Mataafa Saamu'eeli a paayyota 18 - Mataafa Qulqulloota

¹ Ete Saa'ooli Taawwiti olli haasa dikkisheeyye, Yoonataani Taawwiti quda'e koke ka a mattaadi mina isha jaalade.

² Awseti desa paayyatte Saa'ooli ka Taawwiti isi kapa' qape umma akka tikaaysho opa kalo'e, isha in diinne.

³ Qoota Yoonataani a mattaadi mina Taawwiti jaalade malla, Taawwiti olli kodayteeta kodade.

⁴ Ka kaappaadi isquda qeede ka Taawwiti daashe. Ka oyleetaadi a oranna kuli ishi daashe. Ka koraatetaadi isho paantaadi ka salpataadi kuli ishi daashe.

⁵ Pora oppopa Saa'ooli Taawwiti erko piisa oppaayye qoota Taawwiti olkela teynitto malla, Saa'ooli xela oranna piisa qara'e Taawwiti shuume. Ini ka taanynyada isho saarra oranna piisa xasasse.

Saa'ooli akka Taawwiti qara yootan xa'e

⁶ Awta Taawwiti Filisteemittase ishsheeyye, xela ka tikkaapa kallooyye, iskatta timpa ka maasinqoota qapade ka nuqusase Saa'ooli okaadissa'e, katamadda Isira'eeli piisa oppaayye ililittan sooke ka kirpa dawanni ka kirpini.

⁷ Ka kirpini ka olli oorinni ka kiini, “Saa'ooli kuma leyshe, Taawwiti ka kuma kudani leyshe!”

⁸ Sede ka Saa'ooli in xasannin. Ikka a kuttati miiroode ka kide, “A Taawwiti kuma kudani kidene ka xayyo kumaaw kidene ka oori mankisteetaaw teyyada diisheey maana ishi hase?”

⁹ Awseti paayyatte Saa'ooli ka ilta neeqatin Taawwiti tooyni.

¹⁰ Parraytaadiiyyi hapura neeqa ka Waaqa kapaayye Saa'ooli qara lekkade ikka tikaadi kelandesa talakni. Taawwiti ka akkima awta piisa koono mina'e, isha tura kehayta dawni ma Saa'ooli awwse orana harkoppa qapa.

¹¹ Ka iskaranxata dikade ka kide, “Qussa quda'en Taawwiti jaqqalsha” Ka Taawwiti torpe Taawwiti ka lakkin kela xelsade.

¹² Qoota Waaqa Saa'ooli quda ma'e ka Taawwiti olli co malla, Saa'ooli ka a kuttati Taawwiti fuure.

¹³ Ka iskapa alle isha mayshe ka xela oranna qara shalaqa isha kode. Taawwiti ka xela orannaatin tuulli ka ishin kalli.

¹⁴ Qoota Waaqa isha olli co malla, wa koona piisa ka ishi olkela teyni.

¹⁵ Akkima we piisa ishi olkela teynaan Saa'ooli ka akke ka a kuttati isha fuure.

¹⁶ Ma xoori qoota ishoottan tuullo ka ishoottan kallo malla, Isira'eeleta isho Yihutaata piisa Taawwiti jaalanni.

Akkima Taawwiti Enenta Saa'ooli heme

¹⁷ Saa'ooli ka Taawwiti kide, “Enentiyyo a kutta Meroopi are kittaay, isheettan hemitta ke daasha. Atti pattaaw ana xormume ka orana Waaqa torpe.” Maana malla Saa'ooli idikade ka kide, “Harkiyyo ishan ikannin ma, a harka Filisteemeta oppa to'o.”

¹⁸ Taawwiti ka Saa'ooli kide, “Anti an nameeyye maana ka sanyeetinno isho kafinno kan opa ayno? anti ka sottoha nuqusa koddini?”

¹⁹ Ma xoori ete kiseese a oppa Enenta Saa'ooli Meroopi Taawwitipa hemitta daasamto kayteeyye, isha kapaayye Astira'eli Mahaalitta'e hemitta daasamte.

²⁰ A koddito ma Enenta Saa'ooli Melkooli kapan Taawwiti jaaladeew. Ikka sede Saa'ooli lelen ikka xasoode.

²¹ Ka dikade ka kide, “Akka ishi turuura koddito'e ikka harka Filisteemeta oppa to'o'e, Melkooli ishi hemitta daasha.” Seminan Saa'ooli ka a lammattati Taawwiti hale ka ishi kide, “Amma oori sottohiyyo koddita”

²² Saa'ooli ka saaraadi kide, “Xawwi Taawwiti dehaame ka kide, ‘Nuqusa iken xasoodeey, ino saarraadi piisaayye anka ke jaalanninnaay, amma oori enenta nuqusa heme.’”

²³ Saarra nuqusa ka haasoosen xawwi Taawwiti lelen. Taawwiti ka ishootta kide, “Hela enenta nuqusa hemeeta ishin qara wa ishakka'e? Ha anti an hiyyeessa a maxxa in qapnini.

²⁴ Saarra Saa'ooli ka wa Taawwiti haasawade Saa'ooli lelen.

²⁵ Saa'ooli ka kide, “Taawwiti kida, ‘Ha nuqusa de'eta weti ke qara faani in co ma, akka nyaapaadi qara haalota pooyyo'e, akka diira Filisteemeta dippa lesso ka quurto patta.’” Saa'ooli wa malla asse dikade, akka Taawwiti harka Filisteemeta oppa to'o malla.

²⁶ Ete saarra Saa'ooli sede Taawwiti leleneeyye, Taawwiti ka sottoha nuqusa koddeeta oppa a kuttati xasoode.

²⁷ Ka xoora ishi qapame turan xelaadi a orannaatin tuule ka diira Filisteemeta dippa lakki leyshe ka quure ka ishin kale ka akka enentase a nuqusa hemo'e, nuqusa tura dike ka kaytishe. Saa'ooli ka enentaadi Melkooli hemitta ishi daashe.

²⁸ Saa'ooli akkima Waaqa Taawwiti olli co, enentaadi Melkooli kuli Taawwiti jaalatte akke ka

²⁹ a qaran qapto Taawwiti fuure. Ka haka cooyye, Taawwiti nyaapa kodde.

³⁰ Saarra xela Filisteemeta ka ishootta torpa'e, orana tuulli. Awta saarra Saa'ooli a oranna tuullan piisaayye, Taawwiti ka a piisa qaran qapto putayma akkanni. Seminan maxxaadi ka a kuttati peepammi.