Mataafa Saamu'eeli a paayyota 20 - Mataafa Qulqulloota

Yonataani akka Taawwiti qaarqaare

¹ Taawwiti ka piitase a Newaatti Raama kara kittooyye alle qaheew ka Yoonataani kapopa aane ka ishi kide, “Maanan kode? Ka maana dape? Juppootiyyo maana aappaayshin ka ana ikassa faani?

² Yoonataani ka ishi kide, “Sede ke qara in kaynin, a tooto. Shakkatto kuttatto, aappinno a ana olli torraado mali we takkan nefo kooni in cooy, maana'e sede ana turaayye juuta? Sede in koddito.”

³ Taawwiti xoori i'ishi kide, “Akkima ana jaalannitto aappaayshin fayya'e upa ka dikanni ka kiini ‘Akka in nyarrahanini'i, Yoonataani sede in upnaannin’ Ma Waaqa caattampaytanne! Ka napseetaaytinni anto'e shakkayta'ew kitta.”

⁴ Yoonataani ka Taawwiti kide, “Wa kiinitta piisan ke koda.”

⁵ Taawwiti ka Yoonataani kide, “Parri xaysoota a xa'atima leya'e caay, anka allu helani nuqusa olli damta qara akkaadaay, amma ana aano ka haka apartaani a halkeetta kara'e mura kara dekado.

⁶ Oton aappaayshin ana faaniiyyi, ishi kide, “Taawwiti qoota toolaaysho piisa kalisoota para kalinno malla, katamasene xaaysho a Peetelehemi opa jarjartan anta'e a kuttati ana naappade.

⁷ Oton ikide, “Ipaxaariiyyi” Ana orxaytaayti we in teyan kideeta. Oton xoori imiiroonniiyyi, akkima a neeqati ana piisade upnaado.

⁸ Ka ana orxaytaayti a paxaara kode ana orxaytaayti olli fuula Waaqa tura kodayteeta kodatteey, oton xoori dapa ana qara caayye, atti'iw ana ishshe. Maana'e aappaayshin turopa anan kalta?”

⁹ Yoonataani ka kide, “Sede ke qara in kaynin! Hela xawwi akkima aappinno neequmta ke qara kodeeta piisaden upnaada ka ke leleta diisha?”

¹⁰ Taawwiti ka Yoonataani kide, “Oton i'aappaayshin miiran ke haasawadeeyye, xawwi ayno ana lela?”

¹¹ Yoonataani ka Taawwiti kide, “Xooye ka muroppopa anna.” Ka ollin muroppopa aanen.

¹² Yoonataani ka Taawwiti kide, “Poqalla Waaqa Isira'eeli a maakkittinno koddo! Oton aappinno qoro kammaayye, ikka xasa fayya ke qapooyye, parri esse taaki partaaniiyyi xawwi an nessa ke an erko ka ke an lelo?

¹³ Oton xoori aappinno a neeqa ke qapaayye, anka an ke an lellin ka akka nakaytan kela tawto an kooniniiyyi, a Waaqa ana qara asseew kodo ka qaran jaalsho. Akkima Waaqa aappinno olli caade mina a ke olli caado.

^14-15 Atti nefoow hakan tarra qara co ka an tooni kara'e, jaalalasine a Waaqa pursammi in kinnini ana akkishe ka oto Waaqa piita qaraayye alle nyaapaayti piisa pirrooyye, toolinno amanamaayti pakkanna alle in diishan.

¹⁶ Maxxa Yoonataani ka alle piita qaraayye in pannin.” Yoonataani ka toola Taawwiti olli kodayteeta kodade ka kide, “Nyaapa Taawwiti qara a Waaqa haalota pooyyo.”

¹⁷ Yoonatani qoota a mattaadi mina Taawwiti jaalanno malla, akkima Taawwiti keeto isha jaalanno upnaatta'e a lammattati Taawwiti xaxacciise.

¹⁸ Ka ishi kide, “Paarriiyyi xaysonessuma a xa'atima leya'e ca. Qoota nama pila poraaytippa in kutiinin malla, akkima eeyye a kinnin i'upnaysamta.

¹⁹ Partaaniiyyiiw, shishshipeeyye akkima eeyye a kinnin qara'ew upnaysamta. Semmalla xata jarjare ka porase a' turan kara dekatte kara'ew dekado ka shilase a Eeseli kela tawe.

²⁰ Anti nama alaama pokaannon pahanaada ka lawa sessa shilose kapopa pokka

²¹ Ka inna takkan erka ka kida, ‘Aane ka lawaddosen qeede oton innasenetin kiini, ‘Lawaddasene keeyye arepadesa caaneey qeedeeyye, caattampayta Waaqa'enne! Sooke we ke in teyaneey, umma wa neeqa in caaneey.

