Mataafa a Nuqussa a paayyota 5 - Mataafa Qulqulloota

Dikkisama a qupeeta tika qulqulloota

¹ Kiraami nuqusa Tiroosi parraadi a nuqusume piisa karaayye qoota mootta Taawwiti kodde malla, akkima Selemooni pakka aappaayshoti oppa nuqusuma daatame dakaye ka Selemooni kapopa orxayaadi erke.

² Selemooni ka Kiraanipa erkana erkeew ka kide,

³ “Qoota oranna qinda piisan isha qara xa'en malla, haka Waaqa nyaapaadi isha kelopa oorinno kara'e, aappinno akkima maxxa Waaqa Poqallaaditi tika qulqulloota qupa malaale i''upta.

⁴ Amma xoori Waaqa Poqallaayyo qinda piisanne ana nessishe. Umma paarkaalummaata taaki neequmta koddinitto in kitto.

⁵ Semmalla akkima xatta Waaqa aappinno Taawwiti haasawade ka kide, “Innaatti an pakkaaytippa sufaanetaayti qara kutiisha'e, maxxiyyo tika qupa.” Mina'en, maxxa Waaqa Poqallaayyoti tika qulqulloota qupa dikade.

⁶ Orriyyo akkima a Sidoonata mina'e qora quura in sahanin i''uptaay, akka Lipanoosiiyyi ana qora talta quurane'e, orraayti ana ajaje. Orriyyo ka orraayti quda caado. Xaayya atti ishootta murta ana ke daashaay.”

⁷ Kiraami ete erkanasene a Selemooni dakayeeyye, akata xasoode ka kide, “Akka samaytose asse kutta muksho'e, waaqoose Taawwiti'i inna ookuma qapa daashe a kalataysamo.”

⁸ Kiiraami ka Selemooni e rkana erkeew ka kide, “Erkana ana erkite i'ana qara kayen. Qoota qora talta ka a pirpirtati desa wa faate piisan koda.

⁹ Orriyyo ka Lipaanoosi xata qoraasene pakateeta kapopa ke lekkishan anti ka pakateeta qaran tuullisha ka pora ana kiito oppa lekkisha ka eeyye olkela fura, atti ka teyyatta ka qallapa tooliyyo daassa ka waan faana ana immakta.”

¹⁰ Kiraami ka qorasene a talta isho a pirpirta akka Selemooni faano qara'e ishi daashe.

¹¹ Selemooni ka para paran qallapa lo'alla Kiraami'i, kappa taara kura a qoroosi kuma kunda lakki ka sayteeta a paxaara nitiroota kuma kunda lakki daanni.

¹² Akkima turan ishi kippeeta daashe mina'e, Waaqa ka Selemooni'i, ookuma daashe. Kiraam isho Selemooni otantoppaayye nakayta ka ca. Ikka lamatti oltura kodayteeta kodaden.

¹³ Nuqusase Selemooni ka Isira'eeleta piisa oppa orra koda hupna koono nama kuma kunda sessa reexe.

¹⁴ Ka kuma kudani kudani ishootta kite ikka leya takka takka Lipanoosi pirri ka leya lakki lakki tikkaasso oppa pirri. Saaraaysho nefo Atoniraami.

¹⁵ Selemooni irrowwa qaraayye orra daka faanno nama kuma kunda sette ka a haano nama kuma kunda tappa qapa.

¹⁶ Ka saarra a kodoose qara tooyna nama kuma sessa ka dippa sessa qapa.

¹⁷ Nuqusase ka ajaje ishootta ka dakadda tika qulqullootati kiritta katama a kukutta ka reexxame laajen ka haaden.

¹⁸ Harmoota qupeeta a Selemooni ka a Kiraami isho orra Epaali ka qora isho dakadda tikase a qulqullootati parpaaccisna xefen ka qobbeessen.