Mataafa a Nuqussa a paayyota 7 - Mataafa Qulqulloota

Selemooni tikaadi a mankisteeta'e qupe

¹ Selemooni tikaadi a mankisteeta qupa'e para kudanka sessa isha qara qeette.

² Ka tikase xaadi a mankisteeta mura Lipaanoosi kidammitto qupe. Piitandesa derumaadi dikla dippa ka paldumaadi dikla kunda keni ka moontandela dikla kunda sessa. Isheetta qapaya talta a pora sessa olkammandesa qa'ame ka xarna qapa qara'e qupamte.

³ Ka siittewwa a xarnasene qaran de'e qara kutiite. Xarinta takka qapaya olkammandesa qa'ame kudanka ken qara'e xaayamte. Ishootta olloppa'e qapaya kunda afuri ken.

⁴ Ka pora sessa'e olkammandesa maskootewwa qapta; maskootewwosen nefo ka olmina tooyni.

⁵ Xarrada tikooseti qindadda afuri qapan ka olkammandesa pora sessa kodamen ka olmina tooyni.

⁶ Selemooni tika ishshaarritta a qapaya lekaya qapto qupeew. Piitandesa derumaadi dikla kunda ken paldumaadi dikla kunda sessa. Fuulaadi turaayye, silayta qaalame a keladesa tarpinaan, a kela qapaya qa'en ka caaw.

⁷ Tika a kelaayye, sufaaneta qara xata farato kitto qupe. Ishetta nefo tika dukaata mureeta ka piiteeyye paayyatte haka qaalaati'i, shamma taltatin uwwishe.

⁸ Tikoose a firteetati tultoppanne, tikase xaadi a kallaata a qupade tikoose a firteeta'ew pahata. Ka enentase a Feri'ooni a heme kuli tika a pila a asse pahato qupeew.

⁹ Tikkoosen piisa kiritte paayyatte haka timtimaatati ka laka tula paayyatte haka paapahase a kaata a qaa'ittati'i, dakadda a reexxame ka a olmina quurame ka qinda piisan xefameetinni qupamen.

¹⁰ Tikoose a mankisteeta nefo kirittaadi'i, dakadda a reexxame ka kukutta'e katen. Dakadda demo dikla kudan kudan; demo dikla sette settee kayni.

¹¹ Qaranneew dakadda a reexame isho shamma a talta a olmina quurene'e ca.

¹² Tikase a mankisteeta karaayye, paapaha qaa'itta a co akka paapahase a qa'aitta tika qulqulloota isho a silaytaadi kela co mina'e, dakadda a reexame ka laajametinni matapeeta sessa olkama dawame. Matapeeta takka xoori, xarna talta oppa koden.

Meeha a tika qulqulloota

¹³ Nuqusase Selemooni Tiroosipa Kiraami kamma erke ka halacciise.

¹⁴ Kiraami inna a hiyyeetteta takka a diirta in qapnini kafa a Niftaalemi oppa delatteeti. Aappaaysho Tiroositta a sipla tumma Kiraami harmuma isho tuma siplati'i, ookuma ka upna isho ilattuma kuttaatinni immakaade. Ka nuqusase Selemooni kapopa de'e ka koda a ishi daasame piisa kode.

Tuudda lakki a sipla poora oppa kodame

¹⁵ Kiraami tuudda sipla poora lakki a olmina ca a derumaasso dikla kudanka sette sette kaynaan kappumaasso ka dikla kudanka lakki lakki kayna'e tume.

¹⁶ Ka tuuddasene qara'e, kuutadda lakki a deruma moontandela dikla ken ken kayna sipla poora oppa kode.

¹⁷ Ka kuutaddasene tuudda qara ca qara'e, nyupura silpa a jirfa tappa tappa qapa sira' qara kode.

¹⁸ Ka nyupurasene kuutadda qara ca matta mina'e sira'e pahana dalta roomaani kode ka jirfa lakki lakki ishootta takka takka qaran tiitayshe.

