Mataafa Saamu'eeli a paayyota 1 - Mataafa Qulqulloota

Saamu'eeli akka dalade

¹ Nama takka a kafa Efreemi oppa delade piitase irrowwa qapto a Efreemi karaayye katama Raama kara kala. Maxxaadi nefo “Hilqaana” kidammi. Isha inna Yirohaami ka oopa Elihu ka opopa Tuhu. Tuhu kan inna Suufi.

² Isha iskatta lakki qapa, takka maxxaadi Haanna kidammi takka'ew, Finaanna kidammi. Finaanna hellaa qapta Haanna xoori hella in qapto.

³ Hiliqaana para mina'e Waaqa Poqalla we piisa ettaninno saksatta'e ka kalisoota ishi kalissa'e katamaadi kara xaani ka Seelopa anni. Sitiiyyi hellaa Eeli lakki Hofini isho Finihaasi Seelo karaayye qeesewwa Waaqa.

⁴ Kuyyaata ishi Hilqaana kalisoota kalinno pisaayye, iskatteetaadi Finaanna isho hellaadi a diira ka tuparraadi, matta mina so'a qoottini.

⁵ Ka qoota a kuttati Haanna jaalanno malla, xaadi harka lakki kooni ka isheetta' daanni. Ma xoori Waaqa xaaya isheetta dawre.

⁶ Qoota Waaqa xaaya isheetta dawre mallaaw lammootaadi ka isheetta quu'ini. Ka isheetta miiranni.

⁷ Sede ka para piisa mina asseew koddini. Oto Haanna tika Waaqa opa annitto piisa mina'e, lammootaadi ka isheettaaw quu'ini. Haanna ka pooytaaw pora pooyni ka damta dammi in kinnin.

⁸ Diirrtaadi Hilqaana ka isheetta kiini “Haanna maana'e pooytaaw pora pooyni? Ka maana laata a dammi a kinnin? Ka maana asse nyarrahani? Hela anti hellaa kudani qaropa an ke an qapo?”

⁹ Kuyyaata takkaayye ete Seelooyye damen ka iken kammaayye, Haanna ixaate. Sitiiyyi qeesittase Eeli tikase qulqullaawte a Waaqa kelaayye xarra kapa'e parjum qara kute'e.

¹⁰ Haanna ka a kuttati nyarrahate ka a kuttati pooyte ka Waaqopa qinsatte.

¹¹ Ka kalsha daasatte. Ka kiite, “Oo Waaqqo ke a we piisa ettaninno, oton dukaatanne jeeriyyo a orxayteetaayti akkitaayye ka ana xaamsattaayye ka ana a teymininiiyyi, ka ana orxayteetaayti inna diirta daassaayye, parraadi piisa kara'en ke Waaqa' daasha umma kooshshota mattaadi qara in kayto.”

¹² Haanna ete fuula Waaqa tura qinseeta derasseeyye, Eeli afaadippaaw tooyni

¹³ Haanna ka iskaran xata qinsanni hibbaadiiw ka tupa lellehni, diisheey nessaadi dakaanni in co. Eeli ka iskatteeta maashshootte kapa isheetta dike.

¹⁴ Ka isheetta kide “Haka aytamiti asse maashshootta? Maashshaatti alle isqara sekayshe.

¹⁵ Ma xoori Haanna i'ishi oorisse ka kiite, “Poqallaayyo assen anti an iskatteeta a kuttati nyarrahate diisheey, taadeta wayneeta taaki ikkayta kokkoka an ikne ma, rakkootiyyon Waaqa tura pooyanni.

¹⁶ Qoota nyarrahatiyyo ka rakkootiyyo koopte mallan a asse kitto qinsadeey, ukkuttoota iskatta kapa ana in dikan.”

¹⁷ Eeli ka isheetta kide, “Nakaytan kale Waaqa Isira'eeli ka wa a qinsatte ke' daasho!”

¹⁸ Isheetakka kiite, “Anti orxayteetaayti ana fuulaayti tura paxaarumta akkado.” Ka oori kalte ka laata laatte. Umma sekkammaayye fuulaadippa nyarrahata in akkaanne.

¹⁹ Hilqaana isho toolaadi ka parraytaadiiyyi paraappan xa'en ka Waaqa sakataden ka tikase xaaysho Raama kara kitto opa kalen. Hilqaana ka iskatteetaadi Haanna olli muke, Waaqa ka isheetta dikade.

²⁰ Ikka hitte ka ete xooraadi a xaaya kayteeyye inna diirta xaayte ka kiite, “Waaqa qaran isha qiinsade” Ka maxxaadi Saamu'eeli kiite ka haleete.

Akkima Haanna Saamu'eeli Waaqa daasse

²¹ Hilqaana isho toolaadi piisa ka kalisoota para isho xasa a daasaden Waaqa kalissa aanen.

²² Haanna xoori ishootta olli in anne ma idiirtaadi kiite, “Oto inna ku'an eennowwen ishin de'a, ka fuula Waaqa tura dehaysha ka ishi daasha. Ikka parraadi piisa eeyye kallaada.”

²³ Diirtaadi Hilqaana ka ishi kide, “Akka ke ettannitto qara kode, ka haka inna ku'innitto kara'e tikoppa' tawe a Waaqa patta qaaletaadi fulaan kayo” Isheetta ka oori haka inna ku'innitto kara'e, tikoppa' tawte ka innaadi luukinni.

²⁴ Ka ete inna ku'isseeyye, qapatte ka xorma a para sessa pire takka ka daamma taara kura takka isho taadeta wayneeta shiwwayta takka qapatte ka Seelooyye tika Waaqa opan ante' innasene nefo sitiiyyi ishakki.

²⁵ Ka xormase qalen ka innasene Eeli turopa dehayshen.

²⁶ Haanna ka Eeli kiite, “Oo poqallaayyo dukaatannen kiini, “Anti an iskatteetase takkaayye areppa fuulaayti tura qa'atte ka Waaqopa qinsatte.

²⁷ Akka innoosen ana daasho'en qinsade Waaqa ka waan qinsade ana' daashe.

²⁸ Semmalla anti nefoow innoosen Waaqa'en daanni haka cooyye isha a Waaqa daasame a koddo. Ka oori eeyye Waaqa sakataden.