Mataafa Saamu'eeli a paayyota 17 - Mataafa Qulqulloota

Kooliyaati akka Isira'eeleta nyare

¹ Filisteemeta ka xelaadi a oranna ollopa xa'isse ka Yihutaayye Sokooti karopa ollopa xoorte. Ka Efestemise otanta Sokooti isho a Aseeqi kara kitto oppa safarte.

² Saa'ooli isho xela Isira'eeli ka ollopa xooreew ka naaba a Eella kara safare. Ka Filisteemeta torpa'e, pora qapaden.

³ Filisteemeta ka qinda takka irroota qora pora qapatte. Isira'eeleta ka qinda pilaatin irroota qara pora qapatteew. Otantaaysho kara naaba ka ca.

⁴ Xormitta takka a oranna Kooliyaati kidammo a katama Kettiiti de'e a deruma dikla lehi ka laabbota kayno ka safara Filisteemeta oppa sooke.

⁵ Ka matta qara kulleeta sipla qapa ka oyleeta sipla kalsade, ulsuma oyleeseti nefo, kiilota kunda keni tappa.

⁶ Ka loqqa quda kontaleeta sipla qapa ka xashshittaadi qara pakata sipla qapa.

⁷ Sayma oranaadi kappuma'e, wantarshoota ohaata mina'e ca. Ulsuma siplaadi qaraayye, kiilota tappa kayni. Nama kontaleeta isha kela haano ka isha turandesa anni.

⁸ Kooliyaati ka qa'ade ka xelase a Isira'eeli pora qapade'e, daattade ka kide, “Maana'e arepa sookten ka oranna pora qapatten? Anti an Filistemittanne? Ishinakan orxaya Saa'oolinni? Issippa nama takka reexa ikka ana turopa xata lekkado.

⁹ Oton i'ana torpa ka ana ikassa ettansheeyye, ino karpishshaddaasinan koddina; oton xoori ana isha puta ka isha ishshaayye, ishina karpishshaddaanno kodditan ka ino piddamtan.

¹⁰ Filisteemittase ka kide, “Awwe ana xeloose a Isira'eeli pora qapade qara seesni. Akkan oltorpino'e, intoonno nama ana turopa sookshaay.

¹¹ Saa'ooli isho xelase a Isira'eeli piisa ete nyaroosen a Filisteemitta dakayeneeyye, a kuttati tammaqen ka fuuren.”

Taawwiti akka safarase a oranna a Saa'ooli oppopa aane

¹² Taawwiti Yihuta karaayye, inna Efratittase a Isseyi a Peetelehemi kara kalooti. Isseyi hellaa sette qapa. Xelta Saa'ooliiyyi, isha orroppaayye nama akata qime. parraadi ka ollin sekaaden.

¹³ Hellaa Isseyi a paayyota sessa Saa'ooli kamma'ew oranna tuulen. Maxxada a helloosen sessa a oranna tuule nefo, qaarta Eli'aapi a lammatta Apiinataapi ka a sessatta Saama.

¹⁴ Taawwiti piisa kamma oorshe. Hellaa paayyota sessa Saa'ooli olli tuulen.

¹⁵ Taawwiti xoori kaharra aappaayshoti sikissaa'e Saa'ooli kapa Peetelehemipa kakkalli.

¹⁶ Filisteemittase ka kuyyaata kunda afuri teykanta ka kalaakala deenaaw deeni ka isi akkinni.

¹⁷ Isseyi ka innaadi Taawwiti kide, “Asheetose waatamte kiilota kudani isho laaqqotase kudani qeede ka safarose a oranna oppopa jarjartan hellaassin kamma ishin aane.”

¹⁸ Ka ittootose laaqqamte kudani qeede ka shalaqaassoti daashe ka maanaappa akkima caan kaassado. Ka akka nakayta qapane ishootta kapa milikkitaan ana kale.

¹⁹ Sitiiyyi Saa'ooli isho hellaa opa Taawwiti ka xela Isira'eeli piisa naaba Eella kara caan ka Filisteemeta torpini.

²⁰ Taawwiti ka paraappan xa'e ka kaharrasene sikmayta kapa diishe. Ka kalaatase qeede ka akka Isseyi isha ajaje mina'e aane. Ka a xela orana uuyanno ka pora orana opa xaanooyye safarase oppa kaye.