¹⁹ Tuudda a silayta kela qa'ene qaraayye, kuutadda ca derumaasso dikla afur afuri kayni ka pahana pisa suufeta qapan.

²⁰ Kuutadda tuudda lakki qara ca qaraayye, nyupurasene a silpa qarandesa Kiraami pahana dalta roomaani dippa lakki lakki kode ka jirfa lakki qaran tiitayshe.

²¹ Ka tuuddasene silayta a tika qulqulloota kela qa'e ka tuuda a qinda tupattatin qa'e Yaaqumi kide ka maxxa ishi kode ka a qinda qutattatin qa'e poo'esi kide ka maxxa ishi kode.

²² Tuuddasene kuuta qaraayye ca pahana pisa suufeta'e qapan. Kodoose a tuudda ka pora asse pahon dikkade.

Mirka pisha a sipla poora oppa kodame

²³ Kiraami mirka pisha'e sipla oppa kode. Pahanaadi nefo, xoorrata pahan. Paldumaadi qinda takkaayye desa haka takkati dikla kudani ka moontandela dikla keni ka kapandesa tiitaawwataadi dikla kunda sessa.

²⁴ Tomoose a sipla poora kamaaraadi a afa kele xata, dikla takka takka mina'e pahana murrawwa kudani kudani kode ka jirfa lakki kode ka qudan tiitayshe.

²⁵ Tomase nefo pahana xormada kudanka lakki a tulta olli kate qara'e kutiishen. Sessa qinda qutatta opa tooyanni. Sessa qinda tupatta opa tooyanni. Sessa qinda dumaata opa tooyani. Sessa qinda piirtota opa tooyanni.

²⁶ Korduma a tomaseti qupiyya afuri; afaadi minaayye kamaara a co, kamaara tiwwa'e paha ka pahana pisatin kodame. Mirkoose a pisha, pisha nitiroota kuma kunda afuri mina caa'e qeenni.

Wa oppa meeha xaayatta a sipla poora oppa kodame a kela kanaannawwa qapa

²⁷ Kiraami wa qara meeha xaayannaane a kela kanaannawwa qapa kudani sipla poora oppa kode. ishootta matta mina'e, piitandesa derumaasso dikla afur ka paldumaadi dikla afur ka moontandela dikla sessa.

²⁸ Wossen kara meeha xaynaane nefo asse kodamen. Loqqa siplalla a qaqqa'ade afur arta kara'e, sipla pappalda qaqqapsiisen.

²⁹ Ka siplalloosen pappalda qara'e, pahana karmada ka a xormada isho a kirupeelewwa xaashe. Ka loqqasene a sipla quda asseew xaashen. Ka pahanasene a karmada isho a xormada qara xata ka kela xata pahana pisa rarraa'ishe.

³⁰ Wossen kara meeha xaaynaane matta mina'e, kanaannawwa afur afur ka a sipla poora oppa kodame qapan. Sipla poora a kanaannawwosen quda tiitaawnaan qapan. Ka matta mina'ew, qindadda afurinni, toma sipla a kara pisha jaqannaan isho kurna a tomaddoosen qara kuti'en qapan.

³¹ Wossen kara mehadda xaaynaane otanta karaayye qaawa xoorrata a dikla lakki kayno ca. Qaawoseti xati kammanne, paldumaadi dikla takka ka paka; tula qaran wossen kara meeha xaynaane xoori qindadda afuri qapan diisheey in xoorraawne.

³² Kanaannawwosen afur, siplase palda a tupatta kela caan. Siplase a kanaannawwosen quda tiitaawnaan xoori, wossen kara meeha xaaynaana quda'ew koden. Kanaannawwosen matta mina'e paldumaasso dikla ka paka.

³³ Kanaannawwosen kanaannawwa a sarakeella'e pahan. Siplase a kanaannawwa quda tiitaawnaan ka oktaaysho ka xeeshaasso ka wa quda hidamene piisa, sipla a liilshene oppa kodamen.

