Mataafa Saamu'eeli a paayyota 21 - Mataafa Qulqulloota

Taawwiti akka Saa'ooli tura qahe ka tawe

¹ Taawwiti ka Apimeleki qeesittase kapopa Noopipa aane. Apimeleki ka Kaawwiti mina aane ka xarri isha kaassade ka kide, “Ata maana malla xawwi kitta nama takka nefo ka ke olli in kinnin?”

² Taawwiti ka ishi oorshe ka kide, “Nuqusa koda takka ana daashe. Ka ana kide, ‘Qoota kodoose an ke daashe ka malla ke erkinaatidesa, nama takka nefo in upnaannin.’ Akkan pora takka oppa olli akkino'e, anka orra ana quda co lele.

³ Semmalla amma maana harkoppa qapta? Laaqqota keni taaki wa qapta ana daashe.”

⁴ Qeesittase ka Taawwiti kide, “Laaqqota a nama piisa dammo an qapo ma, otoni i'orraayti dehaynittoppa iskatta qudopa in anniniiyyi, laaqqota kalisoota Waaqati kalsamte are ca.”

⁵ Taawwiti ka qeesittaseti kide, “Awtan tuullinno piisaayye iskatta ino kapan dehaanni in co. Dakinta orriyyo nefo, awtan koda tupadesati tuullinno nefooyye jaqqammiiy, awwe desa atta in jaqqammin?”

⁶ Qeesittase ka laaqqotase kalisoota Waaqati daasamte Taawwiti daashe. Maana malla, laaqqota awse fuula Waaqa tura mayshen ka pakkaadippa a foollitto xaayen maliiyyi, laaqqota pila in kittooy.

⁷ Awwsetiiyyi Etoomittase Toyqi kidammo isase saarra Saa'oolippa takka kodde ka sikmaya Saa'ooli qara saarummo ka eeyye ca, ka fuula Waaqa tura we asanni.

⁸ Taawwiti ka Apemeleki kaassade ka kide, “Qoota ajajase a nuqusa ana jarjarshe malla koraatetiyyo taaki meehiyyo a orana takka nefo an teyyanneey, hela in ke kapa orana taaki koraateta teya?

⁹ Qeesittase ka ishi kide, “Koraateta Koliyaati a Filisteemittase a atti naaba Eella kara ikasse'e are ca. Opanka japaran quda maren ka efoodi kamman are xaayen. Umma sede mali meeha oranna a pila are in cooy, oton sede teyyanniiyyi teyyado.” Taawwiti ka kide, “Koraateta asse pahato in kittooy, ana daashe.”

¹⁰ Awsetiiyyi Taawwiti ka Saa'ooli turaayye qahe ka Ankusa nuqusa Keetti kapopa aane.

¹¹ Saarra Ankusa ka Ankusa kidene, “Isase nuqusa piita kodde Taawwiti anan isha? Anan orra isha malla kirpini ka kiini, “Saa'ooli kuma leyshe ma Taawwiti kuma kudani leyshe?’”

¹² Taawwiti ka haasoosen karitta kara qapade ka nuqusase a Keetti Ankusa a kuttati fuure.

¹³ Ka qalpeetaadi ishootta tura purshe ka oto ishootta isha qapnaaneeyye, a taaronno pahanaade ka xarrada a katamaassoti xoojini ka kawsaadi qudan xata waaya urqinni.

¹⁴ Ankusa ka saarraadi kide, “Namoose tooya taaraytaay maana malla ana kapopan deeten?”

¹⁵ Akka ana turandesa taarodo'e, hela anti taarayan dape akka namoose ana turopan deetene? Allu sene tikiyyo karopa kulla?”