Mataafa Saamu'eeli a paayyota 19 - Mataafa Qulqulloota

Saa'ooli Taawit ikassa'e kamma daanni

¹ Saa'ooli ka akka Taawwiti ishshana'e, innaadi Yoonataani isho saarraadi lele. Yoonataani inna Saa'ooli xoori, a kuttati Taawwiti jaalanni.

² Ka Taawwiti lele ka kide, “Aappinno Saa'ooli ke ikassa faaniiy, isqara tooye ka parri teykanteeyye, pora xawwi co karopa dekado ka eeyye tawe.

³ Anti in aana ka dulase a kara dekatte oppaayye aappinno kapa qa'ada ka qootaaytidesa aappinno olli torraada ka wa ana kide ke lelaay.”

⁴ Yoonataani ka qoota Taawwiti desa aappaaysho Saa'ooli, wa paxaara haasawade ka kide, “Taawwiti ke qara neequmta in kooneey, atti nuquso orxaytaayti Taawwiti qara neequmta in kodan. Isha kodaadin a kuttati ke qaarqaareey.

⁵ Ha isha isqara karitta kutade ka Filisteemittase ishshe, Waaqa ka putayma kuttaya Isira'eeli piisa daashe. Atti ka akkite ka xasootteey, wa malla Taawwiti ikassa ka diika juppoota in qapnin patta tuqta maana?”

⁶ Saa'ooli ka afa Yoonataani dakaye ka xaxade ka kide, “Caattampayta Waaqa'enne! Opani Taawwiti in ishshan.”

⁷ Yoonataani ka Taawwiti hale ka wa torraadene piisa ishi lele. Ka isha qeede ka Saa'ooli kapopan kale. Taawwiti ka a deyyo mina Saa'ooli tura caanni.

⁸ Orana ka a lammattati xa'ew, Taawwiti ka tuule ka Filisteemeta torpe ka ishoottoppe orra lekayta leyshe ikka isha tura qahen.

⁹ Takkaayye hapura neeqa ka Waaqa kapaayye Saa'ooli qara lekkade. Isha sitiiyyi tikaadi kela'e kuti'e ka orana harkoppa qapade. Taawwiti ka kehayta dawni.

¹⁰ Saa'ooli ka oranaadin Taawwiti qussa quda jaqqalisaa fade. Ikka xelsade Saa'ooli ka oranase qussoppa qaatishe. Taawwiti ka do'e ka tawe.

¹¹ Halkeesse oppaayye Saa'ooli ka akka Taawwiti lettishan ka teykanta karan isha ishshane'e, tika Taawwitipa orra erke. Iskatteeta Taawwiti Melkooli ka Taawwiti kiite, “Oton raawwa issin a pahaniniiyyi, parri ittoota”

¹² Ka maskooteta karan isha lekkisse ikka do'e ka kela tawe.

¹³ Melkooli ka waakka qeette ka loshsha qara mukkisse ka matta'e, nyirfa tela ishi xaayte ka ohaata qara uwwisse.

¹⁴ Ka ete Saa'ooli akka Taawwiti qapane'e orra erkeeyye, ishootta kiite, “Ishi ipaaqin.”

¹⁵ Saa'ooli ka akka Taawwiti tooyyane'e, orraase erkeew ka kide, “Loshshaan arepa ana haada anka ishsho.”

¹⁶ Orrase ete kulleeyye, waakka loshsha qara ca opanka matta'e, nyirfa tela ishootta xaayen.

¹⁷ Saa'ooli ka Melkooli kide, “Maana malla ana sasapatte ka akka nyaapiyyo tawo koote ikka tawe? “Melkooli ka Saa'ooli kiite, “Akku i'ana kide, ‘Akkan qaho ana qaarqaare, a taakkiti ken ishshaay.’”

¹⁸ Taawwiti ka qahe ka Saamu'eeli kapopa Raamapa aane. Ka wa Saa'ooli isha qara kode piisa ishi torre, isha isho Saamu'eeli ka ollin Newaatipa aanen ka eeyye kuti'en.

¹⁹ Ikka Saa'ooli lelen ka kidene, “Ha Taawwiti Raama karaayye Newaattiiyyi ca”

²⁰ Saa'ooli ka akka Taawwiti qapane'e, orra erke. Ma ete parka xuumampaya a nessa kuttan xuuma haasawanna isho Saamu'eeli a ishootta tura qate ka ishootta marraano akkeneeyye, hapura Waaqa ka orra Saa'ooli kuli qara lekkadeew. Ishootta kuli ka kirpen ka uuyaden.

²¹ Saa'ooli ete sede dakayeeyye, ikka orra pila erkeew. Ishootta ka asseew kirpen ka uuyadeneew. Ikka a sessattati orraa pila erkeew. Ikka asseew kirpen ka uuyaden.

²² Ikka oori isha mattaadi Raamapa aane ka Seeka karaayye, elase kutta kapa kaye. Ka kaassade ka kide, “Saamu'eeli isho Taawwiti ayshaayye caan?” Iakka ishi lelen ka kidene, “Raama karaayye Newaattiiyyi caan.

²³ Saa'ooli ka piitase Raama kara kitto a Newaatti opa aane. Hapura Waaqa ka isha kuli qara lekkade ikka haka Newaatti kayno'e, poran kirpini ka uuyanni.

²⁴ Ka mehadda isquda sookshe ka Saamu'eeli turandesa kirpe ka uuyade ka lulle eeyye pi'e. Ka kuyaase ka halkeesse piisa lulle nakaye ka muke. Semmalla deymatteeta kiini, “Hela Saa'ooli kuli xuumampayaappa dikammi?”