Mataafa a Nuqussa a paayyota 9 - Mataafa Qulqulloota

Waaqa akka a lammattati Selemooni akkaade

¹ Selemooni ete tika qulqulloota a Waaqa isho tika mankisteetaadi qupe ka wa heena piisa kode ka dikkisheeyye,

² akkima Waaqa turan Kepa'oni kara isha tura akkaade mina'e a lammattati isha tura akkaadeew.

³ Waaqa ka ishi kide, “Qinseetaayti isho naappumaatti a ana tura dehasse in dakaye, akka maxxiyyo haka paraparati kela kallaado'e, tikoose a qulqulloota a ana qupte in xawwi reexxe. Anti arepadesa awta piisan karittoppa tikoose qapnaada ka ildaayyon qara caada.

⁴ Atti oto akkima aappaayshin a Taawwiti mina'e karitta fayyaatin ka hanqeellumaan ana tura kallaannittooyye ka waan ke ajajna piisa koonittooyye ka taantetiyyo isho seeriyyo tooytinittooyye,

⁵ akkiman aappaayshin Taawwiti kippeeta daashe ka kide, “A sufaaneeta Isira'eeli qara kuti'o sanynyeetaayti oppa in dapado.” Mina'en Isira'eeli qara sufaanetaayti haka paraparati qaatisha.

⁶ Ma xoori ke isho hellaatti oton anan kallaatta diissan ka ajajjaayyo isho taantetiyyo an ishina daashe tooytaatta diissaneeyye ka killowwa amaneeta ka ishootta sakatattaneyye,

⁷ piitoose an Isira'eeli daashe oppaayyen alle ishootta daana ka tikoose a qulqulloota an maxxiyyo xawwi reexade ildaayyo tura alle kata. Isira'eeli ka lekna piita piisa tura'e, a jeerte ka kojeessamte koddita.

⁸ Tikoose a qulqulloota are kitto idapatta a kapan tarpino piisa ka oppa qawwaawa ka qara lelada ka kide, “ Waaqa maana'e piisse isho tikoose a qulqulloota asse kode?”

⁹ Orra ka kidaayye, “Qoota Poqalla Waaqaaysho isase piita Kipsi kara aappadaasso sookshe alle diishen ka killowwa amanen ka ishootta sakataden malla Waaqa neequmtose piisa ishootta qara qeede.”

Loqsha Selemooni Kiraami daashe

¹⁰ Ete Selemooni tikkasene lakki tikase a qulqulloota a Waaqa isho a mankisteeta qupe ka dikkisheeyye, para kunda lammattati piraampiraqaraayye,

¹¹ Kiraami nuqusa Tiroosi qoota turan wa tikkoosen qupa parpaaccisna a Selemooni faana qora lalta ka a pirpirta ka warqeeta Selemooni daashe malla, nuqusase Selemooni sekapa'e Kelila karaayye katamadda kunda lakki Kiraami daashe.

¹² Kiraami ka Tiroosi xa'e ka katamaddasene a Selemooni ishi daashe tooyya aane ma ishan xasanne.

¹³ Ka kide, “Ata innaanno sene katamadda maana'e ana daasse?” ka “Piita Kapuli.” ishootta kide ikka haka awwiti seden halaammi.

¹⁴ Se turan Kiraami warqeeta kiilota kuma afuri Selemooni erke.

Kodadda a pila a Selemooni kode

¹⁵ Selemooni orra tika qulqulloota ka tikaadi a mankisteetaadi qupo ka naaba a Miillo teetto ka katama Yursaalami kapa kawwatta dawo ka katama Hasoori ka a Mekito isho a Keseeri upnaan qupo reexade.

¹⁶ Seturan Feri'ooni nuqusase a Kipsi katama Keseeri torpe ka apittan kupe ka Kene'aaneta a oppa kalto leyshe ka enentaadi iskatteetase a Selemooni koddayyaata daashe.

¹⁷ Selemooni ka katama Keseeri a lammattati qupe ka Pete horooni a xati kamman kitto kuli qupe.

¹⁸ Ka katama Pa'ilaati, isho koommayta Yihuta oppaayye katama Tatimari qupe.

¹⁹ Ka katamadda a oppa meehaadi a qapo xaayanna ka a sarakeella oranna isho a orra fartan torpino kara safarro piisa qupe. Ka Yursaalami ka Lipaanoosi isho piitadda a mukinna piisa kara wa qupa fade qupe.

^20-21 Selemooni ka orrase Isira'eletoppa in qapnini a Amooreta ka a Keetteta ka Feresata ka a Eewota isho a Iyyapuusata, isasene orana kela pahe. A Isira'eeleta alle ishootta pira malaalte, ikka piitase oppa hasene qeede ka kodoose a hupnati reexe; ikka haka awwiti sequdaayyeew caan.

²² A koddito ma Selemooni Isira'eeleta oppa nama takka nefo karpishsha'en kodanne ma, xela oranna torpino ka saarra mankisteeta ka taanynyada ka kaappowwa ka a sarakeela isho a fartan torpino ajajnoti'i ishootta kodade.

²³ Ishootta taanynyada a orrase koda Selemooni koono ajajna ka dippa keni kunda keni kayni.

²⁴ Enenta Feri'ooni ka katama Taawwiti kara xaate ka tikase a Selemooni isheetta qupepa deete. Sekkammaayye Selemooni ka naaba Millo teette.

²⁵ Selemooni porase a kalisoota a Waaqa kode qara'e paroppa sessaanne kalisootase kupannitto isho a nakayta dehanni. Ka porase a kalisoota fuula Waaqa tura co qara'e, tankarta qayyanni. Ka seden tikase a qulqullootati wa kodama parpaaccisna dikkishe.

²⁶ Akkimoose mina'ew nuqusase Selemooni piitase a Etisiyyonkapiiri piita Etoomi oppaayye, Pakateeta tiima mina Elooti kapaayye, kitto oppa'e markapadda kode.

²⁷ Kiraami ka akka kodampaya Selemooni olli markapaddaadi kara koda kodane'e, kodampayaadi a markapa qula saha ka pakateetose upa erke.

²⁸ Ishootta ka piita Ofiiri opa aanen ka warqeeta kiilota kuma kudanka afuri qaropeela kitton de'en ka Selemooni daashen.