Mataafa Saamu'eeli a paayyota 2 - Mataafa Qulqulloota

Qinseeta Haanna a kalata

¹ Haanna ka qinsatte ka kiite. Anti Waaqannen xasoonni. Hupniyyo ka Waaqanne kokkonnaade. Afaayyo paarkalaayyo qara seesni dinissaytinnin xasoodeey.

² “A Waaqa mina qulqullitta kodde in co ke mali a pila in co, umma a Waaqinno mina shila a kela pahan kodde in co.

³ Asse isi peepetan in haasawadan. Jeejja ka afaassin kara in sooknin, Waaqa Poqalla we piisa upaay, a kodadda piisa ekkaysanno ishaay.

⁴ Lawa irreelaya iqeqqepe, nukkulaya ka hupna immakaaden.

⁵ A xatta duttane damta malla kira ooren, a xatta doxe ka hiirsaden. Iskatteeta xaayni in kinnin tappa xaayte, a hellaa lekaya qapto ka kapan lulle haste.

⁶ Waaqa i'ikanni, ka kinnaatinni, ka si'oolipa lekkinni, ka fayyinni.

⁷ Waaqa iteekinni ka teyantanni, ka jeerinni ka kuttinni.

⁸ Ka teekolaya a oroppa dikammi in kinnini xa'inni, ka rakkatampaya taraappa xa'inni, ka poqalladdaappa qaa'inni ka sufaana ulfeena ishootta lehanda daanni. Ha qapaya piita kela ca a Waaqa'ew, ikka ishootta qara piita kode.

⁹ Isha anta orra ishi amanammooti tooytini ukkuttowwa xoori tukkanta kara'e tawan. Nama hupnaadin putayma teyni in cooy.

¹⁰ A Waaqa paarkaalumma iqeqqepan ka olloppa' ooran, ikka moonte xata ishootta qara xirara Waaqa orra piisa qara'e farata, ka nuqusaadi japeessa ka hupna a nuqusase a reexadeeti opeela qapa.”

¹¹ Sekkamma Hilqaana Raamaapa tikaadipa kale, innasene ka qeesittase Eeli kelaayye Waaqa koda kooni.

Neequmta a hellaa Eeli koden

¹² Hellaa Eeli ukkuttowwa umma Waaqa ulfeessini in can.

¹³ Sitiiyyi kollima a qeesewwa samayta olli qapane, oto nama takka kalisoota kalshooyye, so'asene ka palanta qara caaneeyye, orxayta qeesitta, shaqqampayta a mina shenqera sessa qapo harkoppa qapanni ka deeni,

¹⁴ ka tisteetase taaki qoreetase a sipla taaki qa'ampayyaatase taaki oktase karopa kullinno. Wa shaqampaytase qeede qeesitta ka teyyanni. Seelo karaayye, nama a Isira'eeli a eeyyepa deeno piisa qara ikka asseew kooni.

¹⁵ semmaliiyyiiw, orxayta qeesitta, a hallaka in kupannin turanne deeni ka namase kalisoota kalinno kiini, “Qeesitta so'a heenda diisheey a pale ke qara in teyyadooy, so'a heenda ana daashe anka ishi waato.”

¹⁶ Oton namasee ishi kiini, “a paayyota hallaaka kupado ka a ke aaka mina ca teyyadooyye,” Orxaytase a qeesitta i'ishi kiini, “Inna amma ana daashe a taakiti irreetannen teyyadaay.”

¹⁷ Qoota kalisoota Waaqa jeerinnaan malla juppoota a helloosen xayyoppa ca ka fuula Waaqa tura akata neqnatte.

A Saaamu'eeli Seelooyye cooyye wa kodde

¹⁸ Innasene shakka Saamu'eeli ka saappata qeesewwa a efuudi kidammo a rufta ata oppa kodame hiddade ka Waaqa' koda kooni,

¹⁹ aayyaasso ka para paran kaappa shakkaya ishi dawni ka oto diirtaadi ollin kalisoota para kalissa annittooyye ishi ishin anni.

