Mataafa Saamu'eeli a paayyota 10 - Mataafa Qulqulloota

¹ Saamu'eeli ka oktase a sayteeta qeede ka mattoppopa Saa'ooli tuqe ka isha dinke ka kide, “Akka samaytaadi a Isira'eeli qara saara koddito'e Waaqa ke in daatanne? Atti samayta Waaqa qara'e nuqusumta ka hupna paarkaaladdaasso a ishootta kapandesa ca kela ishoottan pahata. Akka qoottotaadi qara saara koddito'e akka Waaqa ke daatade wa milikkita ke kodda.

² Oto awwe ana kapa xaatooyye, haminta Piiniyaami karaayye porase Salsahi kidammo oppaayye, hawla Raaheeli kapa nama lakki ke mina de'a. Ka ke kida, “Harrewwasene a pora faanitta iteyaden” Aappaayshin ka harrewwa qaapeeta diishe ka ke qaapni ka kiini, “Qoota innaayyo malla maanan koda.”

³ Akka eeyye xaataaw ka antaaw ka qoyrase kutta a Taapoori kappa kayta. Eeyyeeyye nama sessa a Waaqa kapopa Petelipa anno ka ke mina de'a. Takka a nyalqa tela sessaan anno takka'ew, a laaqqota sessa qapade, takka'ew, a taadeta wayneeta shawwaytoppa haano.

⁴ Ishootta nakayta ke qara kaassadan ka laaqqota lakki ke daashan akka ishootta qara teyyatta.

⁵ Se kammaayye, katama Kipi'a karaayye, kunkunnaatase a Waaqa a xelase a orana a Filisteemi qara safare kapa kaytaaw. Oto katamasene kapa dehaannittooyye, olqapa xuumampaya, a pekena ka timpa ka kehayta isho luuttota dawanno ka xuuma haasawanno ka porra kalisootati xata lekkanno ka ke mina de'a.

⁶ Sitiiyyi hapura Waaqa ka hupnan ke qara de'a atti ka ishootta olli xuuma haasawatta ka nama pilaati oorta.

⁷ Oto milikkitaddosen piisa koddaneeye, Waaqa ke olliiyyi caay, wa koda ke faanitta piisa kode.

⁸ Ka ana turan Kelkelaapa xata lekkado anti nefo kalisootase kupannitto isho a takkumta dehassa'en ke kapopa de'a. Hakan ke kapopa deeno ka wa koda ke parpaaccisnitto ke lello kara'e, kuyyaata tappa jarta.”

Akiima Saa'ooli nuqusume

⁹ Ete Saa'ooli Saamu'eeli kapa tiitaawe ka anta xa'eyye, Waaqa ka karitta Saa'ooli purshe; milikkitaddosen piisa ka awwse'ew kodden.

¹⁰ Ete Saa'ooli isho orxaytase katama Kipi'a kayeneeyye olqapa xuumampaya'e ishootta mina de'e, hapura Waaqa ka hupnan Saa'ooli qara de'e ikka ishootta olli xuuma haasawade.

¹¹ Ete a turan isha upa piisa akkima xuumampaya olli xuuma haasawanno akkeneeyye, i'olli kidene, “Ata inna Qiisi maana isha teye? Hela Saa'ooli kuli xuumampaya oppa takka kodde?”

¹² Nama takka a piisse kara kalo ka kaassade ka kide, “Xuumampayoosen a taakkane aappadaasso opa ayno?” Sede kiinaane, “Hela Saa'ooli kuli xuumampayaappa takka kodde.” Ka deymatteeta oorte.

¹³ Saa'ooli ete xuuma haasawatta dikkisheeyye, porase a kalisoota opa fayyade.

¹⁴ Inna opa aappa opa Saa'ooli ka Saa'ooli isho orxaytaadi kaassade ka kide, “Ayshopa anten? Saa'ooli ka oorshe ka kide, “Harrewwa fada'en anne ka ete dapadeneeyye, Saamu'eeli kapopa aane.”

¹⁵ Innasene a opa aappaayshoti ka ishi kidene, “Wa Saamu'eeli ke kide ana lelin ka.”

¹⁶ Saa'ooli ka inna opa aappaayshotiti kide, “Saamu'eeli akkima harrewwasene teyaden, ila'ayshe ka fayya ino lele.” Ma qoota nuqusumaaditi desa wa Saamu'eeli haasawade takkan nefo ishi in lelle.

¹⁷ Saamu'eeli ka Misippa karopa Waaqa turopa samayta Isira'eeli hale.

¹⁸ Ka ishootta kide, “Waaqa Poqalla Isira'eeli ikiini, ‘Kipsi karan Isira'eeli sookshe ka harka orra Kipsi isho harka a mankistewwasene ishin miiddina piisa kelaayye ishin furade’

¹⁹ Ishina xoori awwe Waaqase xaayshin rakkootaayshin isho qaapaayshin oppa ishin dininno tuffatten ka kiitene, ‘In koddito! Nuqusa ino nuqusumshe; semmalla amma oori kaffaassin isho sanynyewwaassinan fuula Waaqa tura issi dehaysha.’”

²⁰ Saamu'eeli ka kaffa Isira'eeli piisa fuula turopa dehayshe. Ishootta oppaayye kafa Piiniyaami ka reexxame.

²¹ Ikka kafase a Piiniyaami toollaasso ollin dehaysheew. Ishootta oppaayye toola Maatiri ka rexame; ikka piraampira qaraayyeew toola Maatiri oppaayye diira dehaysheew; Saa'ooli inna Qiisi ka reexxame. Ma xoori ete isha faanaaneeyye idapade.

²² Ikka oppa ooren ka Waaqa kaassadenew. Ka kidene, “Hela namase arepa ide'e.” Waaqa ka kide, “Tin eeyye mehadda kara'e dekade.”

²³ Ikka hiren ka porase kara Saa'ooli qeeden. Ete orroppa qa'adeeyye, ikka xashshiyyaapeela orra piisa qaran akkaanni.

²⁴ Saamu'eeli ka samayta piisa kide, “Namase a Waaqa reexade i'akkitene? Orra piisa oppaayye nama isha paho in co.” Samayta ka nessa kuttan kide, “Nuqusa a parra leka kallaado!”

²⁵ Kammadesa Saamu'eeli ka aata nuqusa ishin samayta mukinna samayta lele ka mataafase ollopa marrammo kara' taafe ka Waaqa tura xaaye. Ka akka nama piisa alle tikopa kalo'e, samayta xaashe.

²⁶ Saa'ooli oori Kipi'apa tikaadipa kale xormewwa diira a Waaqa ishootta nyarshe kuli ka isha olli kalen.

²⁷ Ma xoori falqoolaya demo ikidene, “Namoose atta inon paha ettansha” Ka isha puyaden. Ka daassata ishi dehassa diishen Saa'ooli xoori asseew jaw kide,