka ishin piisa shalaqadda isho motoloqadda koda?

⁸ Akka seminan piisani ana sulattene? Ete innaayyo inna Isseyi olli kodayteeta kodadeneeyye, ishin oppaayye nama takka nefo ana in lelle. Akkimose a awwe koddinitto mina'e akkima orxaytiyyo ana tura asado'e, akkima innaayyoow isha nyarshen, ishinoppa a qootiyyodesa nyarrahe ka ana lele in co.

⁹ Isase saarrasene a Saa'ooli kapa qa'anno Etoomittase Tooyiqi ka kide, “A inna issey Apimeleki inna Ahituupi kapopa piita Noopi opa de'en akke.

¹⁰ Apimeleki ka ishi Waaqa qinsade ka kalaata isho koraatetase a Koliyaati a Filisteemitta ishi daashe.”

¹¹ Nuqusase Saa'ooli ka akka qeesittase Apimeleki inna Ahituupi isho qeesewwasene Noopi kara ca ka kafaysho kodde halane'e, ishootta piisa kamma orra erke, ikka piisanti de'en.

¹² Saa'ooli ka kide, “Inna Ahituup dakaye.” Isha ka kide, “Oowwe poqallaayyo.”

¹³ Saa'ooli ka ishi kide, “Ke isho inna Isseyi maana'e ana sulatten? Akka ana qara xa'o'e, ka awwe ana tura asado'e, atti maana'e damta isho koraateta ishi daasse ka Waaqa ishi qinsatte?”

¹⁴ Apimeleki ka nuqusase Saa'ooli oorshe ka kide, “Saarraatti piisa oppaayye, a Taawwiti mina amaname ka saara tooytampayaatti kodde ka sottohaayti kodde ka toolaaytippa ulfeessame ayno ca?

¹⁵ Hela awween ishi Waaqa qinsatta paayye? Inna. Ma qoota sullaatati desa ana orxaytaayti waan upa in caaneey, nuquso ana orxaytaayti taaki toolinno qara'e xommaata in qapadan.”

¹⁶ Nuqusase Saa'ooli xoori ikide, “Apimeleki ke isho toolaayshin piisa dukaatanne leetan”

¹⁷ Nuqusase Saa'ooli ka tooytampayasene isha kapa qa'annaati kide, “Qeesewwosen a Waaqa kuli Taawwiti qudawweey, ka a shaffate upan kapaayye ana in lelliniiy, tiitaawa ka ishootta leysha.” Saarrasene a nuqusase a Saa'ooli xoori qeesewwasene qaropa harkaaysho xa'issa in faane.

¹⁸ Nuqusase Saa'ooli ka Tooyqi kide, “Atti'iw tiitaawe ka ishootta leyshe” Etoomittase Tooyqi ka tiitaawe ka qeesewwasene leyshe. Awsetiiyyi Tooyqi qeesewwa efuudi hiddanna kunda setteeti keni leyshe.

¹⁹ Ka orra Noopi a katamasene a qeesewwa koraatetan pire. Umma iskatta ka diirta in kiine, umma hellaa isho nyooqqawwa ama luukna in kiine; umma lo'alla ka harrewwa isho kaharra in kiine ma piisa koraatetan pire.

²⁰ Ma xoori sanynyeeta Apimeleki oppaayye takka Api'ataari kidammo inna Akitoopi kela pahe ka Taawwiti qudopa qahe.

²¹ Ka akkama Saa'ooli qeesewwa a Waaqa pire Taawwiti lele,

²² Taawwiti ka Apyataari kide, “Etoomittase Toyqi awse qoota eeyye co malla akkima Saa'ooli kapa lelo turanneewwen upnaade. Ha toolaayshin piisa ana minanne pirame.

²³ Amma ana kapa tawe ka in fuuran Saa'oolise ke ikassa faano ana kuli ikassa faaniiy, umma ana kapa we ke in qappadaneey.