Mataafa Saamu'eeli a paayyota 14 - Mataafa Qulqulloota

Akkima Yonataani maxanyumaan Filisteemeta torpe

¹ Kuyyaata takkaayye inna Saa'ooli Yoonaatani, xayyoolayse isha kela meeha orana haano'e kide, “Xooye ka safara Filisteemeta oppopa tuullina” Umma sede aappaayshoti in lelle.

² Sitiiyyi Saa'ooli katama Kipi'ati xaala minaayye paleeta Mikirooni kara qoyra roomaani kela safare. Orra isha olli co nefo dippa lehi mina'e ca.

³ Qeesittase efoodi kalsanno Akkiyya ishoottoppaaw ca. Akkiyya inna Ahituupi a inna opa Ikaapoodi Ahituupi inna Finihaasi Finihaasikan inna Eeli a qeesittase a Waaqa Seelo kara qeesummooti akkima Yoonataani eeyye in kinnin xoori a upnaade in co.

⁴ Porase oppan tarpinaan a oppan Yoonataani safara Filisteemi opa tuulla fadeetiiyyi qinda qindan shilalla qaqqa'ade lakki ca. Maxxa a shila takkati pesesi kidammi. a takkati ka sene kidammi.

⁵ Shila takka qinda qutattatinni Mikmaasi minandesa ca. Takka ka qinda tupattatin Kipa'i minandesa ca.

⁶ Yonataani ka isase isha kela meeha orana haano kide, “Waaqa ino' torpa in diishooy, xooye ka safarose a sene dawra qara in murannin oppopa tuullina. Xela oranna lekayta taaki shakkaya qudan koddite, orran paheeta'e, Waaqa wa isha tura qapna in caaneey.”

⁷ Isase isha kela meeha orana haano ka ishi kide, “Wa matta kara qapta piisa kode, umma kamma in ooran. Wa dikatte koda'e, tin anti ke ollin caay.”

⁸ Yoonataani ka kide, “Asseeyye xooye ka kama orroseti opa tuullina ka ishootta issi akkinna,

⁹ oton ishootta ino kiini, ‘Hakan ishin kapa kayninno'e eeyye'ew ino asadaayye,’ Poraaynoppa'ewwen tawna diisheey, ishootta kapopa an anno.

¹⁰ Oton xoori ishootta ino kiini, ‘Inopadesa xooyaayye’ Akkima Waaqa harkinnoppa ishootta kate milikkitaadi sedeey opeela in fayyanna.”

¹¹ Ka oori piisaniiyyi safara Filisteemetati'i issi akkishen Filisteemeta ka kiite, “Iprootase tin qaawwa kara deddekatte kara sooka ipaayyite”

¹² Xela oranna a safaraseti ka Yoonataani isho isase isha kela meeha orana haano laka desa akken ka kidene, “Inopa desa xooya anka we ishina akkinno.” Yoonataani ka isase isha kela meeha orana haano kide, “Waaqa iharka Isira'eeli oppa ishootta kateey, ana kamma fayyado.”

¹³ Yoonataani ka harka ka loqqaan qaqqapade ka fayyade; isase isha kela meeha oranna haano ka isha kamma qate ka kamma fayyade Filisteemeta ka harka Yoonataanippa pi'ite isase isha kela meeha oranna haano ka isha kamma' qate ka ishootta leyshe.

¹⁴ Orannoosen a paayyota qaraayye Yoonataani isho isase meeha oranna isha kela haano piita a kinteeta takka quda paka mina kitto oppa'e nama kunda lakki mina co leyshen.

¹⁵ Filisteemeta safara ka dullaappa isho kantadaappa kitto piisa ka olkelan yaaqyaaqte. Safarase a xela oranna isho a adampaya kuli ka tammaqtan xarri. Piita ka lelleehte. Sede nefo tammaqta a Waaqa ishootta qara deeshe.

Akkima Filisteemeta putamte

¹⁶ Tooytampayasene a Saa'ooli haminta Piiniyaamippa Kipi'a kara ca ka akka xela Filisteemeta olkelan qahano akken.

¹⁷ Saa'ooli ka orrase isha quda co kide, “Xela oranna dika ka orra inoppa in kinnin upnaada.” Ete orrase dikeneeyye, Yonataani isho isase meeha oranna isha kela haano eeyye in caan.

