Mataafa a Nuqussa a paayyota 6 - Mataafa Qulqulloota

Selemooni tika qulqulloota qupa paayye

¹ A hellaa Isira'eeli piita Kipsi kara sookene para dippa afuri ka kunda settattatiiyyi ka a Selemooni Isira'eeli qara nuqusumeeyye para afrattatiiyyi leyase sifi kidammo a lammatta oppaayye, Selemooni tikase a qulqulloota a Waaqa qupeeta paayye.

² Tikase a qulqulloota a nuqusase Selemooni Waaqa qupe piitandesa derumaadi dikla kunda lehi ka piitandesa paldumaadi dikla kunda lakki, moontanela derumaadi dikla kunda sessa.

³ Silayta a tikase a qulqulloota tura co akkima a tikaseti mina'ewwen piitandesa paldumaadi dikla kunda lakki ka piitandesa derumaadi dikla kudani.

⁴ Ka tikase a qulqullootati'i, maskootewwa qaawwaan kikilla'a kode.

⁵ Ka qussa a tika qulqulloota isho a kaatasene akata qulqullaawe qudan kaatadda qorraayshe ka qupe.

⁶ Tika piita qatte, dikla keni a qara qatte a lammatta dikla lehi. Ka a otanta qatte a lammatta dikila lehi a qara qatte paldumaadi, a sessatta dikla tappa. Ka akka qussa a tika quda in kaynini, tuudda a tikase qara kutiita laka tula qa'e.

⁷ Dakada a tikase a qulqullootatin qupnaane qoota porase a oppa qotamen oppa'ew laajamen malla, ete tikoose qupammittooyye, nessa purrisha taaki a urtoota taaki a meeha a silpa a pila kelaayye in dakaanne.

⁸ Tika piita qatte xarraadi qinda tupatta opa qanni ka faymadaanne kaata lammatta isho a sessatta opa pora fayyuma qapan.

⁹ Ikka tikase qupe ka dikkishe ka tikase xarna isho afta taltatin qara deke.

¹⁰ Ka tikase a qulqulloota quda'e, kaatadda moontandela dikla keni keni kayna qupeew ka qora taltatin tikase qudopa qaqqapsiise.

¹¹ Erkana Waaqa ka Selemooni de'en ka kiini.

¹² “Qoota tikoose a qulqulloota a qupnitto desa oton taantetiyyonne anniiyyi ka muraayyo koda qara nakanniiyyi ka ajajiyyo piisa tooytini ka ishin kallaanniiyyi, anti kippeetan aappaayshin Taawwiti daashe in ke dikkisha.

¹³ Ka Isra'eta oppa kallaada; umma samaytiyyo a Isira'eeli alle an diisho.

¹⁴ Semmalla Selemooni ka tikase a qulqulloota qupe ka dikkishe.

Tikoose a qulqulloota karan atta akka qupante

¹⁵ Ka tikase a qulqulloota tika karan qussaadi piita paayyatte haka qaalaati'i, shamma taltatin uwwishe. Ka tika karan piitandesa shamma pirpirta kela afe.

¹⁶ Ka tika karanneew, akka kaata akata qulqullaawe koddite'e, qinda kammatin piitandesa derumtaadi dikla kunda lakki qootte ka piitandesa ka qussaadi piisa shamma a taltatin uwwishe.

¹⁷ Tika a qulqullitteeta a qulqullowwa tura haste piitandesa derumtaadi dikla kunda afuri kayni.

¹⁸ Tika karanne shammase a talta, pahana a pisa paqqe ka a in paqqinininni quda siren. Piisa kan taltaaw. Umma daka kara akkanni in co.

¹⁹ Ka akka taapotase a kodayteeta Waaqa kara xaayamto'e, tikase karan kaata a qulqullitteeta a qulqullowwa qupe.

²⁰ Qulqullitteeta a qulqullowwa piitandesa derumaadi, dikla kunda lakki ka paldumaadi dikla kunda lakki ka moontandela dikla kunda lakki. Ikka tika karan warqeeta paxaaratin quda deke ka porase a kalisoota taltoppa koden asseew warqeeta a paxaaratin quda deke.

²¹ Selemooni ka tikase a qulqulloota karan warqeeta paxaaratin uwwishe. Ka qulqullitteeta a qulqullowwa turandesa sansalaata warqeeta hidde.

²² Ka tikase a qulqulloota piisa tika karan warqeetan uwwishe ka porase a kalisoota qulqullitteeta qulqullowwa kara co kuli warqeetan uwwishe.

²³ Ka qulqullitteeta qulqullowwa kara pahana kirupeelewwa lakki, dikla kudan kudan ekertoppa kode.

^24-25 Xoola kirupeeleta takka dikla ken ka a taakka'ew asseew dikla ken. Siiba xoola takkati paayyatte haka xoola a lammattati'i, dikla kudani. Xoolla kirupeeleta lammatta asseew dikla kudani. Kirupeelewwosen lakki olliiw pappahan. Ka Olmina'ew caccan.

²⁶ Moontandela deruma a kirupeeleta takka dikla kudani a taakka kan asseew.

²⁷ Ikka kirupeelewwasene qeede ka kaatasene karan ca kara xaaye. Kirupeelewwasene ka xoollaasso paldishen xoola a kirupeeleta takkati ka paka takkan qussa quda kayni; a taakka ka diisin asseew qussa quda kayni ka otanta tika karaayye, xoollaan olquda kayniiw.

²⁸ Ikka kirupeelewwasene quda warqeetan uwwishe.

²⁹ Ka qussa tikaseti karan ka lakanne, pahana kirupeelewwa ka a qora sampaapa isho a pisa a paqqeetin quda sire.

³⁰ Ka piitandesa karan ka lakanne, warqeetan uwwishe.

³¹ Ka qulqullitteeta qulqullowwa tura'e, qoyra ekerita oppa xarrada a paka pakopa panamma kode. Ka kuleentaadi isho manturaytaadi ka qorasene a xarra pakapakan ca a kamaara keni qapaati kode.

³² Ka xarradasene a qora ekerta lakki quda pahana kirupeelewwa ka a qoyra sampaapa isho a piisa paqqe sire ka pahanasene a kirupeelewwa isho a qoyra sampaapa warqeetan uwwishe.

³³ Ka tikase a qulqulloota tura'e qoyra ekerta oppa manturaya a kamaara afur afur qapa kode.

³⁴ Ka qoyra a pirpirta oppa xarrada lakki a pakapakopa panamma kode. Xarra paka takka shamma lakki qeppeelliyyaan olquda toommen. Ka a paka takka asseew toommen.

³⁵ Ka pahana kirpeelewwa ka a qoyra sampaapa isho a pissa paqqe xarradasene quda sire ka warqeetan quda uwwishe.

³⁶ Ka tiksase a qulqulloota karan pora qaa'ittaati'i, daka laajameppaayye matapeeta sessa dawe ka matapeeta takka xarna talta oppaayye kode.

³⁷ Kiritta a tikoose a qulqulloota a Waaqa a Selemooni nuqusumeeyye para afrattatiiyyi leyase siifi kidammo oppaayye katame.

³⁸ Ka para kudanka takkattatiiyyi leyase a settatta puuli kidammo oppaayye akka dikatamte mina'e, kodaadi piisa ka dikkade. Qupeetaadi ka para tappa isha qara pirte.