Mataafa Saamu'eeli a paayyota 15 - Mataafa Qulqulloota

Oranna Saa'ooli Amaleqeta qara qishshe

¹ Saamu'eeli ka Saa'ooli kide, “Akka samaytaadi a Isira'eeli qara nuqusumto'e akkan ke daato'e Waaqa ana erke. Semmalla amma wa Waaqa kiina dakaye.

² Waaqa isase we piisa ettaninno ikiini, ‘A Isira'eeleta Kipsi kara sookteeyye qota Amaleqeeta poroppa isheetta minaadesa torpite malla Amalaqeeta qatta'a.

³ Semmalla amma aane ka Amaleqeeta torpe. Ka wa qapane piisa pashshe ka we takkan nefo in hattishan. Diira ka iskatta ka hellaa ka nyooqqawwa ama luukna in kidan umma lo'alla ka kaharrta ka kaalla taaki harrewwa in kidan ma piisa leyshe.’”

⁴ Saa'ooli ka Tila'imi karopa xelaadi a oranna xaashe ka ishootta dike, xela loqqan torpino ka nama kuma dippa lakki, xela Yihuta'ew, diira kuma kudani.

⁵ Saa'ooli ka katama Amaleqeeta kapa kaye ka naabba kara asade.

⁶ Ka Qenaaneta kide, “A Isira'eeleta Kipsi kara sookteeyye, ishina qoota samayta Isira'eeli piisa qaarqaarten malla, akkan ishootta olli ishina an patinnini Amaleeqetoppa alle sooka ka sekaada” Qenaaneta ka Amaleqeetoppa alle sookte.

⁷ Saa'ooli ka Ewlaati paayyatte haka katama Suuri isasene Kipsiiyyi qinda piirtotatin qataati'i Amalaqeeta torpe ka pute.

⁸ Ka nuqusa Amaleqeeta Akaaki a co pooje ka orraadi piisa koraatetan alle pire.

⁹ Saa'ooli isho xelaadi xoori, Akaakinni pahen. Ka kaharra kakappa isho okkaya kakappa ka xormada meere isho nyalqa kaharraatin pahaden. Ka wa paxaara piisan pahaden. Umma ishootta piisa alle patissa in faane ma wa puyatame ka we in nessinnini piisa pashshen.

Saa'ooli akkama nuqusuma quda'ew in tawnin akka ishi lelame

¹⁰ Qaaleta Waaqa ka Saamu'eeli deete ka kiini,

¹¹ “Saa'ooli nuqusa kodeetiyyon in maraarfade; maana malla isha ana kamma anta alle diishe ka ajajiyyo in tooytininiiy.” Saamu'eeli ka miirode ka halkeetta piisa Waaqopa ullupni rafe.

¹² Ka parraytaadi paraappan xa'e ka teykantan Saa'ooli kamma kede. Ikka ishi lelen ka kidene, “Saa'ooli Qermeloosipa aane ka eeyye daka diiruma dishade. Ka tiitaawe ka Kelkelaapa lekkade.”

¹³ Saamu'eeli ka Saa'ooli kapopa de'e. Saa'ooli ka ishi kide, “A Waaqa ke sakooy, ha anti ajajase a Waaqa in dikkishe.”

¹⁴ Saamu'eeli ka ishi kide, “Ka kuli iyyittose a kaharra isho daattittose a xormada an napahatiyyon dakayno maana?”

¹⁵ Saa'ooli ka kide, “Sene kaharra isho xormada a kakappa a xela Poqalla Waaqaayti kalisoota qaleeta malla ishin pahade, ka Amaleqeetoppa ishin kale diisheey, wa ata hase piisan alle patinne.”

¹⁶ Saamu'eelikka Saa'ooli kide, “Jaw kide anka wa Waaqa xallapo ana lele ke lelo.” Saaooli ka kide, “Ana lelinka.”

¹⁷ Saamu eeli ka ishi kide, “Kadipunu atti ‘An nama shakka’ Issi kiiteeyye, kaffa Isira'eeli qaraayye saara a koddine? Waaqa akka Isira'eeli qara nuqusumto'e ke daate.