³⁴ Wossen qara meeha xaynaana matta mina'e, qindadda afur piisanne maklalla qapan.

³⁵ Wossen qara meeha xaaynaane kuuta qaraayye, sipla a xoorraysa a paldumaadi laabbota takka kaynaane ca. Siplalloosen pappalda isho maklalloosen pora takka'e ollopa jaqqalshen.

³⁶ Kiraami ka siplalloosen pappalda isho maklallaasso qarandesa pahana kirupeelewwa ka a karmada isho a qoyra sampaapa xaashe ka kapandesa pahana pisatin sire.

³⁷ Wossen qara meeha xaynaane piisa pora asse pahonne kode. Ishootta pora takkoppa'ew ishootta liilshen ikka olmina'ew caccaan ka olliiw pahan.

³⁸ Kiraami tomadda kara pisha jaqannaane kudani a silpa poora'e kode. Toma takka paldumaadi dikla afuri ka pisha parmeela afuri qapanni. Wossen qara meeha xaaynaane piisa kapa'e, toma takka takka kode.

³⁹ Ka wossen qara meeha xaaynaane keni tika qulqullootatiiyyi, qinda tupattatin xaaye ka ken qinda qutattatin xaaye ka tomase kutta a pisha kara kammattiiyyi qinda piirtotatin xaaye.

Mehadda tika qulqulloota

⁴⁰ Kirami ka tistewwa ka paallawwa apitta isho qorewwa asipla kodeew. Ka pora asse pahonne, nuqusase Selemooni'i, kodase a tika qulqulloota a Waaqa dikkishe.

⁴¹ Tuuddasene lakki ka tuuddosen qaraayye kuutaddasene xoorraysa lakki ka nyupuraddasene lakki kuutaddasene qara sira kalshen.

⁴² Ka pahanasene a dalta roomaaneta dippa afur dippa afur, a nyupurasene lakki qara jirfa lakki koden ka tiitayshen.

⁴³ Ka waasene qara meeha xaynaane kudani isho tomaddasene kara pisha jaqannaane kudani.

⁴⁴ Ka tomase a pisha isho pahanasene a xormada kudanka lakki a tomase kela ca

⁴⁵ Ka tistewwa ka paallawwa apitta isho qorewwa meehose a Kiraami tika qulqulloota a Waaqati Selemooni kode piisa sipla poora a oyno oppa kodame.

⁴⁶ Nuqusase Selemooni meehose piisa koda'e, naaba Yurtaanoositiiyyi, otanta Sukooti isho a Sertaanitiiyyi, pora oppa siplalla xoopnaane oppa liilishe.

⁴⁷ Selemooni qoota mehaddoosen akata koopen malla hiilanne in ekkaysanne. Umma ulsuma sipla a poora a oppa meehose kodame in upnaysamme.

⁴⁸ Selemooni ka meeha tikase a qulqulloota a Waaqa piisa kode. Ishootta nefo, pora kalisoota a warqeeta ka tarabbeesa a warqeeta a laaqqota Waaqa qara xaaynaan.

⁴⁹ Ka wa qara ipsa xaynaane a warqeeta kudani qulqullitteeta qulqullowwaatiiyyi ken qinda akkittatin xaayamen ka keni qinda pittittatinni xaayamen. Ka pisadda isho kurraasewwa ka wa apittan heeqqinnaane a warqeeta.

⁵⁰ Ka tiwwada ka paallawwa ka qorewwa ka muuqadda ka qorewwa a kara tankarta qayyannaane ka qeppeelliyya a xarrada a qulqullitteeta qulqullowwa isho a tika qulqulloota piisa warqeetoppaayyeew kodamen.

⁵¹ Kodase a nuqusase Selemooni tika Waaqati kodacciise pora asse pahonne dikkade. Selemooni ka meehase a warqeeta isho a sipla dakara isasene aappaaysho Taawwiti koda Waaqati reexxe qeede ka tika meeha a Waaqa kelopa kalshe.