¹⁸ Awsetiiyyi Akkiya qoota xela Isira'eeli tura efoodi kalsade malla Saa'ooli i'ishi kide, “Efoodin xooye”

¹⁹ A Saa'ooli qeesittaseti sede haasawatta qara cooyye, safara Filisteemeta kara horayta ka ollin koope, Saa'ooli ka qeesittaseti kide, “Eta an qapnooy alle diishe”

²⁰ Saa'ooli isho xelaadi a oranna piisa ka olixaashe ka oranaseeti aane. Ka Filisteemeta a tammaqtan olkela dapte ka koraatewwaassotin leenitto akken.

²¹ Iprootase turan Filisteemeta quda koddite ka ishootta olli safaraaysho oppopa kalte kuli ka Isira'eeletase Saa'ooli isho Yoonataani olli kitto qudopa tiitaawte.

²² Xela oranna a Isira'eeli a kunkunnawwa Efreemi kara deddekade akkima Filisteemeta qahanitto dakayeneew ka oranaseeti awlen ka a kuttati ishootta daanen.

²³ Awseti Waaqa ka asse Isira'eeletan pahade. Xelase a oranna ka Peete'aweni tuulle ka Filisteemeta torpe.

Wa oranna kamma kokodde

²⁴ Qoota Saa'ooli orra xaxacciise ka kide, “Hakan nyaapiyyo qara haalota pooyyino kara'e, haka kalakalati'i nama a damta immado a jiijame a koddo” Malla oroppa nama takka nefo ka damta in immannin malla, xela Isira'eeli awse miiddotanne nakaye.

²⁵ Xelase a oranna piisa ka mura karopa kulle. Takma ka piita qarandesa akkaanni.

²⁶ Orrase ete muroppopa kulleeyye takma moonte xata tajtajno akken ma xoori qoota xaxasene fuuren malla, nama takka nefo takmase in immanne.

²⁷ Yoonataani xoori akkima aappaaysho orra xaxacciise in dakayne ka uleetase a harkoppa qapon takmoppa dote ka hayye, ildaadi ka paqqen.

²⁸ Xeloppaayye nama takka ka ishi kide, “Aappaayshin ikokkonnayshe ka orra xaxacciise ka kide, ‘Nama awwe damta immado a jiijame a koddo’ Samayta ka seminan kakkafade.”

²⁹ Yoonataani ka kide, “Aappinno ha ipiita rakkacciise, eten takmose quda shakkayta hayyeeyye, akkima ildaayyo paqqene tooye.

³⁰ Kadi desa samayta awwe poojeta a nyaapa qara pooje dameeyye, atta wayyanni heente. Helani a seqaran qapto'e Filisteemeta lenni heene.”

³¹ Awsetiiyyi xela Isira'eeleta qoota Mikimaasi paayyatte haka Elooniti Filisteemeta torpe malla, a kuttati kakkafade.

³² Xelase ka poojeta qaropa passade ka kaharra ka xormada isho nyalqa okkaya sare ka alle piitopa qalqale. Ka so'a isho diika ollin dame.

³³ Ikka Saa'ooli lelen ka kidene “Samayta so'a a kara diika qapa'e dammi ka Waaqa tura juppoota koda qara ca” Saa'ooli ka kide, “Iseera qepisseneey, ana kapopa shila kuttayta suksha.”

³⁴ Ka kide, “Orroppa' pasa ka ishootta kida ‘Nama piisa a xormaadi taaki kahartaadin de'o ka are' qalo ka damo. Ma xoori nama so'asene diika ollin in damminiiw ka Waaqa tura juppoota in koonin.” Halkeettosetiiyyi nama piisa ka xormaadin de'e ka eeyye' qale.

³⁵ Saa'ooli ka pora kalisoota Waaqa dawe, a pora kalisoota dawno sede a paayyota.

³⁶ Saa'ooli ka kide, “Halkeette Filisteemetoppopa lekkanna ka haka para qinno'e, ishootta sarra umma nama takka nefo an kara an hattinno” Xela ka kide, “Wa ildaatti tura paxaara piisa kode.” Qeesitta xoori ikide, “Intoonno oppa Waaqa kaassannaay.”

