Mataafa Saamu'eeli a paayyota 13 - Mataafa Qulqulloota

Kalisoota Saa'ooli a aata Waaqa kamma dapte

¹ Saa'ooli a nuqusummooyye paraadi kunda sessa; ikka Isira'eeli qara para kunda afuri lakki nuqusume.

² Saa'ooli Isira'eeleta oppaayye diira kuma sessa reexe. Ishootta oppaayye diira kuma lakki piita a Mikimaasi isho piitase kunkunnawwa qapto a Peteli kara'e Saa'ooli kapa' hasen kuma takkaaw, piita Piiniyaami kara Kipi'apa karaayye Yoonataani olli caan. Saa'ooli ka diira atahase piisa alle tikkaasso opa kalshe.

³ Yoonataani safarase a xela oranna a Filisteemeta Kipa'i kara co torpe ka pute. Filisteemeta ka qootoseti desa dakayte. Saa'ooli ka kide, “Iproota a dakaytoow” Ka piita piisa oppa kaasa dawsiise.

⁴ Samayta Isira'eeli piisa ka akkima Saa'ooli safarase a xela oranna a Filisteemeta puta Filisteemeta ka Isira'eeleta xaccisatte dakaye, samayta ka akka Saa'ooli quda oranna xa'o'e Kelkela karopa halaame.

⁵ Filisteemeta ka Isra'eeleta torpeeta ollopa qobbaawte. Ishootta sarakella oranna kuma kunda sessa ka diira a fartan torpina kuma leh ka xela oranna a lekuma hinkaajjeta paho qapan. Ka Peetewaaniiyyi qinda piirtotatin katama Maakmaasi kapa' safare.

⁶ Qoota oranase a kuttati ishootta qaatqaate malla, xela Isira'eeli akkima killa kale upnaade ka rahanadda ka qaassaya ka arxashshadda ka qaawwa isho porra piisa kara deddekade.

⁷ Iproota demo kirra Yurtaanoosi kuli tuullite ka piita Kaadi isho a Kele'aadi opa kalte. Saa'ooli xoori Kelkela kara'e hase. Xela isha quda co piisa ka fuuraan xarri.

⁸ Saa'ooli ka akka Saamu'eeli ishi xoora qape qara'e, kuyyaata tappa asade, umma Saamu'eeli Kelkela opa in deene. Xela ka isha quda alle pasa paayye.

⁹ Saa'ooli ka kide, “Kalisootase kupannitto isho a takkumtatin ana xooya” Ka kalisootase kupannitto dehayshe.

¹⁰ Ete asu kalisootase kupannitto dehayshe ka dikkisheeyye, Saamu'eeli ka de'e Saa'ooli ka ishi nakayta kassatta'e, Isha turopa sooke.

¹¹ Saamu'eeli ka kide, “Maana koote?” Saa'ooli ka oorshe ka kide, “Akka orra alle ana quda pasno, atti ka xoora ana qapte oppa a deenin, Filisteemeta ka Makmaasi kara ollopa qoobbaawten akke.

¹² Anka dikade kide, ‘Takka punu Filisteemeta Kelkela kara ana qara ura umma anti qaarqaarsa Waaqa nefo an kaassanne.’ Ka kalisootase kupannitto irreetan dehayshe.”

¹³ Saamu'eeli ka Saa'ooli kide, “Eepuma koote umma ajaja a Poqalla Waaqaayti ke ajaje a tooytaanne; katin ittooytaatte kiiteeyye, helani isha Isira'eeli qara'e mankisteetaayti haka paraparati qaatinni heene.

¹⁴ Amma xoori mankisteetaayti itturopa in jarto. Waaqa nama karittaadippa kale iteye. Ka qoota atti wa Waaqa ke ajaje a tooytinin malla, akka saara samaytaadi koddo'e, isha shuumade.

¹⁵ Saamu'eeli ka xa'e, ka Kelkelaayye desa katamasene a Kipi'a haminta Piiniyaami kara ca oppa aane. Saa'ooli ka xela isha olli co dike. Ikka diira dippa lehi mina caan.

Akkima Isira'eeli meeha oranna in qapnin

¹⁶ Saa'ooli ka innaadi Yoonataani isho xelase ishootta quda co katamasene a Kipi'a haminta Piiniyaami kara ca kara ollin safaren. Filisteemeta ka Mikmaasi kara safarte.

¹⁷ Xela oranna ka kita sessa oli qoote ka safara Filisteemeta kara sooke. Kita takkan katamasene a Ofira haminta Shu'aali kara ca opa fuula kate ka aane.

¹⁸ Takkan ka katama Peetehorooni opa desa fuula katen ka anen, kita a sessatta ka xeelase naabba Sipoymi qarandesa lakoppa akkaannon desa fuula katen ka anen.

¹⁹ Qoota Filisteemeta kiite, “Iproota koraatewwa taaki oranna in tumannin” malla piita Isira'eeli piisa oppaayye xawda tuma in caan.

²⁰ Orra Isira'eeli oppaayye nama piisa ka sipilootaadi ka tossolaadi ka erkahaadi isho pillawaadi xoopatta'e, Filisteemetoppopaaw lekkanni,

²¹ sipiloota isho tossola xooppatta kammaayye, shilini ka daanni. Erkaha isho meehase qupiyya sessa qapo xooppatta kamma ka jinfootase xormadaan qullaan qara kuuta koda kamma kara pirreeta'e daanni. Hera ikka akata kokkoki.

²² Se qaran xaate'e, kuyyaatase a orannaatiiyyi, xelase Saa'ooli isho Yonataani olli co oppaayye, nama takka nefo harkoppa koraateta taaki orana in qapo. Maxoori Saa'ooli isho innaadi Yoonataani patta qapa.

²³ Filisteemeta qudaayye xela takka ka porase karan tarpinaan tooytaa'e, Mikmaasipa aane.