¹⁸ Ka koda ke erkade ka kide, ‘Aane ka Amaleqeeta juppoolayasene alle pashshe. Ka haka ishootta piisa pirritto'e, ishootta torpe.’

¹⁹ Ka kuli maana malla afa Waaqa a dakaynin? Ka poojeta qaropa kakkapte ka wa neeqa fuula Waaqa tura koote?”

²⁰ Saa'ooli ka Saamu'eeli kide, “Anti afa Waaqa in dakaye ka erkana isha ana erkeeti aane. Ka Amaleqeeta piisa pire. Ka nuqusa Amalaqeeta Akaakin kale.

²¹ Ma xoori xela qeede ka waasene papaxxaara allu alle patissa parpaaccisnitta oppa kaharra isho xaraaffa kakappa pooje ka Kelkela kara'e Poqalla Waaqati kalisoota qaleeta malla ishin kale.”

²² Saamu'eeli ka kide, “Hela Waaqa a afaadi ajajameetan xasoonno mina kitto'e, ikalisowwa kupanna isho daassawwaan xasoonni? Ha ajajameeta kalisoota dehassa qara qapta. Dakayeeta ka masarta laahadda dehassa qara qapta.

²³ Ha falqa kodeeta juppoota suuma mina. Ka kamta tuukattaaw, neequmta killana kodata mina qoota atti qaaleta Waaqa jippite malla, isha assew nuqusa koddeetaayti jippeew.

²⁴ Saa'ooli ka Saamu'eeli kide, “Qootan xela fuure ka afa xelati ajajame malla ka ajaja Waaqa isho qaaletaayti qaran tarpe malla, in ishin dape.

²⁵ Semmalla amma in ke naappanniiy, juppootiyyo ana diishe. Ka akkan Waaqa sakatado'e, ana olli tiitaawe.

²⁶ Saamu'eeli ka Saa'ooli kide, “Qoota atti qaaleta Waaqa jippite malla, Waaqa asseewwe Isira'eeli qara nuqusa koddeetaayti jippeey anti ke olli an tiitaawo.”

²⁷ Ete Saamu'eeli alle anta fuula tiitaysheeyye Saa'ooli ka ohaataadi kammadesa kayla qape ikka kaamatte.

²⁸ Saamu'eeli ka Saa'ooli kide, “Waaqa awwe mankisteeta Isira'eeli ike qudaayye kaa'e; ka xelittaayti a ke kapa wayyo daashe.

²⁹ Waaqase ulfeena Isira'eeli kodde darta kooni in co umma karittaadi purinni in co. Maana malla naman ka karittaadi in purshooy.”

³⁰ Saa'ooli ka kide, “In ishin dape ma, amma saarra orriyyo isho fuula Isira'eeli tura ana ulfeesse ka akkan Poqalla Waaqaayti sakatado'e, ana olli tiitaawe.

³¹ Saamu'eeli ka oori isha olli tiitaawe. Saa'ooli ka Waaqa sakatade.

³² Saamu'eeli ka kide, “Nuqusase a Amaleqeeta Akaaki qeeda ka arepan xooya.” Akaaki ka isha turopa dehaade ka xarri ka iskaran xata kiini, “Into toota asse haddaawni?”

³³ Saamu'eeli ka kide, “Akkima koraatetaayti aayyada hellaa daptisse mina'e, iskattoppaayye aayyaassin asseew inna dapta.” Ka Kelkela kara'e porase a kalisoota a Waaqa tura Akaaki oppa quure.

³⁴ Sekkammaayye Saamu'eeli Raamopa aane Saa'ooli ka Kipi'apa tikaadipa kale.

³⁵ Umma sekkammaayye, Saamu'eeli haka toono kara'e, Saa'ooli in akkine, ma qoota Saa'ooli malla inyarrahe. Waaqa nefoow ka qoota Isira'eeli qara Saa'ooli nuqusumshe malla maraarfade.