³⁷ Saa'ooli ka Waaqa kaassade ka kide, “Hela Filisteemeta kamma in lekkada? Hela atti iharka Isira'eeleta oppa ishootta katta?” Ma xoori Waaqa awseti oppa isha in oorinne.

³⁸ Saa'ooli ka kide, “Ishina a xelaqaraayye saarra kodde piisaayye arepa xooya ka awwe juppoota a xaamo akkima kodamte faana.

³⁹ Asu Waaqa caattampaytose a Isira'eelin pahannonnen xaxanni! Kadi punu innaayyo Yoonataani koddita nefooyye, namoose toota isha faani” Umma xela piisa oppaayye nama takka nefo isha mina we in kiine.

⁴⁰ Saa'ooli ka xela Isira'eeli piisa kide, “Ishina qinda takkan qa'ada. Ana isho innaayyo Yoonataani qinda pilaatinnin qa'annaay.” Xelase ka ishi kide, “Wa ildaatti tura paxaara kode.”

⁴¹ Saa'ooli ka Waaqa qinsade ka kide, “Oo Poqlo Waaqa Isira'eelitiiyyi awwe maana'e ana orxaytaayti mina a haasawannin? Oton ana taaki innaayyo Yoonataani ishin dapeeyye, qoyrittose a uurimi qara pi'o; oton xeloose xaayti a Isira'eeli'i ishin dapeeyye, qoyrittose a tuumini qara pi'o. Qoyrittase ka Yoonataani isho Saa'ooli qara pi'e. Xela ka kela nataan sooke.

⁴² Saa'ooli ka kide, “Ana ka innaayyo Yoonataani qara qoyritta kataaw.” Qoyrittase ka Yoonataani qara pi'e.

⁴³ Saa'ooli ka Yoonataani kide, “Wa koote ana lele.” Yoonataani ka ishi kide “Uleetose an harkoppa qapanne takma shakkayta qeede ka hayye. Tin aren caay ana to'o.”

⁴⁴ Saa'ooli ka kide, “Yoonataani, oton ke dukaatan in ishshamminiiyyi, a Waaqa asseew ana ishsho.”

⁴⁵ Xela xoori iSaa'ooli kide, “Yoonataanise putayma asse kutta Isira'eeli pute ishshama? In koddito! Caattampayta Waaqatin! qaarqaarsa Waaqatinni awwe orana torpeey, xaaja isha quda in kuti'o.” Akka in toonini'i, xela ka asse Yoonataanin pahe.

⁴⁶ Sekkammaayye Saa'ooli ka Filisteemeta kamma alle oore Filisteemeta ka piitaadippopa kalte.

Xelta a nuqusuma Saa'ooli ka kallaata toolaadi

⁴⁷ Saa'ooli ete Isira'eeli qara nuqusumeeyye, nyaapaadi a isha kapandesa co, Mo'aapeta ka Amooneta ka Etoometa ka nuqussa Suupa isho Filisteemeta olli oranna torpade; ka qinda ishindesa tiitaawe piisa putaaw punni.

⁴⁸ Ka xormuman torpe ka Amaleqeta pute ka harka orrase Isira'eeleta sarro oppaayye samaytaadi furade.

⁴⁹ Hellaa Saa'ooli maxxadaasso Yoonataani ka Yeshuuwwi ka Malkishuwa ka tuparraadi lakkiiw, maxxa enenta kutta Meroopa ka a shakka Melkooli.

⁵⁰ Maxxa a iskatteeta Saa'ooli Akinahoomi kidammi; isheetta enenta Akimaasi maxxa saara a xelaadi a oranna'ew, Apeneeri kidammi. Isha inna Neeri. Neerikan inna opa aappa opa Saa'ooli.

⁵¹ Aappa opa Saa'ooli Qiisi isho aappa opa Apneeri Neeri, ishootta ollin hellaa Api'eeli.

⁵² Xelta a Saa'ooli piisa karaayye, oranna kokkoka'e Filisteemeta olli torpaammi. Semmalla Saa'ooli oton nama kokkoka taaki xormitta akkaayye, isqudopaaw qapni ka xelaadi a oranna oppopa kalinni.