²⁰ Eeli ka Hilqaana isho iskatteetaadi sakni ka kiini, “Pakka innoosen a iskatteetaayti Waaqa qara qinsatte ka Waaqa daasse oppa'e, a Waaqa iskatteese oppaayyeew hellaa ke daashoow.” Ishootta ka oori tikaaysho opa kalli.

²¹ Waaqa ka Haanna sake ikka olkamma hitte ka hellaa diira sessa ka a tuparra lakki xaayteew, innasene Saamu'eeli ka fuula Waaqa tura kuttade.

Eeli isho hellaadi lakki

²² Eeli a kuttati kere ka wa hellaadi samayta Isira'eeli piisa qara koonaane ka akkima iskattase xarra tukkana Waaqa oppa koda koono olli almalummaan piisa dakaye.

²³ Ka ishootta kide, “Neequmta a koonittan orra piisa qara in dakayeey, maana malla wa asse paha koonittan?

²⁴ Hellaayyo samayta Waaqa oppa otoota qootaayshinaayye desa dakaannitto in paxaaraneey alle diisha.

²⁵ Nama takka oto a pila qara juppoota kodooyye, Waaqa ollopa ishootta deexa i'ettansha. Ma oto nama Waaqa qara juppoota kodooyye, ayno pakkaadippa ishi qepada?” A kodditoma qoota Waaqa ishootta lessaata piisade malla, ishootta dehaama aappaayshoti in dakayne.

²⁶ Innasene Saamu'eeli ka kuttattaan aane ka fuula Waaqa ka a nama tura jaalatame.

Xuuma toola Eeli qara lelame

²⁷ Nama takka a Waaqa ka Eeli kapopa de'e ka ishi kide, “Waaqa ikiini, ‘A Kipsi kara caan ka toola Feri'ooni kela karpishshummaaneeyyen toola aappaayshina Arooni isi akkishe.

²⁸ Ka kaffa Isira'eeli piis aoppaayye akka qeesittiyyo koddo ka poriyyo a kalisoota kapopa dehaado ka tankarta ana qayyaysho ka fuuliyyo tura efuudi hiddado'e isha reexade. Ka kalisootase kupannitto a samayta Isira'eeli dehanno piisa toola aappaayshinati daashe.

²⁹ Ka kuli maana malla kalisootiyyo ka daassatiyyo an ajajade kojeessinittan? Akka hellaatti kalisowwa a samaytiyyo a Isira'eeli kalinna oppa a paxaara reexattaan isi meershane'e, atti maana malla ana qaropa hellaatti ulfeessini?’

³⁰ Semmalla Waaqa Poqalla Isira'eeli ikiini Allu in kide, ‘Toolaayti ka toola aappaayshina'e haka paraparati ana koda koda ka kippeeta daashe.’ Ma amma Waaqa ikiini, ‘Asse in koddito, anti a ana ulfeessina in ulfeessa a ana puyanna xoori ipuyatamaneey.

³¹ Tikaayti kara akka nama takka nefo arepadesa in raaknini'i, kuyyaata an ishi tikaayti isho kafaayshin oppa hupna hellaa diira a xayya qapa piisa mataqsho de'ay tooye.

³² Pora a oppa orra ana waaqaysanno oppa rakkoota akkita kadi punu paxaarumta Isira'eeleta kodamta nefooyye, sanynyeeta toolaayti oppa nama raako takka nefo in co.

³³ Sanynyeetayti oppaayye nama an poriyyo a kalisoota kapa hattisado ka a in patinnin piisa akka ilmaama urqisso ka nyarrahato'ew hasa; sanynyeetayti piisa ka xayyoppa'ew piramta.

³⁴ Wa helloosen xaayti lakki Hofini ka Finihaasi qara kaya nefo milikkita ke koddan. Ishootta kuyyaata takkoppa'ew piisani piraman.

³⁵ Anti qeesitta amaname, a akka karittiyyo ka a dikattiyyo qara ana koda kodon xaasada. Ka sanynyeetaadi poorsha ikka nuqusa an reexado tura awta piisa ana koda koda.

³⁶ A sanynyeetaaytippa peela haso piisa ka isha kela saantima taaki moossota qinsada ka kida, a tara qeesitta takka kela ana xaaye anka moossotaaw immado.’”