²¹ Xela Isira'eeleta isho a Filiteemeta ka orana olminopa heeqqe ka fuuloppa oli tooyni.

²² Taawwiti ka kalaatase nama kalaata tooytino kapa diishe. Ka porase a oranna opa keere ka hellaassoti nakayta kaassade.

²³ A Taawwiti hellaasso olli haasawattaappa cooyye, xormittase a Filisteemi Kooliyaati kidammo a katama Keetti, porase a oranna a Filisteemi kara sooke ka akkima turanneew pora nyarro mina nyara paayyeew. Taawwiti ka nyaraadi dakaye.

²⁴ Xelase a oranna a Isira'eeli piisa ete Kooliyaati akkeeyye, a kuttati tammaqe ka isha tura qahe.

²⁵ Xelase a Isira'eeli ka olli kiini, “Hela namoose asse sookno ka Isira'eeli kojeessino, i'akkinittane? Ha nuqusa nama isha ishsho'e, teyaanta kutta'e daasha. Ka enentaadi kuli ishi hemitta daasha ka Isira'eeli kara toolaaysho kuli kipira kela nessisha.

²⁶ Taawwiti ka orra isha kapa qa'ade kide, “Nama Filisteemittose ishsho ka jeerose Isira'eeli kamma jaqo'e, maana kodan? Ata allu Filisteemittose dawra qara in murannin ayno ka xeloose a oranna a caattampayta Waaqa asse kojeessini?

²⁷ Xelase ka waasene a turanneew kidene oppa'ew ooren ka ishi lelen ka kidene, “Nama isha ishsho'e, asse kodan.”

²⁸ Qaartase xaaysho piisa tura' qato Eli'aapi ka a Taawwiti orrase olli haasawanno dakaye ka Taawwiti qara a kuttati miiroode ka kide, “Maana'e arepa deete? Ka kaharrasene shakka koommaytoppa ayno kapa diisse? Isipeepaatti ka neequmta karittaayti in upa, orana tooyya'e arepa deeteey.

²⁹ Taawwiti ka kide, “Amma maanan kode? Hela kaassatta nefo an ettansho?”

³⁰ Ka nama pila opa desa tiitaawe ka asseew kaassadeew. Orrase ka akkimoose a deyyo mina ishi oorsheneew.

³¹ Wa Taawwiti haasawade ka Saa'ooli qara kayen; ikka Taawwiti kamma erke ka halacciise.

³² Taawwiti ka Saa'ooli kide, “Ana orxaytaayti aana ka Filisteemittose torpaay, isha malla nama takka nefo in tammaaqnin.

³³ Saa'ooli ka Taawwiti kide, “Atti a inna shakkayaay, isha ka a sha ki paayyatte nama oranna'ey, atti anta ka Filisteemittose torpeeta a ettanisso.”

³⁴ Taawwiti xoori iSaa'ooli kide, “Ana orxaytaayti orxaytaayti kaharra aappinno'en sikinni ka oto karma taaki tipi de'o ka xellootoppa nyalqitta qeedooyye,

³⁵ kamma daanni ka da'inni ka afaappa qara kanni ka oto ana qaropa xa'oyye, koomaraappa qapni ka da'inni ka ikanni.

³⁶ Ana orxaytaayti karma ka tipi kulin ishsheey, Filisteemittase dawre qara in murannin, xela oranna a caattampayta Waaqa'e kojeesseey, a pinaanosene oppa a takka mina kodda.”

³⁷ Ka kide, “Waaqase afa karma isho a tippi kela anan pahe, hupna Filisteemittoseti kela kuli anan paha.” Saa'ooli ka ishi kide, “Aane, Waaqa ka ke olli caado.”

³⁸ Saa'ooli ka meehaadi a oranna Taawwiti kalshe ka matta qara ishi kulleeta sipla kalshe ka oyleeta oranna ishi kalshe.

³⁹ Taawwiti ka meehose piisa qara'e, koraateta hidade. Ka ishin anta ekkayshe ka malaale, maana malla meehose in kollanneey, ka Saa'ooli kide, “Meehose an kollanneey, ishin anta an ettansho.” Ka alle fure.

