Mataafa Saamu'eeli a paayyota 16 - Mataafa Qulqulloota

Akkima Taawwiti nuqusuma daatame

¹ Waaqa ka Saamu'eeli kide, “Akka Isira'eeli qara in nuqusummini'i, anti Saa'oolise in jippeey, haka aytamiti'i Saa'ooli nyarrahata? Kaasaytippa sayteeta immakaado ka aane. Anti Isseyi Peetelehimitta kapopan ke erkini. Hellaadippa akkima takka nuqusa ana koddon akkeey.”

² Saamu'eeli ka kide, “Oton Saa'ooli dakayaayye ana ishshaay attan aana?” Waaqa ka ishi kide, “Koromta iskela' qeede ka kide, ‘Waaqa'en kalisoota kalissa de'e.’

³ Ka kalisootase oppopa Isseyi hale wa koota ana ke lela. Naman an ke lelo ana daatitaay.”

⁴ Saamu'eeli ka wa Waaqa isha ajaje kode. Ete Peetelehemi kayeeyye. Qimaya katamaseneti ka xarri ka isha dehaaden ka ishi kidene, “Hela nakayta'ewwe deete?”

⁵ Isha ka kide, “Aa nakayta'ew; Waaqa kalisoota kalissa'en de'e, isi jaqqa ka kalisoota kapopa ana olli xooya.” Ka Isseyi isho hellaadi jaqqe ka kalisoota kapopa ishootta hale.

⁶ Ka ete de'eneeyye Saamu'eeli ka Eli'aapi tooyyade ka dikade ka kide, “Isase a Waaqa daatade dukaatanne are Waaqa tura qa'anni.”

⁷ Waaqa xoori iSaamu'eeli kide, “In isha puyadeey, pahanaadi taaki derumaadi a dakinta in tooyan. Waaqa akkima nama paata tooyno mina tooyni in cooy. Nama qudadela pahana tooyni Waaqa xoori sataata tooyni.

⁸ Isseyi ka Apinataapi hale ka akka Saamu'eeli turandesa tarpo kode. Saamu'eeli xoori ikide, “Waaqa sede nefo in reexanne”

⁹ Isseyi ka akka Shaama tarpo kodeew. Saamu'eeli ka kideewwe, “Waaqa sede nefo in reexanne”

¹⁰ Isseyi ka akka hellaadi tappa piisa Saamu'eeli turandesa tarpane kode, “Saamu'eeli ka Isseyi kide, “Waaqa seneppa nama takka nefo in reexanne”

¹¹ Saamu'eeli ka Isseyi kide, “Hellaatti piisa seneewwe?” Ikka kide, “A kamma oorsho ca ma kaharra sikinni” Saamu'eeli ka Isseyi kide, “Haka isha de'o maliiyyi damta an kutiinooy, kamma erke ka isha qeede.”

¹² Ikka kamma erke ka isha qeede. Ishootta nefo xarjaalliyya inna, a fayya qapa, ilda ka kara oynaane.

¹³ Waaqa ka Saamu'eeli kide, “Nama an reexade ishaay, xa'e ka isha daate.” Saamu'eeli ka kaasase a sayteeta qeede ka fuula hellaassoti tura Taawwiti daate. Awsetidesa paayyatte hapura Waaqa ka hupnan Taawwiti qara de'e. Saamu'eeli ka xa'e ka Raamaapa kale. “qulla/muda”

Akkima Taawwiti Saa'ooli kela koda koono

¹⁴ Qoota hapura Waaqa Saa'ooli quda ma'e malla, hapura neeqa ka Waaqa kapa de'e ka isha rakkacciisni.

¹⁵ Orxayaadi ka ishi kidene, “Tin hapura neeqa a Waaqa kapa de'e ke rakkacciisniiy,

¹⁶ atti poqallaanno, akkan anno ka nama fayya kehayta dawa saho ke' faano'e, ino orxayaatti a are ca ajaje. Oto Waaqa kapa hapurase neeqa ke qara deenooyye, namase ka kehaytase dawooyye, atti fayya qapnaattaay.”

¹⁷ Saa'ooli ka oori orxayaadi kide, “Nama fayya kehayta dawa saho ana fada ka ishin ana xooya.”

¹⁸ Orxayaasene oppa takka ka kide, “Inna takkan kehayta fayya dawa saha, a Isseyi a Peetelehemitta'en akke. Isha xarjaallitta ka xorma oranna pare. Ka ooka haasa, Waaqa kuli ka isha olli ca.

¹⁹ Saa'ooli ka Isseyi kapopa orxayaadi erke ka kide, “Taawwiti innaatti isase kaharraappa co ana erke.”

²⁰ Isseyi ka harreeta qeede ka laaqqota isho taadeta wayneeta qara fee'e. Ka innayya qolpayta quda' qape. Ka Saa'ooli kapopa innaadi Taawwitin erke.

²¹ Taawwiti ka Saa'ooli kapopa de'e. Ka isha kela koda koda paayye. Saa'ooli ka a kuttati isha jaalade. Taawwiti ka a Saa'ooli kela meeha oranna haano kodde.

²² Saa'ooli ka Isseyi nessa erke ka kide, “Anti in Taawwiti jaaladeey, akka kodiyyo qara caado'e, isha ana diishe.”

²³ Eta hapurase neeqa Waaqa kapaayye Saa'ooli qara deeno piisaayye, Taawwiti ka kehayta qeenni ka dawni. Saa'ooli ka nessa oorsanni ka fayya qapnaanni hapurase neeqa ka isha qara tawni.