²² Oton xoori innasenetin kiini ‘Lawaddasene ke kammopa caaneeyye, alle qahe Waaqa ke keessiniiy.

²³ Qoota qaaleta an olli kalle desa, haka paraparati a Waaqa artaannoppa kinnaado.

²⁴ Taawwiti ka oori murase kara dekade. Ete xaysonessuma sene a xa'atima leya kayteeyye nuqusase ka damte dama kute'e.

²⁵ Nuqusase ka porase xaadi qussa quda qate a xattaaw qara kutiino qara kuti'e. Yoonataani ka isha minaadesa kuti'e Apeneeri nuqusa quda kuti'e. Pora Taawwiti xoori lulle ca.

²⁶ Ma xoori awse Saa'ooli we in kiine maana malla idikade ka kide, “Taawwiti we isha qara kaye koddita ikka in jaqqanniniiy.”

²⁷ Kuyyaata lammattatiiyyiiw, xaysonessuma a xa'atima leya parrayteeyye, pora Taawwiti asseew lulle caaw. Saa'ooli ka innaadi Yoonataani kaassade ka kide, “Ata inna Isseyi xala ka awwe maana'e damta in deenin?”

²⁸ Yoonataani ka Saa'ooli kide, “Ha Taawwiti akka Peetelehemipa aano'e a kuttati ana naappade.

²⁹ Ka kide, ‘Katamaappaayye toolinno kalisoota kalinniiy, akkan qara akkaado'e hellaanno ka ana leleneey, otoni i''ana jaalanniiyyi, innayti ana aano ka hellaanno kapa kayo?’ Semmalla damtaayti qara poraadippa in akkaannin.”

³⁰ Saa'ooli ka a kuttati Yoonataani qara miiroode ka ishi kide, “Atti inna quumarolayteeta ka attiyyolayteeta, akkima isi isho aayyaassin kamma jeera qeedeeta malla inna Isseyi kela koddite hela anupo?

³¹ Haka inna Isseyi tarra qara cooyye, ke isho mankisteetaayti a qa'attaneey, kamma erke ka arepa isha qeede, toota isha faaniiy.”

³² Yoonataani ka aappaayshoti kide, “Maana malla toota isha faani? Maana kode?”

³³ Saa'ooli xoori isha ikassa'e oranan Yoonataani torpe. Yoonataani ka akkima aappaaysho Taawwiti ikassa piisade upnaade.

³⁴ Ka a kuttati miiroode ka alle damta qara xa'e ka qoota aappaaysho Taawwiti jeershe malla, a kuttati nyarrahe. Ka leyoose oppa kuyaase a lammattatiiyyi damta takka nefo in dammin.

³⁵ Parraytaadi teykantanne Yoonataani ka inna shakkaya iskela qeede ka, porase a Taawwiti olli kidene oppopa aane.

³⁶ Ka innaseneti kide, “Keere ka lawadda an poka fade.” Innasene ka keeren ikka lawa takka pokke ka innasene qaran tarpishe.

³⁷ Ete innasene, porase a oppa lawase a Yoonataani pokke pi'e oppa kayeneeyye, Yoonataani ka innasene hale ka kide, “Xawwi lawase ke qaran disipa in tarpine?”

³⁸ Ka innasene hale ka kide, “Jarjare ka keere, eeyyeppa in tawan.” Innasene ka lawaddasene pohen ka Yoonataani kapopan de'en.

³⁹ Umma innasene we in upnaannema Yoonataani isho Taawwitiiw olli upa.

⁴⁰ Yoonataani ka meehase xaadi a oranna innaseneti daashe ka ishi kide, “Qeede ka katamaapan kale.”

⁴¹ Ete innasene taweneeyye, Taawwiti ka tuultase a shilallaatti kara xata kamman sooke ka Yoonataani tura pi'e ka fuula piitan kaye ka sessaan ishi kaareta oorshe. Ka oli dinkaden ka ollin pooyen. Ka a kuttati nyarrahe xoori a akata pooye, Taawwiti.

⁴² Yoonataani ka Taawwiti kide, “Akkiman maxxa Waaqan olli xaxanne ka kiine, “Ana isho ke otantoppaayye ka sanynyeetaayti isho sanynyeetiyyo otantoppaayye, haka paraparati a Waaqa maakkittinno koddo mina'e, innayti nakaytan aane. Taawwiti ka xa'e ka tawe. Yoonataani ka katamaapa kale.