⁴⁰ Ka harkoppa uleetaadi qapade ka kirroppa dakadda keni a ludumdumsa pohade. Ka korojaadi a sikmuma kara katade. Ka kullumaadi harkoppa qapade ka Filisteemittase kapopa desa heeqqe.

Akka Taawwiti Kooliyaati ishshe

⁴¹ Filisteemittase ka nama isha kela kontaleeta haano ittura qattishe ka de'e ka Taawwiti kapa dehaade.

⁴² Filisteemittase ete Taawwiti tooyyadeeyye, qoota inna tiipnaya xarjaalliyya shakkaya kodde malla, puyade

⁴³ ka ishi kide, “Hela an kuta akka uleetan ana qaropa deeni” Ka maxxa killowwaassotin isha ipe.

⁴⁴ Ka ishi kide, “Desa xooye anka so'atti xampira moonta isho pinaana koommaytati daasho.”

⁴⁵ Taawwiti ka Filisteemittaseti kide, “Atti koraateta ka orana isho pakata qapatte ka ana qaropa deeni. Anti xoori maxxa a Waaqase we piisa ettaninno a xela Isira'eeli, ishase a atti kojeessinittonnen ke torpa deeni.

⁴⁶ Waaqa awwe harkiyyo oppa'e ke daasha, anka ke kata ka matta ke qara mura. Ka awwe kuyyaaseti pukkada a xela Filisteemi xampira moonta isho pinaana koommaytati daasha. Piita piisa ka akkima Waaqa Isira'eeli kara co upnaatta.

⁴⁷ Sene arepa xoore piisa ka akkima Waaqa koraateta isho oranan orran pahani in kinnin upnaada; orana orana Waaqa'ey, isha harkinnoppe ishin daasha.”

⁴⁸ Ete Filisteemittase xa'e ka Taawwiti turopa dehaadeeyye, Taawwiti jarjartanne porase a oranna opa Filisteemittase turopa keere.

⁴⁹ Ka korojaadi karopa harkaadi kullishe ka daka takka qedade ka kullumshe. Ka Filisteemittase tupa miintoppan teye, dakaase ka miintoppa ishi jaqqale ikka itturandesa pi'e.

⁵⁰ Semmalla Taawwiti kulluma isho daka pattanne Filisteemittase pute. Ka Filisteemittase kullumshe ka ishshe. Umma harkoppa koraateta in qapo.

⁵¹ Taawwiti ka keere ka Filisteemittase qara qa'ade ka quda koraatetaadi yuke. Ka ishshe ka koraatetaadin qara matta mure. Xela Filisteemi akkima xormaaysho to'e ete akkeeyye, alle'e qahe.

⁵² Xela Isira'eeli isho a Yihuta ka uuyatan kamma xa'e ka haka Keetti isho haka xarrada Eqirooniti Filisteemeta kamma daane. Xela Filisteemi a le'e ka She'arayimi paayyatte haka Keetti isho a Eqilooniti poroppandesa seehe.

⁵³ Xela Isira'eeli ka xela Filisteemi daaneta kamma oore ka safaraaysho sare.

⁵⁴ Taawwiti ka matta Filisteemittaseti qeede ka Yursaalamipan kale. Ka meehase a oranna a Filisteemittaseti tukkanaadi kela xaayade.

Akkima Taawwiti Saa'ooli kapopa tiitaawe

⁵⁵ Ete Taawwiti Filisteemittase torpa anno, Saa'ooli ka isha akkeeyye, Apeneeri saaraadi a xela oranna'e kaassade ka kide, “Ata innoosen inna ayno? Apeneeri ka kide, “Nuquso napseetaaytinnin xaxanni, anti an upo!”

⁵⁶ Nuqusa ka kide, “innoosen inna ayno akkima kodden kaassado.”

⁵⁷ Ete Taawwiti Filisteemittase ishshe ka tiitaaweeyye, Apeneeri ka Taawwiti qeede ka Saa'ooli kapopan aane. Isha nefo mattase a Filisteemitta eeyye harkoppaaw qapa.

⁵⁸ Saa'ooli ka isha kide ka kide, “Ata innaay atti a inna ayno? Isha ka kide, “Anti an inna Isseyi orxaytase xaayti a Peetelehemitta.”