Mataafa Saamu'eeli a paayyota 11 - Mataafa Qulqulloota

Akkima Saa'ooli Amooneta pute

¹ Kammadesa Amoonittase Na'oosi i'aane ka piita Kele'aadi karaayye katama Yaapeesi kapa mure. Diira katama Yaapeesi piisa ka Na'oosi kidene, “Ino olli kodayteeta kodado ka in ke piddammaay.”

² Amoonittase Na'oosi xoori i'ishootta kide, “Hakan ishin piisa kara ilta akkitta qoto ka seden Isira'eeli jeersho maliiyyi, ishin olli kodayteeta an kodado.”

³ Qimaya katama Yaapeesi ka ishi kidene, “Akkan piita Isira'eeli piisa oppopa orra erkanno'e kuyyaata tappa ino daashe. Oton inama inon paho dapadeeyye, ke'en harka daasannaay.”

⁴ Orraase erkame ka katamasene a Kipi'a a Saa'ooli kara kala opa de'e ka sede orra torre; samayta piisa ka nessa kuttan pooye.

⁵ Sitiiyyi Saa'ooli xormada kamma'e qate ka duloppa kalli ka kide, “Ata maana orra teye ikka pooyni?” Ishootta ka otootase a orrase a katama Yaapeesi ishi lelen.

⁶ Ete sede dakayeyye, hapura Waaqa ka hupnan Saa'ooli qara de'e. Ikka a kuttati miirode.

⁷ Ka xormada lakki eqeede ka oppa quure ka piitadda Isira'eeli piisa oppopa orran erke ka kide, “Nama Saa'ooli isho Saamu'eeli olli orana in xaanin, xormadaadi asseew quuraman.” Waaqa ka samayta piisa qara fuura tuqe, ikka akkima nama takka mina ollopa sooke.

⁸ Ete Saa'ooli piita Peseqi karopa ollopa ishootta xaasheeyye, Isira'eeli karaayye nama kuma dippa sessa ka Yihuta karaayye nama kuma kunda sessa kayni.

⁹ Ikka orrase katama Yaapeesiti erkame kidene, “Piita Kele'aadi kara orrase a katama Yaapesiti kida, ‘Parriiyyi a letta otanta in kaynin turanne nata sooktan.’” Ete orrase aane ka orra katama Yaapeesiti sede leleeyye, ikka a kuttati xasooden.

¹⁰ Ka oori Amooneta kidene, “Parri harkan ishina daasanna, akka wa heentane ino qara kootan?”

¹¹ Shishshipeeyye Saa'ooli ka xelaadi a oranna pora sessa qoote. Ikka parraytaadi paraappan safarse a Amooneta karopa seenen ka haka kuyyaata kutta kaynitto kara'e Amooneta leyshen. A peela hasse ka takka takka olkela pasen.

Akkima oppa oorenka nuqusuma Saa'ooli upnayshen

¹² Orrase ka Saamu'eeli kide, “Orrase kiino Saa'ooli ino qara in nqusummin, a xaamo? Ino' qeeda anka alle ishootta lenno.”

¹³ Saa'ooli xoori ikide, “Awwe kuyyaata a oppa Waaqa Isira'eelin paheey, awwe nama takka nefo opa in ishshan.

¹⁴ Saamu'eeli ka samayta kide, “Kelkelaapa anna ka akkima Saa'ooli nuqusa kodde oppa oorra ka upnaanna.

¹⁵ Samayta piisa ka Kelkela karopa ollopa aane ka eyye kara'e fuula Waaqa tura oppa oore ka Saa'ooli nuqusumshe ka eeyye kara kalisoota takkumta fuula Waaqa tura kalshe. Saa'ooli isho samayta Isira'eeli piisa ka ollin a kuttati xasooden.